Vakayagataki Vinaka ni Taro

NA TARO kece e dau namaki me saumi—se cavuti na kena isau, se vakasamataki ga—era vakavuna me kauai mai ena veivosaki o koya e vakarorogo. Na taro e rawa ni tekivutaki kina na veivosaki, e rawa tale ga ni vakavurea na soli vakasama. Ni o vosa se veivakavulici, o na vakayagataka beka na taro mo veivakauqeti kina, me vakavurea na vakasama, se mo vakabibitaka kina na ka o tukuna. Ni o vakayagataka vinaka na taro, o sa uqeti ira tiko kina na rogoci iko mera kua ni vakarorogo wale tiko ga, mera vakasama tale ga. Ia, me matata rawa e liu na inaki ni nomu taro ni bera ni o qai taro.

Me Rawa Kina na Veivosaki. Ni o vakaitavi ena cakacaka vakavunau, raica toka na gauna o rawa ni sureti ira kina na itaukeinivale mera vosa mai, ke ra vinakata.

Levu na iVakadinadina era tekivuna rawa ga na veivosaki ena nodra taroga, “Oni bau vakasamataka tu se . . . ?” Nira digia e dua na taro era kauaitaka sara tiko ga na lewenivanua, vakalevu me toso vinaka sara nodra veivosaki ena nodra cakacaka vakavunau. Ia, ke vou mada ga vei koya e tarogi na taro, e rawa ga ni vakavure vakasama vei koya. E levu sara na ka e rawa ni veivosakitaki ke tekivutaki ena taro vaka oqo, “Cava oni nanuma . . . ?,” “Cava nomuni rai . . . ?,” kei na “Oni vakabauta . . . ?”

Ni torovi koya yani na matanivanua ni Iciopea o Filipi a wilika tiko na ivola i Aisea, e qai taroga o Filipi: “Ko ni kila beka [se oni taura rawa] na ka ko ni wilika tiko?” (Caka. 8:30, VV) Na taro oqo e dolava sara ga na sala me vakamacalataki Jisu Karisito kina o Filipi. Nodra vakayagataka na iVakadinadina ena gauna oqo na taro vaka oqo era sa kunei ira kina na vinakata tu mera kila na ka dina mai na iVolatabu.

Levu era na via vakarorogo vei iko ke o solia vei ira na gauna mera vakaraitaka na lomadra. Ni o taroga oti e dua na taro, vakatudaliga matua. Vosa vakayalovinaka ni o vosa tale, kua ni vakalewa na nona isaunitaro, ke rawa vakavinavinakataki koya ga. Ni “sauma vakavuku” na taro i Jisu e dua na vunivola, sa qai vakavinavinakataki koya o Jisu ni kaya: “Ko sa sega ni yawa mai na matanitu ni Kalou.” (Mari. 12:34, VV) Ke o sega mada ga ni duavata kei na ka e tukuna o koya drau veivosaki, o rawa ga ni vakavinavinakataki koya ni tukuna mai na lomana. Na ka e tukuna e rawa ni o raica kina na ka e gadrevi vei iko ena nomu wasea vua na ka dina mai na iVolatabu.

Mo Vakavotuya Kina na Vakasama Bibi. Ni o vosa ina dua na ilawalawa se o veivosaki kei na dua, dau vakayagataka na taro mo vakavotuya mai kina na vakasama bibi e tarava. Vakadeitaka ni ka o taroga ena kauai kina o koya e rogoci iko. Rawa ni o vakayagataka tale ga e so na taro e vakavure vakasama ni na dredre toka na kilai ni kena isau. Ke o cegu vakalailai ni o taro oti, e rawa nira nanamaki cake sara na vakarorogo ena ka o na tukuna tarava.

Dua na gauna a vakayagataka na parofita o Maika e vica vata na taro. Ni taroga oti na ka ena vinakata na Kalou vei ira na qaravi koya, sa qai taroga na parofita e va tale na taro, ena nanumi ni tiko ena taro yadua oya na isau ni taro a taroga taumada. Ia na taro kece oqori era vakarautaki koya na dauwiliwili ina isau dina ni taro e qai lai tinia kina na nona ivakamacala. (Maika 6:6-8) Vakacava mo tovolea mada oqo ni o veivakavulici.

Me Vakavure Vakasama Kina Nomu iVakamacala. E rawa ni vakayagataki na taro me raici kina na vakaibalebale ni nomu ile. A vakayacora oqo o Jiova ni tauca tiko e dua na itukutuku bibi vei Isireli, me vaka e vakaraitaki ena Malakai 1:2-10. A tukuna e liu vei ira: “Au a lomani kemudou.” Ia, era sega ni kauaitaka nona loloma, e taroga kina: “Ko Iso, na tuaka i Jekope, se segai?” Sa qai dusia o Jiova na ituvaki vakaloloma kei Itomi me ivakadinadina ni nodra ca, e sega ni taleitaka kina o Jiova na matanitu oya. Tomana ena nona cavuta e so na vosa vakatautauvata, qai curu maliwa yani e so na taro me vakabibitaka kina nona sega ni via kauaitaka o Isireli na nona loloma. E so na taro e bulia e vaka sara ga me nodra taro na bete tawayalodina. E so tale na taro e tarogi ira kina na bete o Jiova. Na veika e volai oqo e tarai keda sara ga, e vakavuna meda vakasama; e sega ni vakabekataki tale na dina ni ka e kaya o Jiova; e guiguilecavi dredre na nona itukutuku.

E so na dauvunau era dau vakayagataka tale ga vaka oqo na taro. E sega beka ni gadrevi mera cavuta mai na isaunitaro na vakarorogo, ia sa ra vakasamataka tiko.

Nida veivakavulici ena iVolatabu, eda vinakata mera vakaitavi tale ga na gonevuli. Ia, ena yaga sara vakalevu ke ra sauma mai na taro na gonevuli ena nodra vosa ga. Vakayagataka e so tale na ikuri ni taro, tauca tale ga vakayalololoma mo yavalata kina na vakasama nei gonevuli. Ena veitikina bibi, uqeti koya me vakayagataka na iVolatabu me yavutaki kina nona ivakamacala. E rawa tale ga ni o taroga: “E salavata vakacava na tikina daru vulica tiko qo kei na kena daru sa vulica oti? Na cava e bibi kina? Na cava e dodonu me cakava oqo ina noda bula?” E vinaka cake oqo mai na nomu sa vosa tiko ga se vakamacala tiko ga o iko. Ena sala oqo, o sa vukei koya kina nomu gonevuli me ‘vakasamataka vakatitobu’ na ka e vulica ena nona qaravi Kalou.—Roma 12:1, NW.

Ke sega ni taura rawa nomu gonevuli e dua na tikina, taura ga vakamalua. De dua e vakasamataka tiko se rau salavata vakacava na ka o tukuna kei na ka e sa vakabauta tu mai ena dua na gauna balavu. De dua ena yaga na nomu veisautaka vakalailai na ivakarau ni nomu ivakamacala. Ia, so na gauna ena sega ni gadrevi sara na ivakamacala titobu. Na levu ga ni nomu vakayagataka na iVolatabu na kena vinaka. Vakayagataka e so na vosa vakatautauvata. Kuria tale ga ena so na taro rawarawa, me vakasamataka kina o gonevuli na ka e vulici tiko kei na kena ivakadinadina.

Mo Kila Kina na Ka e Tu e Loma ni Tamata. Nira sauma na taro e so, era na sega beka ni vakaraitaka dina na ka e tu e lomadra. Era na cavuta beka ga na isaunitaro era nanuma ni o via rogoca. E vinakati kina na yalomatua. (Vkai. 20:5) De dua o rawa ni vakatotomuri Jisu ni a taroga: “Ko sa vakadinata na ka oqo, se segai?”—Joni 11:26.

Nira sega ni taleitaka na vosa i Jisu e levu na tisaipeli ra qai biuti koya, e qai tarogi iratou nona yapositolo o Jisu se cava eratou nanuma. “Dou sa via lako tani talega koi kemudou?” Sa qai vakaraitaka o Pita na ka eratou nanuma: “Turaga, keitou na lako vei cei? sa tu ga vei kemuni na vosa ni bula tawa mudu: ia keitou sa vakabauta ka kila, ni sai Kemuni na Karisito, na Luve ni Kalou bula.” (Joni 6:67-69) Dua tale na gauna a tarogi iratou nona tisaipeli o Jisu: “Era sa kaya na tamata se ko cei koi au na Luve ni tamata?” E qai taroga tale e dua na taro me ratou vakaraitaka kina se cava eratou nanuma o iratou. “Ia dou sa kaya se ko cei koi au?” E qai sauma o Pita: “Oi kemuni na Karisito, na Luve ni Kalou bula.” (Neitou na matanivola kala.)—Maciu 16:13-16.

Ni o veivakavulici ena iVolatabu, de yaga mo muria tale ga na kena iwalewale oqo ena nomu vakamatatataka e so na ile. E rawa mo taroga: “Cava era nanuma mai koronivuli (se vanua ni cakacaka)?” Oti mo qai taroga: “Ia, na cava o nanuma o iko?” Ni o sa kila rawa na ka e nanuma dina na nomu gonevuli, sa na rawarawa sara nomu vukei koya.

Mo Vakabibitaka Kina Nomu iLe. Rawa ni vakayagataki tale ga na taro me vakabibitaki kina e so na vakasama. A cakava oqo na yapositolo o Paula me vaka e volai ena Roma 8:31, 32: “Kevaka sa totaki keda na Kalou, o cei me noda meca? Ena vakaevei ko koya sa sega ni bureitaka na Luvena dina, ia sa soli koya yani me kedai sosomi kecega, ena dredre vakacava vua me solia walega vei keda na ka kecega vata kaya?” Dikeva nira veimuri vinaka sara ga na taro yadua.

Ni volatukutukutaka oti na parofita o Aisea na lewa i Jiova vua na tui kei Papiloni, sa qai kaya ena yalodei: “Sa nakita ga ko Jiova ni lewe vuqa, ia ko cei me vakadaroya? ka sa dodo yani na ligana, ia ko cei me na vakasuka tani?” (Aisea 14:27) Na taro vaka oqo e vakaraitaka na ka e sega ni veibataki rawa tale. E sega ni gadrevi me saumi.

Me Vakavotui Kina na Nanuma Cala. Na taro e vakasamataki vinaka e dau mana ena kena vakavotui na nanuma cala. Ni vakarau vakabula e dua na tagane o Jisu, a tarogi ira mada na Farisi kei ira na kenadau ena Lawa: “E tara me ia na veivakabulai e na siga ni vakacecegu, se segai?” Ni veivakabulai oti, sa qai taroga tale: “Ko cei vei kemudou, kevaka e lutu ki na dua na davuke na nona asa se nona pulumokau, ena sega ni yavia cake vakatotolo e na siga ni vakacecegu?” (Luke 14:1-6) E sega ni gadrevi tale me saumi na taro oqo, sega tale ga ni dua e via sauma mai. Na taro oya e vakavotuya mai na nodra nanuma cala.

So na gauna e rawa sara mada ga ni nanuma cala na lotu Vakarisito. E so na lotu Vakarisito mai Korinica era veilewaitaki ira tale tiko na tacidra vakayalo. E sega ni dodonu me yaco oqo ni dodonu mera walia ga vakataki ira na nodra leqa. E qai walia vakacava na leqa oqo na yapositolo o Paula? E taroga e vica na taro matata sara me vakadodonutaki kina nodra nanuma.—1 Kor. 6:1-8.

E rawa mo kenadau ena vakayagataki vinaka ni taro ke o vakamatauna. Ia, nanuma tiko mo dau veidokai, vakauasivi ni o vosa vei ira na sa qase, ira o sega ni kilai ira, kei ira na vakaitutu. Vakayagataka na taro mo vakateteya yani kina na ka dina mai na iVolatabu ena kena iwalewale e taleitaki.