O Dau Vakaliuliu ena Veivakarokorokotaki?

“Dou veiuasiviti e na veivakarokorokotaki.”​—ROMA 12:10.

1. Na itovo cava sa yali tiko yani ena levu na vanua?

ENA so na vanua, e nodra ivakarau na gonelalai mera rokovi ira na qase ena nodra tekiduru ena veidokai nira veimaliwai tiko. Ena sala qo, era na sega ni rairai balavu cake kina vei ira na qase. Ena veivanua qori, e ivakaraitaki ni veibeci na nona vakanadaku e dua na gone vei ira na qase vua. Dina ni duidui na sala e vakaraitaki kina na vakarokoroko ena veivanua, ia na itovo qori eda lai nanuma kina na Lawa a soli vei Mosese. E okati kina na ivakaro qo: “Mo tu cake [ena veidokai] e matadra sa sika na uluna, ka doka na matadra na tamata qase.” (Vunau 19:32) Ka ni rarawa ni sa yali tiko yani na veirokorokovi ena levu na vanua. Sa laurai ga vakalevu na veibeci ena veiyasa i vuravura.

2. O cei e vakarota na Vosa ni Kalou meda rokova?

² E vakabibitaki ena Vosa ni Kalou na veirokorokovi. E vakaraitaka ni dodonu meda rokovi Jiova kei Jisu. (Joni 5:​23) Eda vakaroti tale ga meda rokovi ira na lewe ni noda vuvale, ira eda vakabauta vata, vaka kina e so ena taudaku ni ivavakoso. (Roma 12:10; Efeso 6:​1, 2; 1 Pita 2:​17) Na cava e so na sala eda na rokovi Jiova kina? Eda na vakaraitaka vakacava na vakarokoroko, se veidokai, vei ira na tacida lotu vaKarisito? Meda vakadeuca mada na taro qo kei na so tale.

Rokovi Jiova kei na Yacana

3. Na cava e dua na sala bibi eda na rokovi Jiova kina?

³ E dua na sala bibi eda na rokovi Jiova kina oya na noda doka na yacana. E tukuni mada ga ni ‘tiko vei keda na yacana.’ (Caka. 15:14) E ka dokai dina meda vakatokayacataki vua na Kalou kaukaua duadua, o Jiova. A kaya na parofita o Maika: “Ko ira kece na veimataqali era na dui muria na yaca ni nodra kalou, ia koi keda, eda na muria ga na yaca i Jiova na noda Kalou ka sega ni mudu ka sega ni mudu.” (Maika 4:5) Eda “na muria ga na yaca i Jiova” ena noda saga me vakacerecerei na yacana ena veika eda cakava e veisiga. Me vaka a vakaroti ira tale kina na lotu vaKarisito e Roma o Paula, ena beci se “dauvosavakacacataki” na yaca ni Kalou ke sega ni salavata na noda bula kei na itukutuku vinaka eda vunautaka.​—Roma 2:​21-​24.

4. Na cava na nomu rai me baleta na ilesilesi dokai ni noda vunautaki Jiova?

⁴ Eda rokovi Jiova tale ga ena noda cakacaka vakavunau. Ena gauna makawa, a sureti ira na Isireli o Jiova mera nona ivakadinadina, ia era sega ni vakayacora vakavinaka na itavi qori. (Aisea 43:​1-​12) Levu na gauna era talaidredre vei Jiova, era qai vakamosia na lomana nira “vakacudrui Koya na Yalosavasava ni Isireli.” (Same 78:​40, 41) Na kena itinitini​—a sega tale ni qai vakadonuya na matanitu ya o Jiova. Ia nikua eda marautaka na noda ilesilesi dokai nida vunautaki Jiova, meda vakatakila tale ga na yacana. Eda cakava qori baleta nida lomani koya, da qai vinakata me vakacerecerei na yacana. Sega li ni gu na lomada meda vunau nida sa kila na ka dina me baleta na Tamada vakalomalagi kei na nona inaki? Eda duavata kei na nona rai na yapositolo o Paula ni kaya: “Au sa vakacolati kina, ka sa noqu i tavi. Au sa na kalouca ke’u sega ni vunautaka na i tukutuku vinaka!”​—1 Kor. 9:​16, VV.

5. E veisemati vakacava na noda vakabauti Jiova kei na noda dokai koya?

⁵ A tukuna na daunisame o Tevita: “Era na vakararavi talega vei kemuni ko ira era sa kila na yacamuni, ko ni sa sega ni biuti ira era sa vakasaqarai kemuni, Jiova.” (Same 9:​10) Kevaka eda kilai Jiova dina, da qai doka na ibalebale ni yacana, eda na vakararavi vua me vakataki ira na nona dausokalou yalodina ena gauna makawa. O koya gona, eda rokovi Jiova tale ga nida dau vakararavi vua, qai vakabauti koya. Eda na raica ena Vosa ni Kalou ni rau veisemati vinaka na noda vakararavi vei Jiova kei na noda dokai koya. Nira sega ni vakararavi vei Jiova ena dua na gauna na lewe i Isireli makawa, a qai tarogi Mosese: “A cava tale na kena dede me ra vakacudrui [“sega ni dokai,” NW] au tiko kina na tamata oqo? ia na gauna cava era na vakabauti au kina, e na vuku ni vakatakilakila kecega ka’u sa cakava oti e na kedra maliwa?” (Tiko 14:11) Ena dina tale ga na kena veibasai. Eda vakaraitaka noda dokai Jiova nida vakararavi vua me taqomaki keda, me vakaukauataki keda tale ga ena gauna eda dau vakatovolei kina.

6. Na cava ena uqeti keda meda dokai Jiova mai vu ni lomada?

⁶ E vakaraitaka o Jisu ni dodonu me vu mai lomada na noda dokai Jiova. Ena gauna a vosa tiko kina vei ira e veivakaisini nodra sokalou, a tokaruataka o Jisu na vosa i Jiova ni kaya: “O ira na tamata oqo era sa vakarokorokotaki au e na gusudra, ia na yalodra sa yawa tani vei au.” (Maciu 15:8) Na noda lomani Jiova mai vu ni lomada ena uqeti keda meda dokai koya dina. (1 Joni 5:3) Meda dau nanuma na vosa ni yalayala i Jiova: “Ni’u na vakarokorokotaki ira era sa vakarokorokotaki au.”−1 Sam. 2:​30.

Mera Dau Veidokai O Ira na Liutaka na iVavakoso

7. (a) Na cava mera dokai ira kina na mataveitacini o ira na tacida era liutaka tiko na cakacaka ena ivavakoso? (b) Vakaraitaka vakacava o Paula nona dokai ira na tacina vakayalo?

⁷ A vakasalataki ira era vakabauta vata na yapositolo o Paula mera “veiuasiviti e na veivakarokorokotaki.” (Roma 12:10) Mera ivakaraitaki vinaka o ira na tagane lotu vaKarisito era liutaka tiko na cakacaka ena ivavakoso​—mera vakaliuliu se “veiuasiviti”​—ena nodra rokovi ira na lewe ni ivavakoso. E veiganiti gona mera muria na ivakaraitaki i Paula o ira na liutaka tiko na cakacaka bibi e so ena ivavakoso. (Wilika 1 Cesalonaika 2:​7, 8.) Era kila vinaka o ira na tagane ena ivavakoso a sikova o Paula, ni na sega ni vakaroti ira mera cakava na ka mada ga e sega ni via cakava. E dokai ira na tacina vakayalo o Paula, era qai dokai koya tale ga. Ni kaya vei ira o Paula: “O koya ka’u sa masuti kemudou kina, mo dou vakadamurimuri au,” sega ni vakabekataki ni levu era a yalorawarawa ni muria baleta ni ivakaraitaki vinaka o koya.​—1 Kor. 4:​16.

8. (a) Na cava e dua na sala bibi a dokai ratou kina na nona tisaipeli o Jisu? (b) Era na muria vakacava na ivakaraitaki i Jisu o ira na ivakatawa lotu vaKarisito nikua?

⁸ E dua tale na sala ena vakaraitaka kina na tacida tagane e liutaka tiko na cakacaka na nona dokai ira na lewe ni ivavakoso, oya na nona dau vakamacalataka na vuna e vakarota kina me caka e so na ka, se me muri na nona veidusimaki. Ni cakava qori, e sa vakatotomuri Jisu tiko. Kena ivakaraitaki, a tukuna o Jisu vei ratou na tisaipeli me ratou masuta me vakalevutaki na daucakacaka era talai ina were e sa matua, a vakamacalataka tale ga na vuna. E kaya: “Sa levu dina tu na ka me tamusuki; ia, era sa lewe lailai ga na tamata cakacaka. O koya gona, mo dou masuti koya kina na i Taukei ni were, me talai ira yani na tamata cakacaka me ra la’ki tatamusuki e na nona were.” (Maciu 9:​37, 38, VV) Ena gauna tale ga a tukuna kina vei ratou na tisaipeli me ratou ‘yadra tiko,’ a vakamacalataka na vuna. A kaya: “Ni dou sa sega ni kila na tiki-ni-siga sa lako mai kina na nomudou Turaga.” (Maciu 24:42) Ena levu na gauna, a sega wale ga ni vakamacalataka o Jisu na veika me ratou cakava na tisaipeli, ia a tukuna tale ga na vuna me ratou vakayacora kina. Ena sala ya, a dokai ratou kina qai rokovi ratou tale ga. Sa dua dina na ivakaraitaki vakasakiti mera muria na ivakatawa lotu vaKarisito!

Doka na iVavakoso i Jiova kei na iDusidusi e Vakarautaka

9. Eda sa dokai cei tale tiko ga nida doka na ivavakoso vaKarisito e veiyasai vuravura kei ira na kena mata? Vakamacalataka.

⁹ Nida rokovi Jiova, e dodonu meda rokova tale ga na ivavakoso vaKarisito e vuravura raraba kei ira na kena mata. Nida muria na ivakasala vaKarisito e vakarautaka na dauveiqaravi yalodina, eda sa doka tiko na ituvatuva i Jiova. Ena ivavakoso vaKarisito ena imatai ni senitiuri, a raica na yapositolo o Joni nira na sega ni vakadonui o ira era sega ni dokai ira na veiliutaki. (Wilika 3 Joni 9-​11.) E matata mai na vosa i Joni nira beci ira na ivakatawa, era beca tale ga nodra ivakavuvuli kei na nodra veidusimaki. E ka ni marau ni a sega ni va ya na nodra rai e levu na lotu vaKarisito. Ena gauna eratou se bula kina na yapositolo, era dau dokai ira na liutaka tiko na cakacaka na mataveitacini.​—Fpai. 2:​12.

10, 11. Vakamacalataka vakaivolatabu na vuna e donu kina mera liutaka tiko e so na cakacaka ena ivavakoso vaKarisito.

¹⁰ Era nanuma e so ni sega ni dodonu me dua e liutaka na cakacaka ena ivavakoso vaKarisito baleta ni a tukuna o Jisu vei ratou na tisaipeli nira “veitacini kece ga.” (Maciu 23:​8, VV) Ia e tu ena iVolatabu vakaIperiu kei na kena vaKirisi e levu sara na ivakaraitaki ni nona a lesi ira na tagane o Jiova mera liutaki ira e so tale. Na kedra ivolatukutuku na peteriaki, na dauveilewai, kei ira na tui Iperiu makawa e vakadinadinataka ni veidusimaki o Jiova ena nona vakayagataki ira na tamata. Ke ra sega ni rokovi na sa lesi qori, e dau vakadodonutaki ira na veibeci o Jiova.​—2 Tui 1:​2-​17; 2:​19, 23, 24.

¹¹ A tautauvata tale ga qori ena imatai ni senitiuri, era doka na lotu vaKarisito na nodra liutaka tiko na cakacaka na yapositolo. (Caka. 2:​42) Kena ivakaraitaki, nona a dusimaki ira na tacina vakayalo o Paula. (1 Kor. 16:1; 1 Ces. 4:2) Ia a vakamalumalumu tale ga o koya vei ira na tacina era liutaki koya. (Caka. 15:22; Kala. 2:​9, 10) A veiraurau dina na rai i Paula me baleta na liutaki ni cakacaka ena ivavakoso vaKarisito.

12. Na ivakaraitaki vakaivolatabu cava eda vulica kina e rua na ka me baleti ira na liutaka tiko na cakacaka?

¹² Eda vulica kina e rua na ka. Kena imatai, e yavutaki vakaivolatabu na nona veilesi na “dauveiqaravi yalo dina ka vuku,” ni vakayagataki koya na iLawalawa Dauvakatulewa me lesia e so mera qarava e so na itavi, qai lesia e so tale mera liutaki ira. (Maciu 24:​45-​47, VV; 1 Pita 5:​1-3) Kena ikarua, e bibi vei keda kece, okati kina o ira na lesi ena itavi, meda rokovi ira na liutaki keda tiko. Na cava gona e so na sala meda rokovi ira kina na liutaka tiko na cakacaka ena ivavakoso vaKarisito e vuravura raraba?

Dokai Ira na iVakatawa Dauveilakoyaki

13. Eda na dokai ira vakacava na matataka tiko na ivavakoso vaKarisito ena gauna qo?

¹³ A tukuna o Paula: “Keitou vakamasuti kemuni na veiwekani mo ni dokai ira era cakacaka tiko [“vagumatua,” NW] e na kemuni maliwa, ko ira sa digitaki ira na Turaga me ra liutaki kemuni ka dau vakatavulici kemuni. Mo ni vakarokorokotaki ira sara ka lomani ira e na vuku ni cakacaka era sa kitaka tiko. Mo ni veilomani tiko vaka i kemuni.” (1 Ces. 5:​12, 13, VV) E sega ni vakabekataki nira dau “cakacaka tiko vagumatua” na ivakatawa dauveilakoyaki. O koya gona, meda “vakarokorokotaki ira sara” vakalevu. E dua na sala eda na cakava kina qori oya na noda muria mai vu ni lomada na nodra ivakasala kei na nodra veivauqeti. Ni vakasavuya vei keda e dua na ivakatawa na idusidusi e vakarautaka na ilawalawa dauveiqaravi yalodina qai vuku, ena qai uqeti keda na “vuku maicake” meda talairawarawa se “vakamasuti rawarawa.”​—Jeme. 3:​17.

14. Era vakaraitaka vakacava na lewe ni ivavakoso nira dokai ira dina na ivakatawa dauveilakoyaki? Na cava ena yaco kina?

¹⁴ Ia vakacava ke da vakasalataki meda vakayacora na itavi e duidui sara mai na kena eda sa dau matau tu kina? Na noda veidokai ena rairai vinakati kina meda vorata e dua na ka da qai kaya, “Keimami sega ni dau cakava va qori e ke” se, “Ena yaga beka qori ena so tale na vanua, ia e sega ni ganita na neimami ivavakoso.” Dodonu meda talairawarawa ga. Ena rawarawa noda cakava qori ke da nanuma dei ni taukena o Jiova na ivavakoso, qai Ulu ni ivavakoso o Jisu. Nira muria ena marau na ivavakoso na nona ivakasala na ivakatawa dauveilakoyaki, e sa vakaraitaka tiko na veidokai dina. A vakacaucautaki ira na mataveitacini e Korinica o Paula me baleta nodra veidokai kei na nodra talairawarawa ina ivakasala i Taito, e dua na qase ni ivavakoso a veisiko yani e Korinica. (2 Kor. 7:​13-​16) Nikua, sega ni vakabekataki ni na vakaikuritaki noda marau ena cakacaka vakavunau ke da yalorawarawa meda muria na nodra veidusimaki na ivakatawa dauveilakoyaki.​—Wilika 2 Korinica 13:11.

“Doka na Tamata Kecega”

15. Na cava e so na sala eda na dokai ira kina na tacida vakayalo?

¹⁵ A vola o Paula: “Kakua ni vunauca vakaukauwa na qase, ia mo vakarota vakamalua ga me vaka vua na tamamu: vei ira na cauravou me vaka vei ira na tacimu; vei ira na yalewa qase, me vaka vua na tinamu; vei ira na goneyalewa, me vaka vei ira na ganemu, e na yalosavasava sara. Vakaraici [se “rokovi,” NW] ira na yada era sa yada dina.” (1 Tim. 5:​1-3) Io, e vakaroti keda na Vosa ni Kalou meda rokovi ira kece na lewe ni ivavakoso vaKarisito. Ia vakacava ke drau veileqaleqati kei na dua na tacimu vakayalo? Ena tarova beka qori na nomu dokai koya? Se rawa beka ni o veisautaka na nomu rai mo kauaitaka ga na nona itovo vakayalo? E bibi dina vei ira na liutaki ira tiko na tacidra vakayalo mera veidokai, mera kua vakadua ni “viavia turaga . . . vei ira na qele ni sipi.” (1 Pita 5:​3, VV) Macala ga ni dau kilai ena ivavakoso vaKarisito na nodra dau veilomani na lewena, ia e levu na sala eda rawa ni vakaraitaka kina na noda dau veirokovi.​—Wilika Joni 13:​34, 35.

16, 17. (a) Na cava e bibi kina meda dokai ira eda vunau kina kei ira tale ga na dauveitusaqati? (b) Eda na “doka” vakacava “na tamata kecega”?

¹⁶ E sega ni kena ibalebale ya ni na yalani ga na noda veidokai vei ira na lewe ni ivavakoso vaKarisito. A vola o Paula vei ira na lotu vaKarisito era bula ena gauna ya: “Ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.” (Kala. 6:​10) Ia ena rairai dredre meda cakava qori ke sega ni caka vinaka vei keda e dua eda cakacaka vata se vuli vata. Ena gauna va qori, e bibi dina meda nanuma na vosa qo: “Kakua ni ko rarawa e na vukudra nai valavala ca, se vuvutaki ira na daucaka ca.” (Same 37:1) Na noda muria na ivakasala qori ena uqeti keda meda dokai ira tale ga na dauveitusaqati. E vaka kina ena cakacaka vakavunau, noda yalomalumalumu ena uqeti keda meda vosa ena “yalomalua kei na veidokai mai vu ni lomada.” (1 Pita 3:​15, NW) Kena ikuri, na keda irairai kei na noda isulusulu e ivakaraitaki nida dokai ira eda vunau kina.

¹⁷ O koya gona, nida veimaliwai tiko kei ira na tacida vakayalo se o ira na tawavakabauta, e bibi meda saga ni muria na veivakadreti qo: “Doka na tamata kecega. Lomani ira na veiwekani [“mataveitacini,” NW]. Rerevaka na Kalou. Vakarokorokotaka na tui.”​—1 Pita 2:​17.

O na Sauma Vakacava?

Sala cava o na dokai:

• Jiova kina?

• Ira na qase ni ivavakoso kei na ivakatawa dauveilakoyaki?

• Lewe ni ivavakoso?

• Kei na so tale eda vunau vei ira?

[iYaloyalo ena tabana e 23]

Era doka na lotu vaKarisito ena imatai ni senitiuri na nodra liutaka tiko na cakacaka na ilawalawa dauvakatulewa

[iYaloyalo ena tabana e 24]

Era rokovi ira na ivakatawa dauveilakoyaki e lesia na iLawalawa Dauvakatulewa o ira na qase ni ivavakoso ena veiyasa i vuravura