Ena Yaga ke Dua Nomu Yalava ni Vunau?

1. Na cava mo kerea kina me dua na nomu yalava ni vunau?

¹ Na cava mo kerea kina me dua na nomu yalava ni vunau? Ena ivavakoso e levu na kena yalava, e rawa sara ga ni dua na nomu yalava ni vunau, de dua e voleka ena nomu itikotiko. E tukuni ena tabana e 103 ni ivola na iSoqosoqo: “Ni dua sara ga na nomu mape, ena rawa ni levu nomu gauna ena cakacaka vakavunau. De dua o na via sureta tale ga e dua na dautukutuku mo drau tara vata na nomu yalava.”

2. E rawa vakacava me ikuri ni ituvatuva ni iwasewase lailai na nomu vunau ena nomu yalava?

² iKuri ni Vunau Vakaiwasewase: Ke soli vei iko e dua na yalava volekata na nomu vanua ni cakacaka, o rawa ni vunau ena nomu gauna ni vakasigalevu se ni suka na cakacaka. De dua drau na vunau vata kei na dua tale na dautukutuku e voleka tale ga na nona vanua ni cakacaka. Ke soli vei iko e dua na yalava volekata na nomu itikotiko, ena veiganiti sara qori vei kemudou vakavuvale mo dou vunau kina ena yakavi. Nanuma tiko, ke o sega ni tiko ena soqoni ni cakacaka vakavunau, e veiganiti mo masuta na veidusimaki i Jiova ni bera ni o vunau. (Fpai. 4:6) E dodonu tale ga mo veiraurautaka na gauna o cakacaka kina ena nomu yalava kei na gauna o tokona kina na ituvatuva ni iwasewase lailai. E levu era dau vunau ena muanimacawa, e vinaka gona mo tokona ena gauna qori na nomu iwasewase lailai.

3. Ena yaga vakacava ke dua na nomu yalava ni vunau?

³ Kena Yaga: Ke sa tiko e dua na nomu yalava ni vunau, qori sara ga na vanua o rawa ni vunau kina ena gauna kece e ganita na nomu ituvatuva. E rawa ni levu na gauna ni nomu cakacaka vakavunau qai lailai na gauna ni nomu veitosoyaki. Na ituvatuva qori era na rawa ni painia veivuke kina se painia tudei eso. Nira tiko kece ga ena dua na yasayasa na taukeinivale era tataleitaki, ena rawarawa sara nomu veisikovi lesu kei na caka vuli iVolatabu. Era raica e levu ni nodra vunau ena yalava era kerea e vukei ira mera veikilai qai veinuitaki kei ira na taukeinivale, vakabibi ke rawa ni tarai vakavica vata na yalava ni bera ni soli vei ira eso tale era kerea. Vakacava ena vukei iko kei na nomu vuvale na nomu kerea e dua na yalava ni vunau mo dou vakacavara sara kina na nomudou itavi vakaitalatala?​—2 Tim. 4:5.