Vakacaucautaki Jiova “ena Loma ni iVavakoso”

E VAKARAUTAKA mai o Jiova na soqoni vakarisito me vakaukauataki ira kina vakayalo na nona tamata. Noda dau tiko gona vakawasoma ena soqoni, eda sa vakaraitaka tiko kina noda vakavinavinakataka na isolisoli oqori. Kuria oya, eda sa “veivakauqeti [tiko] kina [vakaveitacini] e na loloma kei na cakacaka vinaka,” ni oqo e tiki bibi ni noda veilomani. (Iperiu 10:​24, VV; Joni 13:35) Sala cava e rawa nida veiuqeti kina vakaveitacini ena soqoni?

Vakamacala e Matanalevu

A vola na ka e baleti koya o Tui Tevita ni kaya: “Au na vakatusa na yacamuni vei ira na wekaqu: e na kedra maliwa nai soqosoqo lewe ni lotu [se, “ena loma ni ivavakoso,” NW] ka’u na vakavinavinaka vei kemuni. Au na vakamolimoli ga vei kemuni e nai soqosoqo levu.” “Au na vakamolimoli vei kemuni e nai soqosoqo levu; ka’u na vakavinavinaka vei kemuni e na kedra maliwa na lewe vuqa.” “Au a vunautaka na veivakadonui e nai soqosoqo levu: raica, ka’u sa sega ni tarova na gusuqu.”​​—Same 22:​22, 25; 35:18; 40:9.

E vaka tale ga oya o ira na lotu Vakarisito era dau soqoni mera sokalou ena gauna i Paula, era dau vakatusa na nodra vakabauti Jiova kei na nona lagilagi. Era veiuqeti kina, ra veivakatakatai mera dau loloma ra qai ivalavala vinaka. Nikua, ni sa sivi e vica vata na senitiuri mai na gauna rau a bula kina o Tevita kei Paula, eda kila “ni sa toro voleka mai na Siga ni Turaga [o Jiova].” (Iperiu 10:​24, 25) Sa voleka ni vakarusai na ivakarau ni veika ca i Setani, sa rauta me sa qai levu tiko ga na leqa. Oya na vuna e gadrevi kina vakalevu vei keda edaidai na “vosota.” (Iperiu 10:36) Ke sega gona o ira na tacida lotu Vakarisito, o cei tale ena uqeti keda meda vosota?

Me vaka ena gauna makawa, e soli tale tu ga na galala vei ira na lotu Vakarisito nikua mera vakatusa nodra vakabauta “ena loma ni ivavakoso.” Dua na sala e rawa ni vakayacori kina oqori sa i koya na vakamacala ena soqoni ni ivavakoso. Kua ni vakalailaina na yaga ni noda vakamacala. Kena ivakaraitaki, na vakamacala e sereka na iwali ni leqa se kena levei, e sega ni vakabekataki ni rawa ni vakaukauataka na nodra lomadei na tacida mera muria na ivakavuvuli vakaivolatabu. Na vakamacalataki ni tikinivolatabu e sega ni lavetaki, se na kena kau mai na vakasama e rawati mai na nona vakekeli e dua ina Vosa ni Kalou, e rawa ni uqeti ira tale ga na so mera vakavinakataka na nodra dau vuli vakataki ira.

Na noda kila ni na yaga vei keda na noda vakamacala ena soqoni, vakatale ga kina vei ira na so, e dodonu me uqeti keda kece na iVakadinadina i Jiova meda kua ni datuvu se madua. E bibi tale ga vei ira na qase kei ira na dauveiqaravi vakaitalatala mera vakamacala ena soqoni, nira nuitaki sara ga mera liutaka na vakamacala kei na nodra dau tiko ena soqoni. E rawa vakacava ni vakavinakataka e dua na lotu Vakarisito na nona vakamacala kevaka e raica ni dau dredre?

So na Vakatutu Yaga

Nanuma tiko ni tiki ni veiqaravi vei Jiova na vakamacala ena soqoni. E tukuna e dua na tacida yalewa lotu Vakarisito mai Jamani me baleta nona dau vakamacala. “Au vakavotuya tiko kina vei Setani ni guce na nona sasaga me vagalui keda na tamata ni Kalou meda kua ni vakamacalataka na noda vakabauta.” E kaya tale ga e dua na tacida tagane e se qai papitaiso vou ena ivavakoso vata ga oqori: “Niu dau saumitaro, au dau masu vakalevu.”

Vakavakarau vinaka. Kevaka o sega ni dau vakarautaka na veika ena vulici ena soqoni, ena dredre mo vakamacala qai sega ni cakayaco vei ira na rogoca. E so na vakatutu ni vakamacala ena soqoni e koto ena ivola Me Yaga Nomu Curu ena Koronivuli ni Vuli Vunau, tabana e 70.a

Me nomu isausau me bau dua rawa mada ga na nomu vakamacala ena veisoqoni kece. Kena ibalebale mo vakarautaka tu e vica na isaunitaro, na levu ga ni gauna o laveta kina na ligamu ena rawarawa vua e veitauri ena vuli me digi iko. E rawa sara ga ni o tukuna rawa vua na taro o na via sauma. Oqo ena veivuke sara vakalevu vei ira era se vou. Dina ga ni na via dredre mo laveta na ligamu “e nai soqosoqo levu,” ia kevaka o kila ni oya na parakaravu o sa vakarautaka vinaka tu mai, ena namaka tale ga me raica na ligamu o koya e veitauri ena vuli, oqo ena uqeti iko sara ga mo vakamacala.

Saumitaro rawa e liu ni se qai tekivu ga na vuli. Ena dredre mo cakava e dua na ka ke o lokuyara tiko ga. Ena vinaka gona ke o saumitaro rawa e liu. Ni o cakava oqori o na kurabuitaka ni sa na rawarawa vei iko mo vakamacala vakarua se vakatolu ena dua ga na vuli.

Digia e dua na vanua vinaka mo dabe kina. E so e rawarawa vei ira mera vakamacala nira dabe toka ena iyatu e liu ni Kingdom Hall, ni sega ni levu kina na veika e dau veivakasosataki. Ena rawarawa tale ga vei koya e taura na vuli me raici iko. Ke o cakava oqori, nanuma tiko mo vakamacala toka e cake, vakabibi ena ivavakoso e sega kina na gusunivosa.

Vakarorogo vinaka. Oqo ena vukei iko mo kua kina ni tokaruataka na veika sa vakamacalataki oti. Na nodra vakamacala tale ga e so ena rawa ni vukei iko mo nanuma kina e dua na tikinivolatabu se na vakasama e rawa ni o kuria kina na ivakamacala oya. Ena so na gauna na ivakatautauvata lekaleka e rawa ni vakavotuya mai na tikina e veivosakitaki tiko. E yaga sara na mataqali vakamacala vaka oya.

Vulica mo kua ni wilika nomu isaunitaro. Ke o wilika na nomu isaunitaro e rawa ni vakaraitaka ni o sa taura na kena isau dodonu, e sala vinaka tale ga mo tekivu vakatovotovo kina ena saumitaro. Ia, ni toso na nomu dau saumitaro, ke o saga mo vakamacala ena nomu vosa ga e dusia oya ni o kila vinaka na tikina e veivosakitaki tiko. E sega gona ni gadrevi me wiliki sara ga na vosa e volai tiko ena noda ivola nida sauma na taro. Ni o keda na iVakadinadina i Jiova eda sega ni dau wiligusutaka tu ga na ka e volai ena noda ivola.

Vakamacala ga ena ulutaga e veivosakitaki tiko. E sega ni veiganiti na vakamacala e sega ni lako vata kei na vakasama e vulici tiko. Kena ibalebale ni nomu vakamacala me salavata sara ga kei na ulutaga. Oqo ena vukea vakalevu na veivosakitaki ni ka vakayalo e veiuqeti qai salavata kei na usutu.

Nomu isausau mo veiuqeti. Dua na inaki levu ni vakamacala oya meda veiuqeti, meda levea gona na vakamacala e rawa ni veivakayalolailaitaki. Kua ni sauma kece na parakaravu ni na sega na ka mera vakamacala tale kina o ira na kena vo. Ke talimagimagi se vereverea na noda vakamacala ena buawa na kena ibalebale. Na vakamacala leleka ga e dau cakayaco, ena uqeti ira tale ga era se vou mera sauma ga vakalekaleka na taro.

Nodra iTavi na Veitauri ena Soqoni

Dina ga ni rawa ni veiuqeti na noda vakamacala, ia e bibi sara na nona itavi o koya e veitauri ena vuli. Me vakaraitaka gona na nona kauaitaka na ivakamacala kece ena nona vakarogoca vinaka kei na nona raici koya vakayalololoma e vakamacala, me kua ni cakava tale tiko e dua na ka me vakaraitaka nona sega ni kauai. Ena ca ke sega ni dau vakarorogo vinaka, ni rawa ni tokaruataka na ka e se qai saumi oti ga, se taroga tale na taro e se qai taroga oti ga!

Ena veivakayalolailaitaki tale ga ke vakamacalataka tale na veika e se qai saumi oti ga, e rawa ni nanumi kina ni sega soti ni yaga na vakamacala oya. Ia ena yasana adua, ena veiuqeti sara na ivakamacala e kauta cake mai e dua na tikina bibi me kuri kina na vakasama e veivosakitaki tiko. Me veiuqeti gona ena kena soli na ivakamacala vinaka qai yaga tale ga, e totoka sara na mataqali taro vaka oqo, ‘Eda rawa ni vakaitovotaka vakacava na ka e vulici tiko oqo ena noda ivavakoso?’ se, ‘Na tikinivolatabu cava ena parakaravu e tokona na ka e se qai saumi oti ga?’

E dodonu mera vakacaucautaki o ira era se vou se o ira na dau mamadua nira vakamacala. Oqo e rawa ni caka lo ga ni oti na vuli mera kua kina ni madua, ena rawa tale ga vei koya e taura na vuli me vakasalataki ira ke gadrevi.

Nida veitalanoa, o koya e dau liutaka tu ga na veivosaki ena vakayalolailaitaki ira na kena vo. Nira na nanuma kina o ira na vakarogoci koya tiko ni sega tale ni dua na ka e vo mera tukuna. Era sa na vakarorogo galugalu tu ga, se ra sega sara ga ni via vakatudaliga ina ka e tukuna tiko. Ena vaka tale ga oya o koya e veitauri ena vuli ke sa nona kece na veivosaki kei na vakamacala. E dodonu gona vua me taroga tale e so na taro me rawa nira sauma na vakarorogo qai dreta nodra vakasama ina usutu e veivosakitaki tiko. Ia me kua ni guilecavi, me tarogi vakavuku na mataqali taro vaka oya.

Ena sega ni gadrevi vei koya e taura na vuli me digitaki koya e laveliga e liu. Oqo e rawa ni vakayalolailaitaki ira e dau taura na gauna mera vakasamataka mada na sala mera vakamacala kina. Ke wawa ga vakalailai e rawa ni solia na gauna vei koya e se bera ni vakamacala me saumitaro. Ena vakaraitaka tale ga nona yalomatua ena nona sega ni digi ira na gonelalai mera sauma na taro e sega ni veirauti kei ira.

Vakacava ke saumi cala na taro? O koya e veitauri ena vuli me kua ni vakamaduataki koya e saumitaro. Kevaka mada ga e cala na isaunitaro ena toka ga kina e so na tikina e donu. Nona digia na tikina e rairai donu o koya e veitauri, nona veisautaka na taro, se taroga e dua tale na taro, ena rawa ni vakadodonutaka kina na isaunitaro me kua ni veivakamadualaki.

Me veiuqeti na vakamacala, e vinaka vei koya e taura na vuli me kua ni taroga na taro vaka oqo, ‘E dua tale e via vakamacala? O cei e se bera ni saumitaro?’ se ‘Oqo na iotioti ni gauna mo ni na vakamacala kina!’ Macala ni sega ni nakita o koya e taura na vuli me vakamaduataka e dua ena mataqali taro vaka oqo, ia ena rawa ni vakayalolailaitaki ira na via vakamacala e matanalevu. Me kua ni caka na ka e rawa ni ca kina na lomadra na tacida era sega ni se saumitaro. Ia, mera uqeti ga mera wasea na ka era kila ni sala oya era sa vakaraitaka tiko kina na nodra loloma. Kuria oya, ni sa digia o koya e liutaka tiko na vuli e dua me saumitaro, e vinaka me kua ni kaya, “Oti o koya da qai rogoci Brother Ka se Sister Ka.” Me rogoca mada e liu na vakamacala me qai vakatulewataka se gadrevi tale e so na vakamacala se sega.

E iTavi Dokai na Vakamacala

E bibi ena noda bula vakayalo na tiko ena soqoni vakarisito; qai itavi dokai na vakamacala kina. O koya gona, na levu ga ni noda vakacaucautaki Jiova “ena loma ni ivavakoso” ena sala talei oqo, eda rawa ni kaya nida sa muria sara tiko ga kina na ivakaraitaki i Tevita, da qai taura tale ga vakabibi na ivakasala i Paula. Na noda vakaitavi ena soqoni e vakaraitaka nida lomani ira na tacida lotu Vakarisito da qai tiki tale ga ni ivavakoso levu i Jiova. E vei tale na vanua o na via tu kina ni “sa toro voleka mai na siga”?​​—Iperiu 10:25.

[iVakamacala e ra]

[iYaloyalo ena tabana e 20]

E bibi ruarua ena soqoni vakarisito na vakarorogo kei na vakamacala

[iYaloyalo ena tabana e 21]

O koya e veitauri ena vuli e dodonu me kauaitaka na isaunitaro kece