ULUTAGA LEVU | VEIVAKABULAI O JISU—MAI NA CAVA?
Vu ni Noda Vakabulai
“A tamata sa sucu maivua na yalewa sa vica walega na nona siga, ka sa vutu ni rarawa. Sa tubu mai ko koya me vaka na se ni kau, ka sa tamusuki tale: Sa dro talega me vaka na yaloyalo, ka sa sega ni tiko dei.”—Jope 14:1, 2.
E levu ena veiyabaki sa sivi era dau diva mera bulabula, ra gonegone tu ga, ra bula balavu tale ga. Ia ka ni rarawa nida na mate kece. E dina kina nikua na vosa e cavuta qori o Jope ena sivia na tolu na udolu na yabaki sa oti.
E noda gagadre kece meda bula tiko ga. Kaya na iVolatabu ni buli keda na Kalou me tiko vei keda na gagadre qori. (Dauvunau 3:11) E sega sara ga ni vakasama vakayalomatua ke biuta vei keda na Kalou dauloloma na gagadre qori, oti da qai mate tale. E vakatokai kina ena iVolatabu o mate me meca, e yalataka tale ga ni na “vakamalumalumutaki” se vakaoti.—1 Korinica 15:26.
Matata vakasigalevu ni keda meca kece o mate, koya tale ga e bulabula vinaka tu ena sega ni via mate. Gauna eda kila kina ni vakarau yaco e dua na leqa, eda sasaga meda vuni se dro, vaka ga noda vaqara wainimate nida tauvimate. Eda na saga gona meda taqomaki keda meda kua sara ga ni mate.
Vakacava e tiko na vuna meda vakabauta kina ni na vakaoti o mate? Io, ni a sega ni buli keda na Dauveibuli, na Kalou o Jiova meda bula ga ena vica na yabaki, oti da mate tale. A sega ni nona inaki taumada vei keda qori. A vinakata ga meda bula tawamudu e vuravura, ena raica tale ga me vakayacori sara.—Aisea 55:11.
Ena qai vakaoti ga vakacava o mate? E matewale noda sasaga ena dua na gauna balavu meda walia na leqa qo. Na gauna mada ga qo eda se sasaga tiko ga. Ra bau bulia kina na saenitisi na wai ni cula kei na wainimate me itatarovi ni so na tauvimate. Era dikeva vakamatailalai na sela ni veika bula. Laurai ena levu na vanua ni balavu sara nodra bula eso ni vakatauvatani kei na drau na yabaki sa oti. Ia era na mate kece. E kaya vakadodonu na iVolatabu nira na ‘suka tale mera kuvunisoso.’——Dauvunau 3:20.
Eda na sega gona ni nuitaka na vuku vakatamata me walia na leqa sa dede sara qo na kena bikai keda tu. Eda totogi mate, ia e vakarautaka vakayalololoma na Kalou o Jiova na sala meda vakabulai kina, qo nona talai Jisu Karisito mai.