Talairawarawa Vei Ira na iVakatawa i Jiova
“Moni talairawarawa vei ira era liutaki kemuni tiko moni yalorawarawa tale ga, nira yadravi kemuni tiko.”—IPER. 13:17.
O NA SAUMA VAKACAVA?
Era vakatawa vakacava na qase na sipi ni Kalou?
Na cava mera vakarorogo kina na sipi vei ira na ivakatawa?
Na cava me kua kina ni iulubale ni noda beca nodra ivakasala vakaivolatabu na ivakatawa na nodra malumalumu?
1, 2. Na cava e veiganiti kina nona vakatauvatani koya o Jiova kei na ivakatawanisipi?
O JIOVA e vakatauvatani koya kei na ivakatawanisipi. (Isik. 34:11-14) E bibi qori ni vukei keda meda kilai koya vinaka. Na ivakatawa dauloloma ena raica vakabibi mera bulabula vinaka na qelenisipi e qarava. Ena tuberi ira ina veivanua veico kei na ivurevure ni wai (Same 23:1, 2); ena yadravi ira ena siga kei na bogi (Luke 2:8); ena taqomaki ira mai na manumanu kila (1 Sam. 17:34, 35); ena keveti ira na luve ni sipi (Aisea 40:11); ena vaqarai ira era yali qai karoni ira vinaka era mavoa.—Isik. 34:16.
2 E levu na dauveiqaravi i Jiova ena gauna makawa era dau teitei, ra dau susu manumanu tale ga. Era kila gona na vuna e vakatauvatani koya kina o Jiova kei na ivakatawanisipi dauloloma. Era kila ni gadrevi mera karoni ra qai kauaitaki na sipi me rawa nira bulabula vinaka kina. Ena vakasama vakayalo, e dina tale ga qori vei keda na tamata. (Mari. 6:34) Ke da sega ni karoni vinaka vakayalo da qai sega ni dusimaki, eda na sotava ga na leqa. Eda na rawai rawarawa, eda na cakava tale ga na veika tawasavasava—eda na veiseyaki me vaka na “sipi sa sega na nodrai vakatawa.” (1 Tui 22:17) Ia o Jiova e vakarautaka vakayalololoma na veika eda gadreva na nona tamata.
3. Na cava ena veivosakitaki ena ulutaga qo?
3 E vakaibalebale tale ga vei keda nikua na nona vakatauvatani o Jiova kei na ivakatawanisipi. E se vakarautaka tiko ga o koya na veika era gadreva na nona dauveiqaravi era vaka na sipi. Meda dikeva mada na sala e dusimaki ira kina nona sipi qai vakarautaka na ka era gadreva nikua. Eda na dikeva tale ga na ka mera cakava na sipi ni kauaitaki ira vakayalololoma o Jiova.
NA IVAKATAWA VINAKA E LESIA ESO TALE MERA VEIVUKE
4. Na cava na itavi i Jisu ena nodra vakatawani na sipi i Jiova?
4 O Jiova e sa digitaki Jisu me Ulu ni ivavakoso vaKarisito. (Efeso 1:22, 23) Ni “ivakatawa vinaka,” e ucui tamana vinaka o Jisu ena veika e taleitaka, nona inaki, kei na nona itovo. E ‘solia mada ga na nona bula ena vukudra na sipi.’ (Joni 10:11, 15) E yaga dina vei keda na kawatamata na isoro ni veivoli i Karisito! (Maciu 20:28) Na inaki mada ga i Jiova “mera kua ni rusa o ira era vakabauti koya [Jisu], mera rawata ga na bula tawamudu”!—Joni 3:16.
5, 6. (a) O cei sa lesia o Jisu me karoni ira na nona sipi, na cava mera cakava na sipi me yaga vei ira na ituvatuva qori? (b) Na cava na vuna levu duadua meda talairawarawa kina vei ira na qase ni ivavakoso?
5 Na cava mera cakava na sipi vua na iVakatawa Vinaka o Jisu Karisito? E kaya o Jisu: “Era rogoca na domoqu na noqu sipi, au kilai ira tale ga, ra qai muri au.” (Joni 10:27) Noda rogoca na domona na iVakatawa Vinaka, e kena ibalebale na noda muria nona veidusimaki ena gauna kece. Qori e okati kina na noda tokoni ira e sa lesia o koya, o ira na ivakatawa vakayalo. A tukuna o Jisu nira na tomana na nona yapositolo kei na nona tisaipeli na cakacaka a tekivutaka. Qori mera ‘veivakavulici’ ra qai ‘vakani ira na sipi lalai i Jisu.’ (Maciu 28:20; wilika Joni 21:15-17.) Ni tete na kacivaki ni itukutuku vinaka, levu tale ga era sa mai tisaipeli, sa qai tuvanaka kina o Jisu mera vakatawa na ivavakoso na lotu vaKarisito matua.—Efeso 4:11, 12.
6 Ni vakadreti ira tiko na qase ni ivavakoso e Efeso ena imatai ni senitiuri na yapositolo o Paula, a tukuna nira lesi ena yalo tabu mera “vakatawa na ivavakoso ni Kalou.” (Caka. 20:28) E dina tale ga qori vei ira na qase ni ivavakoso nikua, na nodra lesi e yavutaki ena ivakatagedegede vakaivolatabu e veiuqeti kina na yalo tabu. Na noda talairawarawa gona vei ira na qase ni ivavakoso, e vakaraitaka nida dokai rau na iVakatawa levu, o Jiova kei Jisu. (Luke 10:16) Qori na vuna levu duadua meda vakamalumalumu kina vei ira na qase ni ivavakoso. Ia e tiko eso tale na vuna e ka vakavuku kina meda talairawarawa vei ira.
7. Era dau vukei iko vakacava na qase me vinaka tiko ga na nomu veiwekani kei Jiova?
7 Nira dusimaki ira na tacidra vakayalo na qase, era na veivakayaloqaqataki, era na veivakasalataki, ena yavutaki qori mai na iVolatabu se na kena ivakavuvuli. Ia e sega ni inaki ni nodra veidusimaki mera lewa na nodra bula na tacidra. (2 Kor. 1:24) E kena inaki ga mera vukei ira na tacidra lotu vaKarisito mera dau vakatulewa vinaka, mera duavata ra qai veiyaloni ena ivavakoso. (1 Kor. 14:33, 40) O ira na qase era ‘yadravi keda tiko,’ nira vinakata mera vukei keda yadua na lewe ni ivavakoso me vinaka tiko ga noda veiwekani kei Jiova. Ke ra kidava ni sa voleka se sa “butucala” e dua na tacidra, era na vukei koya totolo. (Kala. 6:1, 2; Juta 22) Vakacava e sega ni vuna vinaka qori meda ‘talairawarawa kina vei ira era liutaki keda tiko’?—Wilika Iperiu 13:17.
8. Era dau taqomaka vakacava na qelenisipi ni Kalou na qase?
8 E ivakatawa vakayalo na yapositolo o Paula, a vola vei ira na tacina e Kolosa: “Ni qarauna: de dua e tagavi kemuni bulabula ena vuku vakavuravura kei na vosa ni veicavilaki e yavutaki ena ivakavuvuli vakatamata kei na ivakavuvuli e vakabibitaki e vuravura, e sega ni salavata kei na ivakavuvuli i Karisito.” (Kolo. 2:8) Qori e dua tale na vuna meda talairawarawa kina ena nodra ivakasala vakaivolatabu na qase. Era taqomaka na qelenisipi ena nodra yadrava me kua ni dua me vakaleqa na nodra vakabauta. E veivakasalataki na yapositolo o Pita me baleti ira na “parofita lasu” kei ira na “qasenivuli lasu,” nira na saga mera “bacani ira na lomalomarua” mera cakava na ka ca. (2 Pita 2:1, 14) O ira tale ga na qase nikua era na veivakasalataki tale ga va qori ke ra raica ni veiganiti. Nira lotu vaKarisito matua, era kila vinaka na veika e dau yaco. Ni bera gona nira lesi ena itavi qori, era sa vakaraitaka nira kila vinaka na iVolatabu, era sa yacova tale ga na ivakatagedegede mera vakavulica na ivakavuvuli dina. (1 Tim. 3:2; Taito 1:9) Nira matua, ni tu vei ira na rai donu, qai tu vei ira na vuku e yavutaki vakaivolatabu, e rawa kina nira dusimaki ira vakamaqosa na qelenisipi.
NA IVAKATAWA VINAKA E VAKANIA QAI TAQOMAKA NA SIPI
9. E veidusimaki qai veivakani vakacava ena ivavakoso nikua o Jisu?
9 E vakayagataka o Jiova na nona isoqosoqo me vakarautaka vakayauyau na kakana vakayalo vei ira na mataveitacini e veiyasa i vuravura. E dau tabaki ena noda ivola e levu na ivakasala vakaivolatabu. Ena so tale ga na gauna, na isoqosoqo e dau veidusimaki vakatabakidua vei ira na qase, qori ni vakayagataki na ivola se nodra veivakasalataki na ivakatawa dauveilakoyaki. Qori na sala era dusimaki kina vakamatata na sipi.
10. Na cava e nodra itavi na ivakatawa vakayalo ni lakosese e dua na sipi mai na ivavakoso?
10 E nodra itavi na ivakatawa mera veitaqomaki vakayalo, veituberi qai karoni ira na lewe ni ivavakoso yadua, vakabibi o ira era yalolailai se o ira era tauvimate vakayalo. (Wilika Jemesa 5:14, 15.) Eso vei ira qori era rairai lakosese mai na qelenisipi, era sa muduka tale ga na nodra qarava na Kalou. Ni basika na ituvaki va qori, na ivakatawa yalololoma ena saga ena nona igu taucoko me qarai ira yadua na sipi era yali qai uqeti ira mera lesu tale ina qelenisipi, oya na ivavakoso. E tukuna o Jisu: ‘E sega ni taleitaka na Tamaqu mai lomalagi me rusa e dua vei ira na lalai qo.’—Maciu 18:12-14.
MEDA RAICA VAKACAVA NODRA MALUMALUMU NA IVAKATAWA?
11. Na cava e dredre kina mera talairawarawa eso vei ira na qase?
11 Erau iVakatawa uasivi o Jiova kei Jisu. Ia o ira na ivakatawa era lesi mera qarava na ivavakoso era sega ni uasivi. Qori e dau vakadredretaka mera talairawarawa eso vei ira na qase. Eso era na rairai tukuna: ‘O ira qori era ivalavala ca me vakataki keda. Na cava meda rogoca kina nodra ivakasala?’ Era sega ni uasivi na qase, ia e gadrevi me donu noda rai me baleta na nodra malumalumu.
12, 13. (a) Na cava e rawa ni tukuni me baleta na nodra malumalumu o ira e lesia o Jiova ena gauna makawa? (b) Na cava e volatukutukutaki kina ena iVolatabu na nodra malumalumu o ira na tagane era lesi?
12 E vakamatatataka na iVolatabu na nodra malumalumu eso a vakayagataki ira o Jiova mera liutaki ira na nona tamata ena gauna makawa. Kena ivakaraitaki, a lumuti me tui o Tevita me iliuliu tale ga kei Isireli. Ia e rawai ena veitemaki, mani veibutakoci qai laba. (2 Sam. 12:7-9) Dikeva tale ga na ivakaraitaki ni yapositolo o Pita. E levu na itavi e lesi vua ena ivavakoso vaKarisito ena imatai ni senitiuri, ia e vakayacora tale ga na cala bibi. (Maciu 16:18, 19; Joni 13:38; 18:27; Kala. 2:11-14) Koya gona, na tamata kece me tekivu mai vei Atama kei Ivi era sega ni uasivi, vakavo ga o Jisu.
13 Na cava e vinakata kina o Jiova mera volatukutukutaka na dauvolaivolatabu na nodra malumalumu o ira na tagane era lesi? E dua na vuna levu oya, e via vakaraitaka na Kalou ni rawa vua me vakayagataki ira na tamata sega ni uasivi me liutaki ira nona tamata. Io, qori na ka sa dau cakava tiko mai. Meda kua gona ni raica na nodra malumalumu o ira na liutaki keda me noda iulubale meda vosa kudrukudrutaki ira kina se meda beca nodra vakatulewa nikua. E vinakata o Jiova meda dokai ira na tacida qori, da qai talairawarawa vei ira.—Wilika Lako Yani 16:2, 8.
14, 15. Na cava eda vulica ena nona dau veitaratara o Jiova kei ira nona tamata ena gauna makawa?
14 E bibi dina nikua meda talairawarawa vei ira era liutaki keda tiko. Vakasamataka mada na sala e veitaratara kina o Jiova kei ira na nona tamata ena gauna e ririkotaki kina na nodra bula ena gauna makawa. Kena ivakaraitaki, nira biuti Ijipita na Isireli, o Jiova e vakayagataki Mosese kei Eroni me rau vakasalataki ira. Mera vakabulai na Isireli ni tau na ikatini ni kuita, e gadrevi mera muria e dua na ivakaro. Oya mera vakayagataka vata e dua na kakana, mera vakamatea e dua na lami, ra qai boroya na kena dra ena duru ni sogo kei na ulu ni katuba ni nodra vale. Na ivakaro qori e sega ni vakarogoi ena dua na domo mai lomalagi. Ia ena gadrevi mera talairawarawa vei ira na qase ni Isireli, baleta o ira qori era dusimaki sara ga mai vei Mosese. (Lako 12:1-7, 21-23, 29) Ena ituvaki va qori, o Mosese kei ira na qase ni Isireli era dau vakarogoya na ivakaro i Jiova vei ira na nona tamata. Nikua, era vakayacora tale ga na itavi qori na qase.
15 O na rairai vakasamataka tale ga na nona dau vakayagataki ira na tamata kei ira na agilosi o Jiova ena gauna vakaivolatabu mera vakasavuya na itukutuku ni veivakabulai. Ena ituvaki va qori, e raica o Jiova ni veiganiti me lesia vei ira eso na itavi. O ira na italai qo era dau vosa ena yaca i Jiova, era tukuna tale ga vei ira na nona tamata na veika mera cakava mera vakabulai kina ni yaco e dua na ituvaki leqataki. De dua ena vakayacora tale ga qori o Jiova ena Amaketoni. Mera qarauna na qase nikua era lesi mera matataki Jiova se na nona isoqosoqo, mera kua ni vakatanitaka na lewa e soli vei ira.
“DUA GA NA QELENISIPI, DUA GA NA KENA IVAKATAWA”
16. Na “vosa” cava e dodonu meda rogoca?
16 O ira na tamata i Jiova era lewena e “dua ga na qelenisipi” qai “dua ga na kena ivakatawa,” o Jisu Karisito. (Joni 10:16) E tukuna o Jisu ni na tiko vata kei ira nona tisaipeli “me yacova na ivakataotioti ni veika vakavuravura.” (Maciu 28:20) Me vaka ni sa Tui tiko mai lomalagi, e lewa o koya na veika kece e yaco tiko me yacova ni sa vakarusai na vuravura e lewa tu o Setani. Koya gona, me rawa nida duavata, meda taqomaki tale ga ena qelenisipi ni Kalou, e dodonu meda rogoca ‘e dua na vosa mai dakuda,’ e tukuna tiko vei keda na vanua meda gole kina. Na “vosa” qori e okati kina na veika e tukuna na yalo tabu ni Kalou era volai tu ena iVolatabu kei na ka erau tukuna o Jiova kei Jisu ni rau vakayagataki ira na lesi mera ivakatawa.—Wilika Aisea 30:21; Vakatakila 3:22.
17, 18. (a) Na cava e rawa ni vakaleqa na qelenisipi, ia na cava eda rawa ni vakadeitaka? (b) Na cava ena veivosakitaki ena ulutaga e tarava?
17 E tukuni ni o Setani e veilakoyaki tiko “me vaka na laione e tagi, e vakasaqara e dua me basuraka.” (1 Pita 5:8) O Setani e vaka e dua na manumanu kila e via kana sara tu ga, e vakamuri ira vakamalua na qelenisipi, qai waraka e dua na gauna veiganiti me toqova na sipi e malumalumu se lakosese. Sa qai bibi ga kina meda kabita tiko ga na qelenisipi kei Jiova, “na ivakatawa e dau maroroya na [noda] bula.” (1 Pita 2:25) E kaya na Vakatakila 7:17 me baleti ira na bula ena veivakararawataki levu: “Ni na vakatawai ira na Lami [o Jisu] . . . ena tuberi ira tale ga ina ivurevure ni wai ni bula. Kena ikuri, na Kalou ena qusia tani na wainimate kece mai na matadra.” E sega tale ni dua na yalayala me tautauvata kaya, se vakaevei?
18 Nida dikeva na itavi bibi era vakacolati kina na qase ni ivavakoso mera ivakatawa vakayalo, e vinaka meda taroga, Era na vakadeitaka vakacava na tagane era lesi nira na sega ni vakalolomataki ira na sipi i Jisu? Ena saumi qori ena ulutaga e tarava.
[iYaloyalo ena tabana e 21]
[iYaloyalo ena tabana e 23]
Me vaka ga nona taqomaka na qelenisipi e dua na ivakatawa, o ira tale ga na qase era na taqomaka na sipi e lesi mera qarava (Raica na parakaravu 8)
[iYaloyalo ena tabana e 25]
Era na saga na qase mera taqomaki ira na vuvale itubutubu ledua mai na ilala ca (Raica na parakaravu 17, 18)