E Dau Be e Dua na Luvemu?

1, 2. (a) Na vosa vakatautauvata cava a tukuna o Jisu me vakabibitaka kina nodra tawayalodina na iliuliu ni lotu Jiu? (b) Na cava eda rawa ni vulica baleti ira na itabagone ena vosa vakatautauvata nei Jisu?

NI VO e vica na siga me mate o Jisu, a tarogi ira na iliuliu ni lotu Jiu ena dua na taro momona. A kaya: “Ka cava dou lewa? Sa dua na tamata sa lewe rua na luvena-tagane; a sa lako vua sa qase, ka kaya, Na luvequ, la’ki cakacaka edaidai ki na noqu were-ni-vaini. A sa vosa ko koya, ka kaya, Au sa sega ni vinakata; ia sa qai veivutuni emuri, ka lako. Sa qai lako vua sa gone, ka vosa vakakina. A sa vosa ko koya, ka kaya, au sa lako saka; ia ka sa sega ni lako. Ko cei vei rau sa muria na loma i tamana? Era sa kaya vua, O koya sa qase.”​—Maciu 21:28-31.

² A vakabibitaka tiko ga e ke o Jisu na nodra tawayalodina na iliuliu ni lotu Jiu. Era vakataki koya na ikarua ni gone ena vosa vakatautauvata baleta era yalataka mera cakava na loma ni Kalou, ra qai sega ni cakava. Ia, era na vakadinata e levu na itubutubu ni vakaraitaka na vosa vakatautauvata oqo na nona kila vinaka o Jisu na bula vakavuvale. Me vaka e vakaraitaka, e dredre na kila na ka era vakasamataka na itabagone se na ka era na cakava. E dau vakavuleqa vakalevu beka e dua ena gauna e se gone kina, ia e qai yalomatua sara me dokai ena gauna e qase kina. Me vakasamataki oqo nida veitalanoataka na nodra dau be na gone.

O CEI NA GONE BE?

3. Na cava me rau kua ni nanuma vakariri kina na itubutubu ni gone be o luvedrau?

³ Ena so na gauna, o dau rogoca beka nodra vorati nodra itubutubu na itabagone. Rairai o kila e dua na vuvale e tiko kina e dua na itabagone e dau cike. Ia, e dredre me kilai se dau be dina e dua na gone se sega. E dredre tale ga me kilai na vuna e dau be kina e so na gone, ia e sega e so​—ke ra mani veitacini sara. Ke nanuma na itubutubu ni na rairai be o luvena, na cava me cakava? Me saumi oqo, da raica mada na ibalebale ni noda dau tukuna ni gone be e dua.

4-6. (a) O cei na gone be? (b) Na cava me rau nanuma na itubutubu ke talaidredre ena so na gauna na luvedrau itabagone?

⁴ O koya e be e dau nakita me talaidredre, me beca se vorata na lewa. Sa macala ni “ka lialia sa vauci e lomana na gone.” (Vosa Vakaibalebale 22:15) Era na vorata gona na gone kece ena so na gauna na nodra lewa na itubutubu, se nodra lewa e so tale. E dina sara ga oqo ena gauna era vakila tiko kina na veisau ni bula vakacauravou se goneyalewa. Dau vakatubu lomaleqa ni veisau nona bula e dua vei keda, qai gauna sara ga ni veisau na gauna ni bula vakacauravou se goneyalewa. Sa veisau tiko o koya mai na dua na gone me dua na qase. Oqo na vuna e dau dredre kina mera veiyaloni e so na itubutubu kei ira na luvedra itabagone. Ena gauna ni veisau oqo, era dau via tarova na veisau na itubutubu, ia era dau via vakatotolotaka na itabagone.

⁵ Na itabagone e dau be e cata na ka e bibi vei rau na nona itubutubu. Ia, nanuma e sega ni dau be e dua ke talaidredre vakavica ga. De na sega tale ga ni via taleitaka mada o gone na ka dina ena iVolatabu, ia e sega ni kena ibalebale sara ni gone be. Ke o itubutubu, kua ni totolo nomu nanumi ira vakaca na luvemu.

⁶ Era dau vorati ira beka na nodra itubutubu na gone kece ga nira bula vakacauravou se goneyalewa? Sega sara. E vakadinadinataki nira dau be e dua na iwiliwili lailai ga ni gone. Ia, vakacava ke nakita e dua na gone me be e veigauna? Na cava beka e vakavuna?

NA VU NI BE

7. E rawa ni veirawai vakacava na ivakarau vakasetani oqo mera dau be kina na gone?

⁷ E dua na vu ni be oya na ivakarau vakasetani ni vuravura oqo. “Sa koto ga vua na vu-ni-ca ko ira kecega na kai vuravura.” (1 Joni 5:19) Sa dodonu mera vorata na lotu Vakarisito na ivakarau ni bula voravora ena vuravura e lewa tu oqo o Setani. (Joni 17:15) Sa vakasisila, vakadomobula, qai ca ga vakalevu na ivakarau ni bula ena gauna oqo. (2 Timoci 3:1-5, 13) Ke ra sega ni vakavulici luvedra na itubutubu, mera vakasalataki ira ra qai taqomaki ira, ena rawarawa sara nodra rawai na gone mai na “yalo sa cakacaka tiko e lomadra era sa dautalaidredre.” (Efeso 2:2) Qai kena ikuri na veimurimuri vakaitaba vata. E kaya na iVolatabu: “Ko koya era veitokani vata kei na lialia ena rusa.” (Vosa Vakaibalebale 13:20) Ena rawarawa gona nodra rawai o ira era dau ilala vata kei ira e rawai ira tu na yalo ni vuravura oqo. Sa dodonu mera na dau vukei na itabagone me rawa nira kila ni yavu duadua ga ni bula vinaka oya nodra talairawarawa ina ivakavuvuli vakalou.​—Aisea 48:17, 18.

8. Na cava soti ena rairai vakavuna me dau be na gone?

⁸ Dua tale na vu ni nona dau be na gone oya na ivakarau ni bula e vale. Kaya mada ke dau gunu e dua na itubutubu, dau vakayagataka na wainimate gaga, se dau mokuti kena isa. Ena rawa ni vakatanitaka oqo na nona rai na itabagone. Ena vuvale mada ga e vaka mera veiyaloni na lewena, ena rairai be o gone ke nanuma ni rau sega ni kauaitaki koya nona itubutubu. Ia, e sega ni dau tekivu ga vaka oqo na nodra be na itabagone. E so na ka e dau bibi vei ira nodra itubutubu era cata na gone, dina ga nira muria na nodra qase na ivakavuvuli vakalou ra qai saga mera taqomaki luvedra mai na vuravura era bula kina. Na cava era vaka kina oqo e so na gone? Ena vuku beka ni dua tale na vu ni noda leqa​—nida kawa ivalavala ca. E kaya o Paula: “Me vaka sa curu ki vuravura nai valavala ca e na vuku ni tamata e lewe dua [Atama], kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:12) E dua na dau be lomaca o Atama, qai vakadewa oqo vei ira kece na nona kawa. E so gona na itabagone era vinakata mera dau be, me vakataki Atama ga.

VEIVAKADEMENI O ILAI, YALODREDRE O RIOPOAMI

9. Ni susugi e dua na gone, na cava e rua na ka ca e rawa ni vakavuna na be?

⁹ E dua tale na vu ni nodra dau be na itabagone oya ni sega ni dodonu nodra rai na itubutubu nira susugi luvedra. (Kolosa 3:21) E so na itubutubu gugumatua e dau vesuki luvedra qai kaukaua nodra veivakadodonutaki. E so tale era veivakademeni, ra sega ni kotora na idusidusi me taqomaki kina o luvedra nira se yalowai na gone. E sega ni rawarawa na lewa na iwalewale ni veisusu ena veirauti vinaka. Era duidui na gone, e duidui tale ga na ka me caka vei ira. Ena dusimaki beka vakalevu e dua mai na dua tale. Ia, na kedrau ivakaraitaki e rua ena iVolatabu e vakaraitaka ni ca na yalodredre, e ca tale ga na veivakademeni.

10. E dina ni rairai dua na bete yalodina o Ilai, ia na cava e sega ni itubutubu vinaka kina?

¹⁰ A dua na tama o Ilai, na bete levu e Isireli makawa. E veiqaravi me 40 na yabaki, sega ni vakabekataki ni buta vinaka ena Lawa ni Kalou. Rairai qarava ena yalodina na nona itavi vakabete, de a vakavulici rau sara vakavinaka na luvena tagane o Ofinai kei Finiase ena Lawa ni Kalou. Ia, e vakademeni rau na luvena o Ilai. E dina ni rau bete tale ga na luvena, ia erau “sa luve ni vu-ni-ca,” e bibi ga vei rau na ketedrau kei na nodrau garosa. Qai gauna rau cakava kina na itovo tawakilikili ena vale tabu, a rere ni vakasivoi rau o Ilai. A cudruvi rau, ia e yacana wale ga. Ena nona veivakademeni, e dokai rau vakalevu na luvena o Ilai, e lailai nona doka na Kalou. Oya na vuna erau beca kina na sokalou savasava i Jiova na luve i Ilai, qai kalouca kina na nona matavuvale.​—1 Samuela 2:12-17, 22-25, 29; 3:13, 14; 4:11-22.

11. Na cava era rawa ni vulica na itubutubu mai na ivakaraitaki ca nei Ilai?

¹¹ E qai yaco oqo ni rau sa qase na luve i Ilai. Ia, e vakaraitaka ga na ca ni nodra sega ni vakadodonutaki na gone. (Vakatauvatana Vosa Vakaibalebale 29:21, NW.) Era nanuma e so na itubutubu nira lomani luvedra ke ra vakademeni ira, ra sega ni kotora kina na lawa e matata, e veiganiti, ra qai sega tale ga ni raica me muri e veigauna na veilawa oqo. Era sega ni veivakadodonutaki ena loloma, ke beci mada ga na ivakavuvuli vakalou. Ena veivakademeni vaka oqo, era yaco kina na gone mera sega ni dau via rogoca nodra lewa na itubutubu se lewa nei cei tale.​—Vakatauvatana Dauvunau 8:11.

12. A lewa cala vakacava o Riopoami?

¹² O Riopoami e vakaraitaka e duatani sara na mataqali vakatulewa. E iotioti ni tui o koya ena matanitu duavata o Isireli, ia a sega ni tui vinaka. E mai lewa o Riopoami ena gauna era sa vakacauoca kina na lewenivanua ena vuku ni icolacola bibi a vakacolata vei ira na tamana o Solomoni. A lomani ira beka o Riopoami? Sega. Era kerei koya na mata ni lewenivanua me kau tani e so na icolacola bibi oqo, ia a bese ni rogoca o Riopoami na nodra ivakasala na nona daunivakasala qase. A vakarota ga me vakalevutaki tale na nodra icolacola na lewenivanua. Ena nona viavialevu, era be na mataqali e tini ena vualiku kei Isireli, mani wase rua kina na matanitu.​—1 Tui 12:1-21; 2 Veigauna 10:19.

13. Mera kua ni leqa na itubutubu ena cala nei Riopoami, na cava mera cakava?

¹³ E levu na ka bibi era vulica na itubutubu ena italanoa kei Riopoami ena iVolatabu. Sa dodonu mera “vakasaqarai Jiova” ena masu ra qai raica me salavata tiko na iwalewale ni nodra susu gone kei na ivakavuvuli ena iVolatabu. (Same 105:4) “Na veivakasaurarataki sa vukica na tamata vuku me tamata lialia,” e kaya na Dauvunau 7:7. Ke vakasamataki vinaka na idusidusi mera muria na gone nira tubu tiko, ena vinaka vei ira ra qai taqomaki tale ga kina. Mera kua ga ni bula na gone ena vuvale e dredre, me sega ni soli vei ira na galala. Ena rawa ni vakavuna oqo mera na bula vakararavi na gone kei na nodra beci ira vakataki ira. Ke ra saga gona na itubutubu me rauta vinaka nodra solia na galala vei luvedra ra qai vakamatatataka na ka e rawa ni caka kei na ka me kua ni caka, era na rairai sega ni via be na itabagone.

SEGA NA BE KE RA QARAVI VINAKA

14, 15. Mera raica vakacava na itubutubu na nodra tubu tiko na luvedra?

¹⁴ E dina nira marautaka na itubutubu na nodra sa qase cake na luvedra, ia era na rairai leqataka nodra sa sega ni via vakararavi vakalevu na gone, mera sa nuitaki ira ga. Sa dodonu ga mera cakava oqo na gone ena gauna veiganiti. Ena gauna ni veisau oqo, kua ni kurabui ke dau yalodredre se sega ni veitokoni ena so na gauna o luvemu itabagone. Nanuma tiko ni nona isausau na itubutubu lotu Vakarisito me susuga e dua na gone me lotu Vakarisito matua qai nuitaki.​—Vakatauvatana 1 Korinica 13:11; Efeso 4:13, 14.

¹⁵ De dredre beka, ia mera na tovolea na itubutubu mera kua ni via vosasuruya ena gauna kece na nodra dau kerea na luvedra itabagone me soli vakalevu vei ira na galala. Ena veituberi yalomatua, me na dau soli vua na galala me vakatulewataka vakataki koya e so na ka. Sa dau kune sara mada ga na rai vakayalomatua vei ira e so na itabagone. Me kena ivakaraitaki, e kaya na iVolatabu me baleti Tui Josaia: “Sa vakatekivu ko koya me vakasaqara na Kalou i Tevita . . . ni sa gone tiko [rauta ni yabaki 15].” A yalomatua dina na itabagone vinaka oqo.​—2 Veigauna 34:1-3.

16. Ni soli na galala vei ira na gone, na cava me vakalaivi mera sotava?

¹⁶ Ia, na galala e tiko vata kaya na kena icolacola. O koya gona, ni tamatabula tiko mai o luvemu, laiva me vakila na vinaka se ca ni so na ka e lewa se cakava. Na ivakavuvuli, “na ka kecega sa kaburaka na tamata ena tamusuka talega,” e dina tale ga vei ira na itabagone, sega ni dina ga vei ira na qase. (Kalatia 6:7) E sega ni rawa nira vesu tu ga na gone me tawamudu. Ia vakacava ke via cakava o luvemu na ka e sega sara ga ni dodonu? Ni o itubutubu yalomatua, mo kaya, “Sega.” De o na vakamacalataka na vuna, ia me kua vakadua ni veisau na sega oqori me io. (Vakatauvatana Maciu 5:37.) Ia, tovolea mo kua ni cudru ni o tukuna na “Sega,” baleta na “vosa vakayalovinaka sai vakamalumu ni cudru.”​—Vosa Vakaibalebale 15:1.

17. Na cava soti na ka mera qarava vinaka na itubutubu me baleti luvedra itabagone?

¹⁷ Ena vinaka vei ira na itabagone ke ra kila ni na sega ni veiveisau na lawa se ka era vakatabui kina, ke ra sega mada ga ni vinakata na lawa se ka e vakatabui oqori. E votivoti dina ke veiveisau na lawa, me vakatau ga ena ka erau nanuma ena gauna oya na itubutubu. Ke ra dau uqeti tale ga ra qai vukei na itabagone ena gauna e gadrevi kina, me vorati nodra mamadua, se nodra beci ira vakataki ira, era na tubu mera yalomatua. Era na taleitaka tale ga na itabagone ke nuitaki ira o nodra itubutubu ena ka vinaka era cakava.​—Vakatauvatana Aisea 35:3, 4; Luke 16:10; 19:17.

18. Na cava e so na ka dina me baleti ira na itabagone e vakayaloqaqataki keda?

¹⁸ Era na vakacegu na itubutubu ena nodra kila nira na vinaka na gone ke rau dau veivakacegui, yalomatua, qai veilomani. (Efeso 4:31, 32; Jemesa 3:17, 18) E so na gone e dredre dina na bula era susugi mai kina, nira daugunu, ivakarau kaukaua, se ivalavala dau veivakaleqai tale vaka oya na lewe ni nodra vuvale. Ia, era yaco ga mera tamata vinaka ena gauna era qase kina. Koya gona, ke o qarauna nomu vuvale me vanua e lomavakacegu kina o luvemu itabagone, me kila ni oya na vanua e lomani, e nanumi, qai kauaitaki kina​—dina ga ni kila o koya ni na vakadodonutaki qai tiko na ka e sega ni vakatarai vua me cakava me salavata kei na ivakavuvuli ena iVolatabu​—ena rairai tubu na luvemu oqori me dua o na dau sakitaka mai muri.​—Vakatauvatana Vosa Vakaibalebale 27:11.

NIRA CALA NA GONE

19. Dina ni dodonu me vakavulici luvena na itubutubu ena sala me muria, ia na cava e nona itavi na gone?

¹⁹ E bibi dina na ivakarau ni veisusu e vinaka. E kaya na Vosa Vakaibalebale 22:6: “Vakatavulica na gone e na sala e dodonu me lako kina: Ia ni sa qase mai, ena sega ni lako tani maikina.” Ia, vakacava ke ra caka cala na gone dina ga ni rau vinaka na itubutubu? E rawa ni yaco oqo? Io. Na vosa vakaibalebale oqo e dodonu me vakasamataki vata kei na veitikina e vakabibitaki kina ni nodra itavi na gone mera “vakarorogo” ra qai talairawarawa vei ira nodra itubutubu. (Vosa Vakaibalebale 1:8) Me vinaka na bula ni vuvale, e dodonu me ratou veitokonitaka na itubutubu kei na luvedrau na muri ni ivakavuvuli ena iVolatabu. Ena tubu na leqa ke ratou sega ni cakacaka vata na itubutubu kei luvedrau.

20. Nira cala na gone ena nodra yalowai, na ka vukutaki cava mera cakava na itubutubu?

²⁰ Na cava mera cakava na itubutubu ke cala o luvedra itabagone? Oqo sara ga na gauna me vukei kina o gone. Ena rawa ni seavu nodra cudru na itubutubu ke ra nanuma nira vukea tiko e dua na itabagone e se sega sara ni yalomatua. A vakasalataki ira na tamata matua ena ivavakoso o Paula: “Kevaka sa vakidacalataki e dua na tamata mei valavala ca, mo dou vakavinakataki koya e na yalo malumalumu, oi kemudou sa vakayalo.” (Kalatia 6:1) Mera muria tale ga na iwalewale oqo na itubutubu ke cala o luvedra ena vuku ni yalowai. Ni vakamacalataka vakamatata na itubutubu na vuna e cala kina na ka e cakava o luvena qai vakaraitaka na sala me kua ni cakava tale kina, me vakamatatataka ni sega ni ca o gone, e ca ga na nona itovo.​—Vakatauvatana Juta 22, 23.

21. Me vaka e dau caka ena ivavakoso vakarisito, na cava me rau cakava na itubutubu ke cala bibi na luvedrau?

²¹ Vakacava ke cala bibi e dua na gone? Ena gadrevi sara ga me vukei vakayalomatua, me dusimaki vakamaqosa. Ni cala bibi e dua na lewe ni ivavakoso, ena uqeti me veivutuni me qai kerea nodratou veivuke na qase. (Jemesa 5:14-16) Ni sa veivutuni, eratou na qai vukei koya na qase me vinaka tale vakayalo. Ena vuvale, e nodrau itavi na itubutubu me rau vukei luvedrau ke cala, dina ni rau na veivosakitaka beka kei iratou na qase. E sega ga ni dodonu me vunitaki vei iratou na ilawalawa qase na nona cala bibi na gone.

22. Me vakataki Jiova, na cava me rau nanuma na itubutubu ke cala bibi na luvedrau?

²² E ka ni veivakatovolei dina ke cala bibi e dua na gone. Ena levu ni nodrau rarawa, de rau na via cudruvi luvedrau e lako sese na itubutubu, me rau vakarerei luvedrau. Ia, ena yalorarawa ga na gone ke rau cakava oqo. Nanuma tiko de vakatau na nona bula mai muri ena nomu ivalavala vua ena gauna dredre oqo. Kua ni guilecava tale ga ni dau tu vakarau o Jiova me vosoti ira na nona tamata nira sega ni caka dodonu​—ke ra veivutuni. Rogoca na nona vakamamasu: “Dou mada mai, me tou veivosaki vata, sa kaya ko Jiova; ke sa vaka na ka kulakula na nomudoui valavala ca, sa na vulavula me vaka na uca-vulavula; ke sa damuvakula sa na vaka na vutika ni sipi.” (Aisea 1:18) Sa dua na ivakaraitaki totoka vei ira na itubutubu!

23. Ni cala bibi e dua na gone, na cava me cakava na nona itubutubu? Na cava me kua ni cakava?

²³ Dau saga gona mo uqeti luvemu lako sese oqori me veisautaka nona ivalavala. Dau kerea nodra ivakasala na itubutubu matua kei ira na qase ni ivavakoso. (Vosa Vakaibalebale 11:14, NW) Saga mo kua ni dau yalototolo, se tukuna, se cakava e dua na ka me dredre ni lesuvi iko tale kina o luvemu. Kua ni yalokatakata se lomaca. (Kolosa 3:8) Kua ni soro totolo. (1 Korinica 13:4, 7) Dina ni o cata na ka ca, kua ga ni o cati luvemu se sevaki koya. Kena ilutua, mera saga na itubutubu mera ivakaraitaki vinaka, ra qarauna tale ga me qaqaco vinaka tiko ga nodra vakabauta.

KA ME CAKA NI BE TIKO GA E DUA

24. Na ka rarawataki cava beka ena sotava e dua na vuvale lotu Vakarisito? Na cava me rau cakava kina na itubutubu?

²⁴ Ena so na gauna, sa na nakita ga me be e dua na itabagone, sa cata cata matua na itovo vakarisito. Ke yaco oqo, me ratou qai qarauni se vukei o iratou na vo ni gone. Qarauna mo kua ni solia na nomu igu taucoko me baleti koya e be, me ratou vakawaleni kina na vo ni luvemu. Kua ni vunitaka vei iratou e vale na ka me baleti koya e be oya. Tukuna vei iratou na ka e yaco, sega ni gadrevi me tukuni sara vakamatailalai. Vakayaloqaqataki iratou tale ga.​—Vakatauvatana Vosa Vakaibalebale 20:18.

25. (a) Me vaka e dau caka ena ivavakoso vakarisito, na cava ena rairai lewa na itubutubu ke sa via be ga na luvena? (b) Na cava me nanuma na itubutubu ke dau be na luvena?

²⁵ Me baleta e dua e sa sega sara ga ni vukei rawa ena nona dau be ena ivavakoso, e kaya kina na yapositolo o Joni: “Kakua ni vakacurumi koya ki vale se vosa vakalougatataki koya.” (2 Joni 10, VV) De na lewa na itubutubu me muria tale ga oqo ke sa nakita me dau be e dua na luvena sa yacova na yabaki ni bula e tara kina vakalawa me lewai koya vakataki koya. E dredre qai kaukaua beka oqo, ia sa na gadrevi me caka ena so na gauna me ratou taqomaki kina na vo ni vuvale. E bibi mo taqomaki iratou e vale, mo liutaki iratou tale ga. Koya gona, me tiko ga na ka o vakatara kei na ka o sega ni vakatara vei iratou e vale, ia me vakamacalataki vakamatata oqo. Me kua tale ga ni vakatabui vakasivia na ka. Dau veivosaki kei iratou na vo ni gone. Dau kauaitaka nodratou itosotoso e koronivuli kei na ivavakoso. Vakaraitaka tale ga vei iratou ni o sega ni cati luvemu e be oya, o sega ni vakadonuya ga na itovo ni dau be. Cata na itovo ca, kua ni cati luvemu. Ni sevaki na vuvale i Jekope ena vuku ni nodrau ivakarau tawaloloma na luvena tagane, a sega ni cati rau na luvena o Jekope, a cata ga nodrau itovo voravora.​—Vakatekivu 34:1-31; 49:5-7.

26. Na cava ena vu ni vakacegu vua na itubutubu gugumatua ke be e dua na luvena?

²⁶ O na rairai bilitaki iko ena ka e sotava nomu vuvale. Ia ke o sa cakava kece na ka o rawa ni cakava, nomu muria na ivakasala i Jiova ena nomu maqosa taucoko, e sega ni dodonu mo bilitaki iko sara. Mo kila ni sega ni dua na itubutubu e uasivi, ia o a saga mo dua na itubutubu vinaka. Ena vakacegui iko oqo. (Vakatauvatana Cakacaka 20:26.) E vakamosi yalo dina ke dau be e dua e vale. Ia ke yaco e nomu vuvale oqo, nanuma ni kila o Jiova na ituvaki o sotava, ena sega vakadua ni laivi ira na nona tamata yalodina. (Same 27:10) Koya gona, saga mo qarauna nomu vale me itataqomaki, me ivakavakacegu vakayalo vei iratou na vo ni luvemu.

27. Ena vuku ni vosa vakatautauvata baleta na gone cidroi, na cava me nuitaka na itubutubu e be na luvena?

²⁷ Mo kua tale ga ni yalolailai. De dua ena kilai yalona tale na luvemu e lako sese oqo ena nona nanuma lesu na nomu sasaga mo vakavulici koya vinaka. (Dauvunau 11:6) Era sotava tale ga e so na vuvale lotu Vakarisito na leqa o sotava tiko. E so vei ira a lesu tale mai na luvedra a lako sese, me vaka ga a sotava o koya na tama ni gone cidroi ena vosa vakatautauvata i Jisu. (Luke 15:11-32) De na yaco tale ga oqo vei iko.