“Moni Vakatawa na Qelenisipi ni Kalou Oni Lesi Moni Qarava”
“Moni vakatawa na qelenisipi ni Kalou oni lesi moni qarava, ni kua ni qarava ena voraki, ena yalo ga e vinakata.”—1 PITA 5:2.
1. Na ituvaki cava era sotava tiko na lotu vaKarisito ena gauna a vola kina na imatai ni nona ivola o Pita?
A VOLA na imatai ni nona ivola na yapositolo o Pita ni bera toka ga ni vakararawataki ira na lotu vaKarisito e Roma o Nero. A vinakata me vakayaloqaqataki ira na nona itokani vakabauta vata. Ena gauna oya e “veilakoyaki voli” na Tevoro ena nona vakasaqarai ira na lotu vaKarisito me tilomi ira. Mera vorati koya na lotu vaKarisito, ena vinakati mera ‘yalomatua’ ra qai ‘vakamalumalumutaki ira ena liga kaukaua ni Kalou.’ (1 Pita 5:6, 8) Ena vinakati mera duavata tiko ga. Ena sega ni rawa nira ‘veicati ra qai veivakamavoataki tiko,’ nira na “veivakarusai” ga kina.—Kala. 5:15.
2, 3. O cei eda na veivala vata tiko, na cava eda na veivosakitaka?
2 Eda sotava tale ga na ituvaki va qori nikua. E vakasaqara tiko na Tevoro na sala me tilomi keda kina. (Vkta. 12:12) Sa voleka qo na “veivakararawataki levu ena ivakatagedegede e sega ni bau vakilai me tekivu mai na buli ni vuravura.” (Maciu 24:21) E dodonu meda qarauna meda kua ni veicati me vakataki ira ga na lotu vaKarisito ena imatai ni senitiuri. Me rawati qori, eso na gauna ena vinakati na nodra veivuke na tagane matua.
3 Meda veivosakitaka mada na sala e rawa nira marautaka kina vakalevu na qase ni ivavakoso na nodra vakatawana na ‘qelenisipi ni Kalou era lesi kina mera qarava.’ (1 Pita 5:2) Oti oya, eda na veivosakitaka na sala e dodonu mera veivakatawani kina. Eda na veivosakitaka ena ulutaga e tarava na ka e rawa nira cakava na ivavakoso mera ‘dokai ira kina era cakacaka vakaukaua ra qai vakatawana’ na qelenisipi. (1 Ces. 5:12) Na noda dikeva tiko na tikina qo ena yaga ena noda vorati koya na meca levu, nida kila nida na veivala tiko kei koya.—Efeso 6:12.
Vakatawana na Qelenisipi ni Kalou
4, 5. Mera raica vakacava na qelenisipi na tagane matua? Vakamacalataka.
4 A uqeti ira na tagane matua ena imatai ni senitiuri o Pita me tiko vei ira na rai ni Kalou me baleta na qelenisipi a tataunaki vei ira. (Wilika 1 Pita 5:1, 2.) A duru ni ivavakoso o Pita, ia a sega vakadua ni vosa beci ira na qase ni ivavakoso. E dau uqeti ira ga nira veiqaravi vata tiko vaqase ni ivavakoso. (Kala. 2:9) Me vakataki Pita, na iLawalawa Dauvakatulewa nikua e vakamasuti ira na qase ni ivavakoso mera qarava sara vakavinaka na nodra itavi bibi ni nodra vakatawani na qelenisipi ni Kalou.
5 A vola na yapositolo ni dodonu mera ‘vakatawana na qelenisipi ni Kalou e lesi vei ira.’ E bibi mera kila ni o Jiova kei Jisu Karisito erau taukena na qelenisipi. Era na dui saumitaro na qase ena sala era vakatawai ira kina na qelenisipi ni Kalou. Kaya mada ke gole ena dua na vanua na nomu itokani voleka qai kerei iko mo raici ira tiko na luvena. O na sega beka ni qaravi ratou vinaka qai vakani ratou? Ke tauvimate e dua na gone, o na sega beka ni raica me lai qaravi vakavuniwai? O ira tale ga na qase ni ivavakoso mera “vakatawa na ivavakoso ni Kalou e volia sara ga ena dra i Luvena.” (Caka. 20:28) Era na nanuma dei tiko nira voli yadudua na sipi ena dra talei i Karisito Jisu. Me vaka nira na saumitaro na qase, era na veivakani, veitaqomaki, qai qaravi ira tale ga na qelenisipi.
6. Na cava na nodra itavi na ivakatawanisipi ena gauna vakaivolatabu?
6 Vakasamataka mada na nodra itavi na ivakatawanisipi ena gauna vakaivolatabu. Era na vosota na todra ni siga kei na batabata ni bogi mera qaravi ira kina na qelenisipi. (Vkte. 31:40) Era na solibula ena vukudra na qelenisipi. Na ivakatawa ni sipi o Tevita a vakabula na nona qelenisipi mai na manumanu kila, me vaka na laione kei na pera. E kaya o Tevita ni “taura na kumina, ka yavita, ka vakamatea.” (1 Sam. 17:34, 35) Qori e ivakaraitaki ni nona yaloqaqa! De dua a voleka sara ni vakamavoataki koya na manumanu kila! Ia e cakava na ka kece e rawata me vakabula kina na nona sipi.
7. Vakaivakatakarakara, era na dreti ira tani vakacava na sipi na qase ni ivavakoso mai na kumi i Setani?
7 Nikua, e dodonu tale ga vei ira na qase mera yadrava na nona sasaga na Tevoro e vaka tiko na laione. Qori ena okati kina na nodra yaloqaqa me vaka sara ga era dreti ira tani na sipi mai na kumi ni Tevoro. Nira taura na kumi ni manumanu kila na qase, e vaka ga era vakabulai ira tiko na sipi. Era na rawa ni vukei ira na tacidra era wele, era temaki rawarawa tale ga ena ilawaki i Setani. (Wilika Juta 22, 23.) E macala ga nira cakava rawa qori na qase ena veivuke i Jiova. Era karona na sipi e mavoa, era na vadretitaka qai vakabulai koya ena Vosa ni Kalou me vaka na imasi e malumu kina na yago.
8. Na vanua cava era na dusimaki ira kina na qelenisipi o ira na qase, era na cakava vakacava qori?
8 Na ivakatawanisipi ena dusimaki ira na sipi ena veico drokadroka kei na ivurevure ni wai. Na qase tale ga ena dusimaki ira na qelenisipi ina ivavakoso, era na veiuqeti mera tiko wasoma ena soqoni, mera vakani vinaka kina na qelenisipi ra qai kana “ena kena gauna donu.” (Maciu 24:45) Ena rairai vinakati vei ira na qase mera vakayagataka eso tale na gauna mera uqeti ira kina vakayalololoma o ira na tauvimate vakayalo, mera ciqoma kina na veivakani ena Vosa ni Kalou. Ena rairai saga tiko na sipi e lako sese tu me lesu ina qelenisipi. Era na sega ni vakayalolailaitaki koya o ira na qase, era na vakamacalataka ga vakayalovinaka vua na ivakavuvuli vakaivolatabu qai vukei koya ena sala me bulataka kina.
9, 10. Na cava era na cakava na qase mera vukei ira kina na tauvimate vakayalo?
9 Na vuniwai vakacava o taleitaka mo lai raica ke o tauvimate? O na lai raica beka e dua na vuniwai e sega ni dau vakarogoci iko vinaka, e totolo ga nona vola na memu wainimate me rawa ni galala me raica e dua tale e tauvimate? Se o na lai raica e dua na vuniwai e dau vakarogoci iko vinaka qai vakamacalataka na vu ni mate, e vakatututaka tale ga na veiqaravi e rawa ni caka?
10 Era na rogoci ira tale ga na tauvimate vakayalo o ira na qase ra qai vukea me mavo na mavoa me vaka sara ga era “lumuti koya ena waiwai ena yaca i Jiova.” (Wilika Jemesa 5:14, 15.) Na Vosa ni Kalou e vaka tiko na waiwai boi vinaka mai Kiliati, ni rawa ni veivakacegui vua e dua e tauvimate. (Jere. 8:22; Isik. 34:16) Ni vakayagataki na ivakavuvuli vakaivolatabu ena rawa ni vukei koya e tauvimate vakayalo me qaravi Jiova vinaka tale. Io, e levu na ka vinaka e rawa nira cakava na qase nira vakarogoca na ka era nuiqawaqawataka na sipi ra qai masu vata kei ira.
Kua ena Voraki, ia ena Yalo ga e Vinakata
11. Na cava e uqeti ira na qase mera vakatawa na qelenisipi ni Kalou ena yalo e vinakata?
11 A vakadreta tarava o Pita vei ira na tagane matua na sala dodonu me caka kina na veivakatawani kei na ka me kua ni caka. E dodonu vei ira na qase mera vakatawana na qelenisipi ni Kalou, mera “kua ni qarava ena voraki, ena yalo ga e vinakata.” Na cava e uqeti ira na qase mera qaravi ira na tacidra ena yalo e vinakata? Ia na cava sara mada a uqeti Pita me vakatawana na sipi i Jisu qai vakani ira? Na nona lomani ira kei na nona lomana na nona Turaga. (Joni 21:15-17) Ena nodra loloma na qase era ‘sega kina ni bula ena vukudra ga, ia era bula ga ena vuku i koya e mate ena vukudra.’ (2 Kor. 5:14, 15) Ni tu vei ira na qase na loloma qori qai salavata kei na nodra lomana na Kalou kei ira na tacidra, qo ena uqeti ira mera qaravi ira na qelenisipi, nira solia kina nodra gauna, iyau kei na nodra vinaka taucoko. (Maciu 22:37-39) Era sega ni cakava qori ena voraki, ena yalo ga e vinakata.
12. E vakacava na levu ni nona soli koya na yapositolo o Paula?
12 Me yaco e vei na nodra soli ira na qase? Ena nodra karoni ira na sipi, era na vakatotomuria na yapositolo o Paula me vaka ga na nona vakatotomuri Jisu. (1 Kor. 11:1) O Paula kei ira na nona itokani era lomani ira na mataveitacini e Cesalonaika, era marau nira tukuna vei ira na ‘itukutuku vinaka me baleta na Kalou ra qai solibula tale ga ena vukudra.’ Na nodra cakava qori, a rawa kina nira yalololoma, “me vaka na tina e vakasucuma na luvena qai karona.” (1 Ces. 2:7, 8) A kila vinaka o Paula na nona dau lomani luvena e dua na tina. Ena cakava na ka kece ena vuku i luvena, me vaka na nona dau yadra ena bogi levu me vakani luvena.
13. Na cava mera veiraurautaka na qase ni ivavakoso?
13 E dodonu me veiraurautaka na qase ni ivavakoso na itavi ni veivakatawani kei na nona qarava na nona vuvale. (1 Tim. 5:8) Na gauna era vakayagataka na qase ena ivavakoso e gauna vakamareqeti dina, ni rawa nira vakayagataka qori ena nodra vuvale. Dua na sala ena veiraurautaka kina na nona itavi, oya nona sureti ira eso tale ena so na gauna mera tiko ena yakavi ni nodratou Sokalou Vakavuvale. Levu na gauna, o Masanao e dua na qase ni ivavakoso e Japani e dau sureti ira na dawai kei ira na gone luveniyali vakayalo ena nodratou vuli vakavuvale. A yaco na gauna mera qase ni ivavakoso eso vei ira na vukei qo, ra qai vakatotomuria na ivakaraitaki vinaka i Masanao.
Cata na Yalokocokoco —Marautaka na Veivakatawani
14, 15. Na cava mera yadrava kina na qase na “yalokocokoco,” era na vakatotomuri Paula vakacava ena tikina qo?
14 A uqeti ira tale ga na qase ni ivavakoso o Pita mera vakatawana na qelenisipi, “me kua ena yalokocokoco, ena yalo ga e marautaka.” E dau taura vakalevu na gauna na nodra itavi na qase, ia era sega ni namaka mera saumi vakailavo. A raica o Pita na kena vinakati mera vakasalataki o ira na nona itokani tagane matua ena kena rerevaki na nodra vakatawani na qelenisipi “ena yalokocokoco.” E vakavotui na ka rerevaki qori ena nodra bula vutuniyau na iliuliu ni lotu i “Papiloni na Ka Levu,” e lai vakavuna mera bula dravudravua e levu. (Vkta. 18:2, 3) Bibi gona vei ira na qase nikua mera yadrava me kua ni laurai vei ira na itovo qori.
15 E ivakaraitaki vinaka o Paula vei ira na qase ni ivavakoso lotu vaKarisito. Ni dua na yapositolo a rawa ni ‘vakaicolacolataki ira vakailavo’ na lotu vaKarisito e Cesalonaika. Ia a sega ga ni “kana wale vua e dua” na yapositolo o Paula. A ‘buno qai oga ena bogi kei na siga.’ (2 Ces. 3:8) Era ivakaraitaki vinaka ena tikina qo e levu na qase ni ivavakoso nikua, wili kina o ira na ivakatawa dauveilakoyaki. Io, era dau marautaka na nodra veikauaitaki na tacidra ena vakabauta, ia era sega ni ‘vakaicolacolataka e dua ena ka vakailavo.’—1 Ces. 2:9.
16. Na cava na kena ibalebale me vakatawani na qelenisipi ‘ena yalo e marau’?
16 Era vakatawana na qelenisipi na qase ena ‘yalo e marau.’ Ena laurai qori ena nodra vakuai ira mera vukei ira na qelenisipi. Ia e sega ni kena ibalebale qori nira vakasaurarataki ira na qelenisipi mera qaravi Jiova, se era veiuqeti na qase mera qarava na Kalou eso ena veiqati. (Kala. 5:26) Era kila na qase nira duidui na sipi. Era marau nira uqeti ira na mataveitacini mera qaravi Jiova ena marau.
Kua ni Vakacolasau Vei Ira na Qelenisipi mo iVakaraitaki Ga
17, 18. (a) Na cava e dredre kina ena so na gauna vei ratou na yapositolo me ratou kila na ivakavuvuli i Jisu me baleta na yalomalumalumu? (b) E tautauvata vakacava qori ena gauna qo?
17 Me vaka eda sa veivosakitaka mai, mera nanuma tiko na qase nira vakatawana tiko na qelenisipi ni Kalou, e sega ni nodra. Era qarauna mera kua “ni vakacolasau vei ira e taukeni ira na Kalou.” (Wilika 1 Pita 5:3.) Ena so na gauna, e dau cala na inaki ni nodratou via veiqaravi na yapositolo i Jisu. Me vakataki ira na iliuliu ni veimatanitu, eratou dau vinakata na yapositolo na itutu rogo.—Wilika Marika 10:42-45.
18 Nikua o ira na tacida tagane era “via qarava na itavi vakaivakatawa” mera dikeva na inaki ni nodra via veiqaravi. (1 Tim. 3:1) Vei ira na qase tiko ena gauna qo ena vinaka mera liaca ke inaki ni nodra veiqaravi mera veiliutaki se rogo me vaka ga era cakava eso na yapositolo. Ke dredre vei ira na yapositolo na ituvaki qo, mera kila tale ga na qase ni na vinakati mera sasaga mera levea kina na rai vakavuravura ena kena vinakati mera dau lewai ira na tani.
19. Na cava mera nanuma tiko na qase nira saga tiko mera taqomaka na qelenisipi?
19 Macala ga ni so na gauna ena vinakati mera dei na qase ni ivavakoso, me vaka na nodra taqomaka na qelenisipi vei ira na “olifa dau veivakasaurarataki.” (Caka. 20:28-30) A tukuna o Paula vei Taito me ‘veivakauqeti, me veivunauci ni sa soli vei koya na kena lewa kece.’ (Taito 2:15) Nira veivunauci mada ga na qase ni ivavakoso, era na saga mera dokai ira na vunauci. Era kila ni rawa ni uqeta na lomana e dua me muria na sala dodonu, ke ra veivakasalataki ga vakayalololoma ra qai sega ni veivakalewai.
20. Mera ivakaraitaki vinaka na qase ni ivavakoso, e rawa vakacava nira vakatotomuri Jisu?
20 Na ivakaraitaki uasivi i Karisito e uqeti ira na qase ni mera lomani ira na qelenisipi. (Joni 13:12-15) Eda qoroya na noda wilika na sala e vakavulici ira kina na nona tisaipeli o Jisu ena vunau kei na veivakatisaipelitaki. Na ivakarau ni nona yalomalumalumu e uqeti ratou sara ga na nona tisaipeli, e rawa kina ni ratou ‘yalomalumalumu ena nodratou okati ira na kena vo mera uasivi vei ratou.’ (Fpai. 2:3) Era uqeti tale ga na qase nikua mera vakatotomuri Jisu, me rawa kina nira ‘ivakaraitaki vei ira na qelenisipi.’
21. Na cava era rawa ni vakanamata kina na ivakatawa?
21 A tinia o Pita na nona uqeti ira na tagane matua ena nona tukuna e dua na vosa ni yalayala me baleta na gauna e se bera mai. (Wilika 1 Pita 5:4.) O ira na ivakatawa lumuti ena soli vei ira “na isala vakatui lagilagi e sega ni ca rawa” kei Karisito e lomalagi. O ira na ivakatawa era ‘so tale na sipi’ e nodra itavi dokai mera vakatawani ira na qelenisipi ni Kalou e vuravura ena nona veiliutaki “na ivakatawa levu.” (Joni 10:16) Ena veivosakitaki ena ulutaga tarava na sala era rawa ni veitokoni kina na lewe ni ivavakoso vei ira na lesi mera veivakatawani.
Railesuvi
• Na cava e veiganiti kina vei Pita me uqeti ira na qase mera vakatawana na qelenisipi ni Kalou e lesi vei ira mera qarava?
• Mera vakatawani ira vakacava na tauvimate vakayalo na qase?
• Na cava e uqeti ira na qase mera vakatawai ira na qelenisipi ni Kalou e lesi vei ira?
[iYaloyalo ena tabana e 21]
Me vakataki ira na ivakatawanisipi ena gauna makawa, e dodonu vei ira na qase ni ivavakoso nikua mera taqomaki ira na “sipi” e lesi vei ira mera qarava