Nodratou iLakolako i Jerusalemi na Vuvale i Jisu

Eratou sa donuya tale qo na vuvale i Josefa na vulaitubutubu. Sa kena gauna me ratou tomani ira na nodratou itokani kei na wekadratou, ena ilakolako vakayabaki i Jerusalemi me lai solevutaki na Lakosivia me vaka e vakaroti ena Lawa. (Vakarua 16:16) E rauta ni 120 na kilomita na ilakolako mai Nasareci i Jerusalemi. E gauna osooso qai marautaki vei ira kece na vuvale. Sa yabaki 12 tiko ena gauna qori o Jisu, e vakanamata ena soqo kei na nona rawa ni gole tale ina valenisoro.

Sega ni dua ga na siga na soqo ni Lakosivia ratou gole kina o Jisu kei na nona vuvale. Ni oti ga na Lakosivia, sa tekivu sara na vitu na siga ni soqo ni Madrai Sega ni Vakaleveni. (Marika 14:1) Qori e tiki tale ga ni solevu ni Lakosivia. E rua taucoko na macawa nodratou ilakolako mai Nasareci, nodratou tiko voli e Jerusalemi kei na nodratou ilakolako lesu i vale. Ia e balavu vakalailai nodratou tiko mai Jerusalemi ena yabaki qo, ena vuku ni dua na ituvaki a qai kidavi ni ratou sa biubiu mai Jerusalemi.

Erau nanuma o Josefa kei Meri ni sa maliwai ira tiko na wekadrau kei na nodrau itokani o Jisu ena nodra ilakolako lesu. Ia e yali o Jisu ni ratou mai cegu toka ni sa bogi na vanua. Erau mani lai vaqaqara vei ira na veitomani tiko ena ilakolako qo. Ia e sega ni bau kune nodrau cauravou lailai. Rau sa qai lesu i Jerusalemi o Josefa kei Meri me rau lai vaqarai koya.

Dua na siga taucoko nodrau vaqaqara voli, ia rau sega ni raici koya. Rau sega tale ga ni raici koya ena ikarua ni siga. Ena ikatolu ni siga, rau sa qai raici luvedrau ena valenisoro. E dabe maliwai ira tiko eso na nodra ivakavuvuli na Jiu. E vakarogoci ira, vakatarogi ira, qai vakadrukai ira ena levu ni ka e kila.

E taroga sara o Meri: “Luvequ, na cava o cakava kina qo vei keirau? Keirau sa mate na vaqarai iko kei tamamu.”​—Luke 2:48.

A kurabuitaka o Jisu ni rau sega ni kila na vanua ena tiko kina. E taroga: “Cava drau vaqarai au tiko kina? Drau sega ni kila ni dodonu meu tiko ena vale i Tamaqu?”​—Luke 2:49.

E lesu vata kei rau o Josefa kei Meri i Nasareci o Jisu, qai talairawarawa tiko ga vei rau. E tubu cake tiko ga o Jisu qai toso cake nona vuku. E se gone, ia e taleitaki koya na Kalou kei ira na tamata. Io, e ivakaraitaki vinaka o Jisu mai na gauna se gone kina ena nona vakaliuca na veika vakayalo, qai dau dokai rau nona itubutubu.