LESONI 2

Rogo Matau

2 Korinica 2:17

IVAKAMACALA LEKALEKA: Vakayagataka ga na vosa ni veisiga, me vu mai lomamu. Mera kila na vakarorogo na nomu rai me baleta na ulutaga o vosa tiko kina.

KENA ICAKACAKA:

Masulaka qai vakavakarau vinaka. Masuta na veivuke mo vakasamataka matua na itukutuku o na lai vakarogoya. Me kasa vei iko na tikina bibi. Vakamacala ena nomu vosa ga, kua ni cavuqaqataka na vosa era tabaki tu ena ivola.

Ke o nanuma mo wilika na iVolatabu se dua tale na ivola, kila vinaka na tikina o na wilika me taladrodro kina nomu wiliwili. Ke lavetaki nodra vosa eso, me veiuqeti na ivakarau ni nomu wilika na ka era tukuna, me kua ga ni sivia tale.
Me vu mai lomamu. Vakasamataka na vuna mera rogoca kina na itukutuku na vakarorogo. Mo nanumi ira tiko. Ena qai laurai ena nomu itutucake, nomu matanataka na ka, kei na irairai ni matamu ni o dau veikauaitaki tale ga.

Vakayagataka na vosa ni veisiga, me rogo matau. Ena dokai na itukutuku ni matata nomu vosa qai tuvai vakamatau.
Raici ira na vakarorogo. Ke sega ni dua na kena leqa saga mo raici ira na vakarorogo ni o vosa tiko. Ni o vunau ena buturara vakaraici ira yadua na vakarorogo.