Ra Cauravou, Oni Tadolova Tiko na iTavi?
1. Gauna cava mera tekivu muria kina na cauravou na ivakasala ena 1 Timoci 3:1?
1 “Ke dua e via qarava na itavi . . . , e sa vinakata tiko na cakacaka vinaka.” (1 Tim. 3:1) Na vosa uqeti vakalou qori e uqeti ira tiko na tagane mera tadolova na itavi ni veiqaravi ena ivavakoso. Vakacava ena vinakati sara mo uabula mo qai tadolova na itavi? E vinaka mo tekivu tadolova na itavi ni o se itabagone. Qo na sala o na rawa ni vakarautaki tiko kina, o na vakatovolei tale tiko ga kina me yacova ni sa ganiti iko mo dauveiqaravi ena ivavakoso ni oti e vica na yabaki. (1 Tim. 3:10) Ke o cauravou papitaiso, o na tadolova vakacava na itavi?
2. Ena bucini qai vakaraitaki vakacava na yalo ni vakuai keda?
2 Vakuai Iko: Nanuma tiko, o tadolova tiko na cakacaka vinaka, sega ni itutu. Saga gona mo bucina na yalo ni veivukei, mo dau vukei ira na mataveitacini. Na imatai ni ka mo cakava oya mo dau vakasamataka na ivakaraitaki vinaka i Jisu. (Maciu 20:28; Joni 4:6, 7; 13:4, 5) Kerei Jiova me vukei iko mo dau veikauaitaki. (1 Kor. 10:24) Vakacava, o rawa ni dau vukei ira na itabaqase kei ira na malumalumu ena ivavakoso? O dau soli iko vakarawarawa mo vakaitavi ena sasamaki, mo kotiva na co, se so tale na sala o rawa ni veivuke kina ena kena qaravi kei na samaki ni Vale ni Soqoni? O rawa ni tu vakarau mo veisosomitaki ena Koronivuli ni Vuli Vunau? O na raica ni ka marautaki na nomu soli iko mo vukei ira na tacimu vakayalo.—Caka. 20:35.
3. E bibi vakacava na bula vakayalo, eda na bucina vakacava?
3 Bula Vakayalo: E bibi cake vua na dauveiqaravi ni ivavakoso me vinaka nona bula vakayalo, sega so na taledi se na kila. Na tagane vakayalo ena saga me raica na ka mai na rai i Jiova kei Jisu. (1 Kor. 2:15, 16) Ena laurai vua na itovo e umani ena “vua ni yalo tabu.” (Kala. 5:22, 23) Ena gugumatua ena vunau, ena vakaliuca tale ga na Matanitu ni Kalou. (Maciu 6:33) O rawa ni bucina eso na itovo vakayalo ke dua nomu ituvatuva vinaka ni vuli vakataki iko. Qo e okati kina nomu wilika e veisiga na iVolatabu, na itabataba vovou ni Vale ni Vakatawa kei na Yadra!, vakavakarau qai tiko ena soqoni. (Same 1:1, 2; Iper. 10:24, 25) Ni vakayaloqaqataki Timoci tiko o Paula me toso vakayalo, a vola: “Qarauna . . . nomu veivakavulici.” (1 Tim. 4:15, 16) Mo vakarautaka vinaka gona na nomu itavi ena Koronivuli ni Vuli Vunau. Vakavakarau ena cakacaka vakaitalatala, me wasoma nomu vakaitavi kina. Mo tekia eso na nomu isausau vakayalo qai saga mo rawata, me vaka na painia, veiqaravi e Peceli, se mo lai vuli ena Koronivuli ni Vuli iVolatabu ni Tagane Dawai. Ke vinaka na nomu bula vakayalo ena rawarawa mo ‘dro tani mai na gagadre vakaitabagone.’—2 Tim. 2:22.
4. E yaga vakacava ke da dau nuitaki qai yalodina?
4 Nuitaki qai Yalodina: Era tagane “ivakaraitaki vinaka” na tacida era lesi ena imatai ni senitiuri mera vota na kakana vei ira na lotu vaKarisito dravudravua. Era kilai na tagane qori mera nuitaki ra qai yalodina, era sega kina ni leqataka na yapositolo na cakacaka qori, a rawa nira kauaitaka vakatabakidua eso tale na cakacaka bibi. (Caka. 6:1-4) Koya gona, ni soli vei iko e dua na itavi ena ivavakoso, mo cakava sara ena nomu vinaka kece. Mo vakatotomuri Noa, a vakamuria vakavoleka na ka kece a vakaroti vua me baleta na ta ni waqa. (Vkte. 6:22) E kauaitaka vakalevu o Jiova na noda yalodina, e vakaraitaka tale ga qori nida matua vakayalo.—1 Kor. 4:2; raica na kato “Yaga ni Veivakavulici.”
5. Na cava mera tadolova kina na cauravou na itavi?
5 Me vaka ga e parofisaitaki, sa vakatotolotaka tiko o Jiova na nodra kumuni na tamata. (Aisea 60:22) Kena ivakatautauvata, rauta ni 250,000 na lewenivanua era papitaiso e veiyabaki. Nira sa gole tiko mai ena dina e levu na ka vou, ena vinakati na tagane era rawata na kena ivakatagedegede mera qarava na itavi ni ivavakoso. Nikua, dua na ka na levu ni cakacaka me qaravi ena isoqosoqo i Jiova. (1 Kor. 15:58) Ra cauravou, oni tadolova tiko na itavi? Ke oni cakava qori, oni sa vinakata tiko na cakacaka vinaka!
[Tikina Bibi ena tabana 2]
Nira sa gole tiko mai ena dina e levu na ka vou, ena vinakati na tagane era rawata na kena ivakatagedegede mera veiqaravi ena ivavakoso
[Kato ena tabana 3]
Yaga ni Veivakavulici
Ena yaga vakalevu vei ira na cauravou era toso vakayalo ke ra lesia na qase na itavi vei ira ra qai vakavulici ira. Ni suka na soqoni ena dua na gauna, a dabe tiko ena buturara e dua na ivakatawa dauveilakoyaki qai vakayaloqaqataka tiko e dua na dautukutuku. A liaca ni duri voleka toka e yasana e dua na cauravou lailai, mani tarogi koya ke via raici koya. A tukuna na cauravou ni nona itavi ni suka na soqoni me dau samaka na buturara. Rau sa vakarau biubiu nona itubutubu, ia a via sasamaki rawa o cauravou ni bera ni gole. Qori e uqeti koya sara ga na ivakatawa dauveilakoyaki. E tukuna: “Era sega ni vakasavuliga na qase ena ivavakoso ya mera vakavulici ira na cauravou lalai era toso vinaka nira lesia sara ga vei ira na itavi ena ivavakoso. Sa rauta ni gauna au sikova kina na nodratou ivavakoso, e sega ni ka vou me ratou vakatututaka na yacadra na cauravou mera dauveiqaravi ni ivavakoso.”