Kua ni Vacu Vakaveitalia
1. E rawa ni vakayagataki vakacava ena cakacaka vakaitalatala na ivakavuvuli e tiko ena imatai ni Korinica 9:26?
1 A vola na yapositolo o Paula: “Ena noqu ivakarau ni cici, au sega ni cici tu vakaveitalia; niu vacu tale ga au sega ni vacu meu vacuka wale tu na cagi.” (1 Kor. 9:26) A vakaibalebaletaka tiko e keri o Paula na dei ni nona vakasama kei na dei ni nona saga na isausau vakayalo. Ia na ivakavuvuli e tiko ena vosa i Paula e rawa ni vakayagataki tale ga ena cakacaka vakaitalatala. Eda vinakata meda lewa vakavuku na noda “[i]vacu” se sasaga, me yaga vakalevu sara. Eda na vakayacora vakacava?
2. Eda na vakatotomuri Paula vakacava kei ira na daukaulotu ena imatai ni senitiuri nida digia na vanua kei na gauna meda vunau kina?
2 Lako ena Vanua Era tu Kina na Lewenivanua: A vunau o Paula kei ira na daukaulotu ena imatai ni senitiuri ena vanua era na tu kina na tamata. (Caka. 5:42; 16:13; 17:17) Ke levu ena noda yalava era na tu e vale ena yakavi, qori e rairai gauna vinaka meda vunau kina e veivale. E dau oso beka ena mataka na ikelekele ni basi vei ira na lai cakacaka, kei na yakavi nira sa suka? Gauna cava era dau volivoli kina e levu ena sitoa? Qori ena rairai laulau kina na vunau e salatu.
3. Na cava meda cakava meda kua kina ni vacu vakaveitalia nida tara e dua na yalava?
3 Tara Vinaka na Yalava: E tiko eso tale na ka meda qarauna meda kua kina ni vacu vakaveitalia nida tara e dua na yalava. Kena ivakaraitaki, ena sega ni vinakati mera cakacaka e dua na ilala levu ena dua ga na yalava, ni na levu na gauna kei na cakacaka ena vinakati mera tuvai kina vakamatau, me veirauti tale ga na yalava ni cakacaka. Ena rairai vinaka me wase na ilala qori. E va tale ga qori na noda vunau ena so na itikotiko, ena tarai totolo na yalava da qai vunau tale ga vei ira e levu ke vica ga era cakacaka kina. Eda rawa ni kerea e dua na yalava e voleka ga ena noda itikotiko meda vunau kina, ena sega ni levu kina na gauna ni veitosoyaki.
4. Na cava ena vukei keda meda “gonedau ni tamata”?
4 A vakatauvatani ira tiko na dauvunau o Jisu kei ira na “gonedau ni tamata.” (Mari. 1:17) Na gonedau ena vinakata me katoa na nona lai siwa, ena sega ni lako wale tu ga. O ira na gonedau e dau katoa na nodra siwa era kila na vanua kei na gauna ena levu kina na ika, era na vakatotolo sara mera lai siwa. Io, era maqosataka na nodra cakacaka. Me va mada ga qori na noda gugumatua ena noda cakacaka vakaitalatala.—Iper. 6:11.