Me Veisoliyaki ena Tiseba na Tikidua iTukutuku ni Matanitu Nb. 38!
1. Na cava era lomatarotarotaka e levu me baleti ira na mate, ena saumi vakacava qori ena Tiseba?
1 Se mani lotu cava eda lewena, e keda meca kece o mate. (1 Kor. 15:26) E levu era lomatarotarotaka na vanua era tu kina na mate, era na sotavi ira tale se sega. Na ivavakoso kece e veiyasa i vuravura era na veisoliyaka gona ena loma ni dua na vula na tikidua iTukutuku ni Matanitu Nb. 38, kena ulutaga “Era na Bula Tale na Mate?” Na cakacaka lavotaki qo ena tekivu ena 1 ni Tiseba. Ni oti na cakacaka lavotaki ni kena veisoliyaki na tikidua iTukutuku ni Matanitu Nb. 38, me qai vakayagataki na tikidua qori ena cakacaka vakaitalatala.
2. E vakarautaki vakacava na tikidua iTukutuku ni Matanitu Nb. 38?
2 Kena Vakarautaki: Na tikidua iTukutuku ni Matanitu Nb. 38, e vakarautaki me lobi vakabalavu, me laurai e liu na ulutaga veiuqeti kei na taro “O na sauma vakacava . . . io? sega? de dua?” Ni cega o itaukeinivale na tikidua iTukutuku ni Matanitu, ena raica na ka e kaya na iVolatabu me isau ni taro ni ulutaga, ena raica na yaga ni ka e yalataka na iVolatabu, kei na vuna me vakabauti kina. E tiko ena daku ni tikidua qori e dua na taro vakavure vakasama, ena uqeti koya tale ga me vulica e levu tale na ka.
3. Ena veisoliyaki vakacava na tikidua iTukutuku ni Matanitu Nb. 38?
3 Kena Veisoliyaki: Na veisoliyaki ni tikidua qo ena vaka ga na veisoliyaki ni ivola ni veisureti ni iVakananumi kei na soqo ni tikina. Era na veidusimaki na qase ni ivavakoso ena sala me tarai kina na yalava, ena salavata qori kei na ivola a ciqomi ena 1 Epereli, 2013. O ira na ivavakoso e lailai nodra yalava e rawa nira vukei ira na ivavakoso voleka e levu nodra yalava. Ni yaco yani na tikidua iTukutuku ni Matanitu Nb. 38, mo taura ga na kena o rawa ni solia ena dua na macawa. Ke sa tarai oti na yalava kece, e rawa ni veisoliyaki na tikidua ena vunau tawalokuci. Ia ke sa oti na tikidua ni bera ni cava na vula lavotaki, me soli na ivola Na Cava Sara Mada e Kaya na iVolatabu? Ena imatai ni Vakarauwai ni vula lavotaki qo, eda na sega ni veisureti kina vakadodonu ena tauyavu ni vuli iVolatabu, ia eda na veisoliyaka tiko kina na tikidua. Meda solia tale ga ena muanimacawa na mekesini ke veiganiti. Vakacava o na tuvanaka mo vakaitavi vakalevu ena cakacaka lavotaki qo?