Uqeta me Namaki na Tikinivolatabu

NA VEIVAKAVULICI e dau caka ena soqoni e yavutaki kece ga mai na iVolatabu. Na noda ivakamacala tale ga ena cakacaka vakavunau e yavutaki mai na iVolatabu. Ia, na yaga ni tikinivolatabu eda taurivaka ena noda ivakamacala e vakatau vakalevu ena veivosa eda cavuta ni bera nida wilika.

Kua ni nanuma ni sa veirauti na nomu cavuta na tikinivolatabu kei na nomu kerei koya e rogoci iko tiko me vakamuri iko ena nomu wiliwili. E bibi me dua nomu ivakamacala lekaleka ni bera nomu wiliwili, ia na ivakamacala oqo me rua na kena inaki: (1) uqeta me namaki na tikinivolatabu, (2) vakaraitaka na vuna e wiliki kina. Vica na ka e rawa ni caka me rawati kina oqo.

Taro. Dau totoka sara na kena iwalewale oqo ke se bera nira kila na vakarorogo na kena isau. Bulia na nomu taro me vakavure vakasama. E dau cakava oqo o Jisu. Nira lakovi koya mai ena valenisoro na Farisi ena nodra via vakatovolea nona kila na iVolatabu, e qai tarogi ira o Jisu: “A cava dou nanuma me baleta na Karisito. Na luve i cei ko koya?” Era qai sauma: “Na luve i Tevita.” E qai taroga o Jisu: “Ia sa qai vakatokai koya rawa ga vakacava ko Tevita e na Yalo Tabu, me Turaga?” Oti oya, sa qai cavuta na ka e volai ena Same 110:1. Era galu vakadua na Farisi. Ia, o ira na lewe vuqa era sa qai vakarogoci Jisu ga vakavinaka.—Maciu 22:41-46, VV.

Rawa ni o vakayagataka tale ga na taro vaka oqo ena cakacaka vakavunau, kaya mada me vaka oqo: “O kemuni, vaka kina o yau, e tiko na dui yacadaru. Vakacava na Kalou, e tiko na yacana? Daru na raica na kena isau ena Same 83:18.” “Ena liutaka beka na matatamata kece e dua bau ga na matanitu? Raica se sauma vakacava na taro qo na Taniela 2:44.” “E tukuna beka na iVolatabu na veika eda sa sotava sara tu ga ena gauna qo? Vakatauvatana mada na veika o raica ni sa yaco tu nikua kei na ka e kaya na 2 Timoci 3:1-5.” “Dua beka na gauna sa na sega tale na rarawa kei na mate? E sauma na iVolatabu na taro qo ena Vakatakila 21:4, 5.”

Na vakayagataki vinaka ni taro ni bera na wiliki ni tikinivolatabu ena vunau soqovi levu ena uqeti ira na vakarorogo mera via raica sara ga na tikinivolatabu e cavuti, e dina nira sa dau wilika wasoma. Ia, era na raica dina? Era na raica ke tara na nodra bula se vakavure vakasama vei ira na taro o taroga. Ia, e so na vakarorogo ena ciriyawa ga nodra vakasama ke o wilika e dua na tikinivolatabu era sa dau rogoca vakalevu, veitalia sara ke veilauti na nomu ivakamacala. Me kua ni yaco oqo, e dodonu mo vakasamataka na sala e so me kamikamica tiko ga kina nomu ivakamacala.

Tukuna e Dua na Leqa. O na via tukuna beka e dua na leqa, oti o qai kauta cake mai e dua na tikinivolatabu e rawa ni bau veivuke ena kena wali. Ia, kua ni tukuna ni oqo e sa na kena iwali sara ga. Vakalevu me sega ni vakaraitaka na iwali taucoko ni dua na leqa e dua ga na tikinivolatabu. Ia, o rawa ni tarogi ira na vakarorogo mera raica se idusidusi cava mai na tikinivolatabu o wilika e rawa ni vukei ira.

O na rawa tale beka ga ni cavuta e dua na ivakavuvuli vakarisito, o qai vakayagataka e dua na italanoa mai na iVolatabu mo vakaraitaka kina na yaga ni kena muri. Ke tiko ena tikinivolatabu e rua (se sivia) na tikina e baleta sara ga na ka e veivosakitaki tiko, e so era dau tarogi ira na vakarorogo mera vaqara na veitikina oqo. Ke via dredre vei ira na vakarogoci iko mera raica na iwali ni leqa o kauta cake mai, o rawa ni uqeti ira mera vakasama ena nomu vakaraitaka vei ira e vica na ka, o qai laiva na tikinivolatabu o wilika kei na kena ivakamacala, me vukei ira ena nodra digia na kena isau dodonu.

Me Vosa ga na iVolatabu. Ke sa tekivu rawa na nomu ivakamacala ena kena iwalewale veivakauqeti ena nomu kauta cake mai e dua se vica na vakasama, e rawa mo vakamacalataka na tikinivolatabu o vakarau wilika ena nomu kaya: “Dikeva na ka e kaya na Vosa ni Kalou ena tikina qo.” Ni o cakava oqo, o sa vakaraitaka na vuna me kua ni veibataki tale kina na ka o wilika.

O Jiova e vakayagataki ira na tagane me vakataki Joni, Luke, Paula, kei Pita, mera vola e so na iwase ni iVolatabu. Ia era volavola wale ga, na ka era vola e nona na Kalou, e sega ni nodra. Nida veivosaki kei ira e so era sega ni vulica na iVolatabu, ena sega beka ni vinaka meda kaya nida vakarau wilika e dua na tikinivolatabu, “e vola o Pita” se “kaya o Paula.” E vinaka cake meda kaya ni ka era wilika e Vosa ni Kalou. E ivakaraitaki ena tikina oqo o Jiova ena nona vakaroti Jeremaia me kaya: “Dou rogoca na vosa i Jiova.” (Jere. 7:2; 17:20; 19:3; 22:2) Se da vakayagataka na yaca i Jiova ena noda ivakamacala ni bera nida wilika e dua na tikinivolatabu se sega, ni bera ni cava noda veivosaki, meda saga meda vakaraitaka ni ka e volai ena iVolatabu e nona vosa.

Kila na Veika O na Vakamacalataka. Dodonu mo kila vinaka na veika e baleta e dua na tikinivolatabu ni bera ni o biuta e dua na kena ivakamacala ni o vakarau wilika. Ke sega, e rawa ni veivakacalai na ka o tukuna. Kena ivakaraitaki, ena tautauvata beka na vosa o cavuta ni bera ni o wilika na vosa i Jope, kei na nodratou vosa na dau veivakacegui vakailasu? E vola o Luke na Cakacaka, ia e vola tale ga na nodra vosa e so me vakataki Jemesa, Pita, Paula, Filipi, Sitiveni, ira na agilosi, vaka kina o Kamelieli kei na so tale na Jiu era sega ni lotu Vakarisito. Ni o wilika na nodra vosa o ira oqo, o na kaya ni vosa nei cei? Kua tale ga ni guilecava ni sega ni vola kece na Same o Tevita, e sega tale ga ni vola taucoko na Vosa Vakaibalebale o Solomoni. E yaga tale ga mo kila se volavola tiko vei cei o koya na dauvola iVolatabu, kei na ulutaga e vakamacala tiko kina.

Vakamacalataka e So na Kena iTukutuku. E mana vakalevu oqo ke o vakaraitaka rawa ni ituvaki a yaco tu ena gauna e volai kina e dua na tikinivolatabu e tautauvata sara ga kei na ituvaki o veivosakitaka tiko. So tale na gauna, e yaga mo kila na ituvaki e volai kina e dua na tikinivolatabu me vakarawarawataka nomu kila na kena ibalebale. Me kena ivakaraitaki, ke o vakayagataka na Iperiu 9:12, 24 ena nomu vunau mo vakamacalataka kina na ivoli e vakarautaka o Karisito, o na via vakamacalataka beka vakalekaleka na valeniveitavaki kei na loqitabu sara e vakatakarakarataka na vanua e curuma yani o Jisu ni sa cabe i lomalagi. Ia, me kua ni sivia tale na ka o vakamacalataka me baleta e dua na tikinivolatabu de lai buawa tale kina na kena ibalebale.

Rawa ni veivakauqeti tale ga na vosa o cavuta ni bera ni o wilika e dua na tikinivolatabu ke o vakamuria na ka era dau cakava na kenadau ena vosa. Dikeva na iwalewale era dui vakayagataka. Vakalewa na kena iwalewale e mana. Ni o vakarautaka nomu vunau, vakatakilakilataki ira na tikinivolatabu bibi kece, me matata vei iko na vuna o digitaki ira kina kei na kedra dui inaki. Veinanuyaka vinaka na vosa momona o na cavuta ni bera ni o wilika na tikinivolatabu yadua, me rawa ni yaga taucoko sara na nomu vakayagataka. Ni o sa rawata, qai vakayagataka tale ga na iwalewale oqo vei ira na tikinivolatabu kece o na vakayagataka. O sa na dau dusimaki ira vakalevu na rogoci iko ina Vosa ni Kalou ni o sa na kenadau mai ena kena iwalewale oqo.