‘Lako, Qisi Ira Mera Tisaipeli, Papitaisotaki Ira’

“Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira . . . , vakavulici ira me ra muria na veika kece ga au sa vakarota tu vei kemudou.”​—MACIU 28:​19, 20, VV.

1. Na vakatulewa cava e cakava na matanitu o Isireli ena ruku ni Ulunivanua o Saineai?

RAUTA na 3,500 na yabaki sa oti, a vosa ni yalayala vua na Kalou e dua na matanitu taucoko. Nira soqoni tiko ena ruku ni Ulunivanua o Saineai, era kacivaka raraba na Isireli: “A ka kecega sa kaya ko Jiova keimami na cakava.” E tekivu ena gauna oya na nodra sa yaco na Isireli mera tamata era yalataki vua na Kalou, mera nona “[i]yau talei.” (Lako Yani 19:​5, 8; 24:⁠3) Era vakanamata tu ina nona veitaqomaki ra qai nuitaka mera lai bula ena veitabagauna e se bera mai ena vanua e “dave kina na wai-ni-sucu kei na oni.”​​—⁠Vunau ni Soro 20:⁠24.

2. Na veiwekani cava kei na Kalou e rawa nida marautaka nikua?

² Ia e vakadeitaka na daunisame o Esafa nira “sega ni vakabauta na veiyalayalati kei na Kalou, ka ra bese ni muria na nona vunau” o ira na Isireli. (Same 78:10) Era sa sega ni muria na vosa ni yalayala se bubului era cakava na nodra qase vei Jiova. E vakayalia kina na matanitu oya na veiwekani uasivi kei na Kalou. (Dauvunau 5:4; Maciu 23:​37, 38) E mani “kauta mai kina e so na kai veimatanitu tani na Kalou, me ra nona.” (Cakacaka 15:​14, VV) Ena gauna ni ivakataotioti oqo sa kumuna tiko e “dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa,” era kacivaka ena marau: “A vu ni bula na noda Kalou, o koya sa tiko e nai tikotiko-vakaturaga, vua na Lami talega.”​​—⁠Vakatakila 7:​9, 10.

3. Na cava me cakava e dua me qai veiwekani kina kei na Kalou?

³ Me marautaka na veiwekani talei kei na Kalou, ena vinakati vua e dua me yalataki koya vei Jiova qai vakaraitaka raraba na yalayala oya ena nona papitaiso. Oqo e ivakaraitaki ni talairawarawa ina ivakaro i Jisu vei ira na nona tisaipeli: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) O ira na Isireli era rogoca na kena wiliki “nai vola ni veiyalayalati.” (Lako Yani 24:​3, 7, 8) E matata vinaka vei ira na nodra itavi vei Jiova. E vaka kina nikua, e vinakati tale ga vua e via papitaiso me tiko vua na kilaka dodonu me baleta na loma ni Kalou e vakaraitaki ena nona Vosa, na iVolatabu.

4. Na cava me cakava e dua me qai rawa ni papitaiso? (Okata na kato e cake.)

⁴ E macala ni a nakita o Jisu me yavutaki vinaka na nodra vakabauta na nona tisaipeli ni bera nira papitaiso. E vakaroti ira nona imuri mera qisi ira mera tisaipeli se veivakatisaipelitaki ra qai vakavulici ira tale ga mera ‘muria na veika kece ga e vakarota o koya.’ (Maciu 7:​24, 25; Efeso 3:​17-​19) E kena ibalebale ni o ira na qai papitaiso oqo era sa vulica tu mai na iVolatabu ena vica na vula se dua se rua sara na yabaki, mera kua kina ni vakatulewa vakariri se cala na nodra vakatulewa. Ena siga era papitaiso kina, era sauma ena io e rua na taro bibi. Ni vakabibitaka o Jisu ni dodonu me ‘Io na Io, me Sega na Sega,’ ena vinaka meda raica mada vakamatailalai na ibalebale ni rua na taro e dau tarogi ena gauna ni papitaiso.​​—⁠Maciu 5:​37.

Veivutuni kei na Yalayala

5. Na cava na rua na ka e vakabibitaki ena imatai ni taro ni papitaiso?

⁵ Era dau tarogi taumada na vinakata mera papitaiso se era sa veivutunitaka na ivakarau ni nodra bula makawa ra qai yalataka na nodra bula mera cakava na loma i Jiova. Na taro oqo e vakabibitaka na rua na ka e dodonu me cakava e dua ni bera ni papitaiso, oya me veivutuni, me yalataki koya tale ga.

6, 7. (a) Na cava e vinakati kina mera veivutuni o ira kece na via papitaiso? (b) Na veisau cava me cakava e dua ni sa veivutuni?

⁶ Na cava e dodonu me veivutuni kina e dua e via papitaiso? E vakamacalataka na yapositolo o Paula: “Eda a vakataki ira tale tu ga e liu e na noda muria na gagadre ca ni yagoda.” (Efeso 2:​3, VV) Ni bera noda mai kila na loma ni Kalou, e vakavuravura tu na noda bula, nida muria voli na veika e vakavuravura kei na kena ivakarau. A liutaka tiko na noda bula na kalou ni vuravura oqo, o Setani. (2 Korinica 4:⁠4) Ia nida mai kila na loma ni Kalou, eda sa nakita ‘me liutaki keda na lewa ni Kalou ena vo kece ga ni gauna eda bula tiko kina, me kua tale ni lewai keda na veigagadre vakayago.’​​—⁠1 Pita 4:⁠2, VV.

⁷ E yaga vakalevu na ivakarau ni bula vou oqo. E dolava tale ga vei keda e dua na veiwekani uasivi kei Jiova, na ka e vakatauvatana o Tevita me vaka na noda sureti meda lai tiko ena “vale” ni Kalou kei na nona “ulu-ni-vanua tabu.” Oqo e dua dina na ka dokai. (Same 15:⁠1) Ena sega ni veisureti vakaveitalia o Jiova, ena sureta ga o koya e “lako vakadodonu, ka kitaka nai valavala dodonu, ka vosa dina tiko mai na vu ni yalona.” (Same 15:⁠2) Meda sauva na ivakatagedegede oqori, ena rairai vinakati meda veisautaka e so na noda itovo kei na noda ivakarau, ena vakatau ena ivakarau ni noda bula ni bera noda vulica na ka dina. (1 Korinica 6:​9-​11; Kolosa 3:​5-​10) Ena uqeti keda meda veisau na noda veivutuni, oya na noda veivutunitaka na noda ivakarau ni bula makawa da qai saga vakaukaua meda vakamarautaki Jiova. Ena kena ibalebale oqo meda saumaki sara ga mai na noda muria tiko na ivakarau ni bula vakavuravura ina noda cakava na veika e vinakata na Kalou.​​—⁠Cakacaka 3:​19.

8. Eda yalataki keda vakacava, erau lako vata vakacava kei na papitaiso?

⁸ Na ikarua ni iwasewase ni imatai ni taro era tarogi kina na via papitaiso e baleta na nodra sa yalataki ira se sega mera cakava na loma i Jiova. E rui bibi me na yalayala rawa e dua ni bera ni papitaiso. Eda cakava oqo ena noda vakaraitaka ena noda masu vei Jiova nida via solia na noda bula vua ena vuku i Karisito. (Roma 14:​7, 8; 2 Korinica 5:​15) Sa na taukeni keda o Jiova, ena noda iLiuliu tale ga. Me vakataki Jisu eda na rekitaka na noda cakava na veika e vinakata na Kalou. (Same 40:8; Efeso 6:⁠6) Eda yalayala ga vakadua vei Jiova. Ia, me vaka ni sega ni dua e kila na noda yalataki keda vei Jiova, era na qai kila na tani na noda sa yalataki keda vua na Tamada vakalomalagi ena gauna eda papitaiso kina.​​—⁠Roma 10:⁠10.

9, 10. (a) Na cava e okati ena noda cakava na loma ni Kalou? (b) Era bau kila tale ga vakacava na Nazi na bibi ni noda yalataki keda?

⁹ Na cava e okati ena noda muria na ivakaraitaki i Jisu nida cakava na loma ni Kalou? A tukuna o Jisu vei ira nona tisaipeli: “Kevaka e dua e via muri au, me kua ni lewai koya tale tiko, ia me colata ga na nona kau ni rarawa qai muri au tiko ga.” (Maciu 16:​24, NW) E vakaraitaka e ke o Jisu e tolu na ka e dodonu meda cakava. Kena imatai, meda “kua ni lewai” keda. Oqo e kena ibalebale meda kua ni vakaliuca na veika eda gadreva, ia meda vakaliuca ga na ivakaro ni Kalou kei na nona veidusimaki. Kena ikarua, meda ‘colata na noda kau ni rarawa.’ Ena gauna i Jisu, e dau ivakatakilakila ni kau ni rarawa na madua kei na vakararawataki. Nida lotu Vakarisito eda na vakacacani ena vuku ni itukutuku vinaka. (2 Timoci 1:⁠8) Dina ga ni na beci keda se vakalialiai keda o vuravura, ia me vakataki Karisito eda na ‘sega ni madua nida vakalialiai’ baleta eda kila nida vakamarautaka tiko na Kalou. (Iperiu 12:⁠2) Kena ikatolu, meda muri Jisu “tiko ga.”​​—⁠Same 73:26; 119:44; 145:⁠2.

¹⁰ E talei ni so sara mada ga na dauveitusaqati era raica rawa na nodra yalataki ira na iVakadinadina i Jiova mera qarava vakatabakidua na Kalou. Me kena ivakaraitaki, ena nodra keba ni veivakararawataki na Nazi e Buchenwald, mai Jamani, era vakaroti kina na iVakadinadina era sega ni via cakitaka na nodra vakabauta mera sainitaka na itukutuku oqo: “Au na Gonevuli ni iVolatabu tiko ga, au na dina tiko ga ina noqu vosa ni yalayala vei Jiova.” Oqo tale ga e itovo ni nodra rai na dauveiqaravi yalodina ni Kalou era sa yalataki ira oti!​​—⁠Cakacaka 5:​32.

Kilai Nida iVakadinadina i Jiova

11. Na veika dokai cava e tadola vua e papitaiso?

¹¹ Ena ikarua ni taro, e tarogi taumada kina o koya e via papitaiso se matata vua se sega ni nona papitaiso oqo sa na kilai kina me iVakadinadina i Jiova. Ni sa tabadromuci oti, sa yaco me italatala e vakadonui e vakayacani vei Jiova. Oqo e dua na ka dokai qai itavi bibi. Sa na rawa tale ga vua e papitaiso me bula tawamudu, kevaka e yalodina tiko ga vei Jiova.​​—⁠Maciu 24:⁠13.

12. Na itavi cava e salavata mai kei na dokai ni vakayacani ena yaca i Jiova?

¹² Sa bau dua dina na ka dokai meda vakayacani vua na Kalou kaukaua duadua, o Jiova. A kaya na parofita o Maika: “Ko ira kece na veimataqali era na dui muria na yaca ni nodra kalou, ia koi keda, eda na muria ga na yaca i Jiova na noda Kalou ka sega ni mudu ka sega ni mudu.” (Maika 4:⁠5) Ia na ka dokai oqori e salavata mai kei na itavi. Ena vinakati meda moica na noda bula me lagiti kina na yaca eda sa mai vakayacani kina. Me vaka e vakaraitaka o Paula vei ira na lotu Vakarisito mai Roma, kevaka e dua e sega ni bulataka na veika e vunautaka, ena “dauvosavakacacataki” se vakarogocataki kina na yaca ni Kalou.​​—⁠Roma 2:​21-​24.

13. Na cava e nodra itavi kina na tamata i Jiova era sa yalataki ira mera vakadinadinataka na nodra Kalou?

¹³ Ni yaco me iVakadinadina i Jiova e dua, e sa vakadonuya me vakadinadinataka na nona Kalou. O Jiova a sureti ira mada na matanitu yalataki o Isireli mera vakadinadinataka na nona itutu vakalou e tawamudu. (Aisea 43:​10-​12, 21) Ia era sega ni cakava na itavi oqori na matanitu oya, mani sega ni vakadonui ira kina o Jiova. Era doka na lotu Vakarisito nikua na itavi dokai ni nodra vakadinadinataki Jiova tiko. Eda cakava oqo baleta nida lomani koya da qai gadreva me vakarokorokotaki na yacana. E rawa vakacava meda galuvaka tiko na veika dina me baleta na Tamada vakalomalagi kei na nona inaki? Eda vakataki koya ga na yapositolo o Paula ena nona kaya: “Sa noqu i tavi. Au sa na kalouca ke’u sega ni vunautaka na i tukutuku vinaka!”​​—⁠1 Korinica 9:​16, VV.

14, 15. (a) E vukei keda vakacava na isoqosoqo i Jiova meda toso vakayalo? (b) Na isolisoli cava soti e vukei keda vakayalo?

¹⁴ Na ikarua ni taro e vakadreta tale ga vua e via papitaiso na kena vinakati me cakacaka vata kei na isoqosoqo ni Kalou e dusimaka tiko na yalona tabu. Eda na sega ni qaravi Jiova duadua, eda na gadreva tale ga na nodra veivuke, veitokoni, kei na nodra veivakayaloqaqataki na ‘wekada’ vakayalo. (1 Pita 2:​17; 1 Korinica 12:​12, 13) E vakaitavi vakalevu na isoqosoqo ni Kalou ena noda toso vakayalo. E vakarautaka mai e levu sara na ivola me vukei keda meda tubu cake ena kilaka dodonu, me vukei keda meda vakatulewa vinaka nida sotava na leqa, qai vukei keda me vinaka tiko ga na noda veiwekani kei na Kalou. Me vaka na tina e vakadeitaka me qaravi qai vakani vinaka na luvena, e vakarautaka vakalevu tiko “na dauveiqaravi yalo dina ka vuku” na kakana vakayalo ena vukei keda meda toso vakayalo.​​—⁠Maciu 24:​45-​47, VV; 1 Cesalonaika 2:​7, 8.

¹⁵ Na soqoni e veimacawa e vakavulici ira qai vakayaloqaqataki ira tiko na tamata i Jiova mera iVakadinadina i Jiova yalodina. (Iperiu 10:​24, 25) Na Koronivuli ni Vuli Vunau e vukei keda meda maqosa ena vosa ena matanalevu, na Soqoni ni Cakacaka e vakavulici keda ena ivalavala ni noda tukuna na noda itukutuku. Eda vulica ena noda dau soqoni kei na noda vulica vakataki keda na iVolatabu ni vakilai sara tiko ga na cakacaka ni yalona tabu o Jiova ena nona isoqosoqo. Na veisolisoli kece ni Kalou oqo e vakasalataki keda meda qarauni keda mai na ca, e vukei keda meda italatala vinaka, qai vukei keda tale ga meda yadra tiko vakayalo.​​—⁠Same 19:​7, 8, 11; 1 Cesalonaika 5:​6, 11; 1 Timoci 4:​13.

Ka e Uqeta na Vakatulewa

16. Na cava e uqeti keda meda yalataki keda vei Jiova?

¹⁶ Ena rua na taro ni papitaiso oya era raica rawa kina na via papitaiso na bibi kei na itavi e kauta mai na papitaiso. Na cava gona e uqeta e dua me via papitaiso? Eda sega ni papitaiso baleta ni dua e vakasaurarataki keda, ia e baleta ga ni “vakayarayarataki” keda kina o Jiova. (Joni 6:​44) E liutaka tiko na lomalagi kei na vuravura na Kalou ena loloma, e sega ni veivakasaurarataki baleta ni “loloma na Kalou.” (1 Joni 4:⁠8) Eda toro volekati Jiova baleta e dau yalololoma ni veitaratara kei keda. E solia mai na luvena duabau ga e vakatubura ena vukuda qai solia tale ga vei keda na inuinui uasivi. (Joni 3:​16) Oya na vuna eda soli keda kina se yalataki keda kina vua.​​—⁠Vosa Vakaibalebale 3:9; 2 Korinica 5:​14, 15.

17. Eda sega ni yalataki keda ina cava?

¹⁷ Eda sega ni yalataki keda ina dua na sasaga se cakacaka, eda yalataki keda ga vei Jiova. Ena veisau na cakacaka e lesia na Kalou vei ira na nona tamata, ia na nodra yalayala e sega ni veisau. Me kena ivakaraitaki, a duatani na ka e tukuni vei Eparama qai duatani na ka e tukuni vei Jeremaia. (Vakatekivu 13:​17, 18; Jeremaia 1:​6, 7) Ia, erau cakava ruarua na itavi e solia vei rau na Kalou baleta ni rau lomani Jiova rau qai vinakata me rau cakava ena yalodina na lomana. Ena gauna ni ivakataotioti oqo eda vinakata kece na imuri papitaiso i Karisito meda vunautaka na itukutuku vinaka ni Matanitu ni Kalou da qai veivakatisaipelitaki. (Maciu 24:14; 28:​19, 20, VV) Nida gumatua ena cakacaka oqo eda sa vakaraitaka tiko na noda lomana na Tamada vakalomalagi, eda vakaraitaka tale ga nida yalataki keda dina vua.​​—⁠1 Joni 5:⁠3.

18, 19. (a) Na itukutuku cava eda vakaraitaka ena gauna ni noda papitaiso? (b) Na cava ena dikevi ena ulutaga e tarava?

¹⁸ E sega ni vakabekataki ni papitaiso e dolava vei keda e levu na veivakalougatataki, ia me kua ga ni raici vakamamada. (Luke 14:​26-​33) E bibi cake na noda papitaiso mai na veika tale e so eda cakava. (Luke 9:​62) Ena gauna eda papitaiso kina eda sa vakaraitaka raraba tiko na itukutuku: “Sa noda Kalou ka tawa mudu na Kalou oqo: ena tuberi keda ko koya ka yacova na noda mate.”​​—⁠Same 48:⁠14.

¹⁹ Na ulutaga e tarava ena dikeva e so tale na taro ena rairai tarogi me baleta na papitaiso. E tu beka na vuna vinaka me kua ni papitaiso kina e dua? E vakatau beka ena yabaki ni bula? E rawa vakacava meda kauaitaka kece na rakorako ni gauna ni papitaiso?

Vakamacalataka Mada

• Na cava e okati ena yalayala vua na Kalou?

• Na itavi cava e salavata mai kei na dokai ni noda vakayacani vei Jiova?

• Na cava e uqeti keda meda papitaiso?

[Kato/​iYaloyalo ena tabana e 22]

Na Rua na Taro ni Papitaiso

Ena yavu ni isoro i Jisu Karisito, o sa veivutunitaka nomu ivalavala ca, o sa yalataki iko tale ga vei Jiova mo cakava na lomana?

O sa kila ni nomu yalayala kei na nomu papitaiso o sa yaco kina mo iVakadinadina i Jiova, mo lewe tale ga ni isoqosoqo ni Kalou e dusimaka tiko na yalona tabu?

[iYaloyalo ena tabana e 23]

Na yalayala e vosa ni yalayala eda cakava vei Jiova ena noda masu

[iYaloyalo ena tabana e 25]

Eda vakaraitaka na noda yalataki keda vua na Kalou ena noda cakacaka vakavunau