Meda “Muria Tiko ga na ka Dina”

1. E yaga vakacava nida veivosakitaka noda mai kila na “ka dina”?

“O MAI kila vakacava na ka dina?” E macala ni levu na gauna o dau sauma na taro qori. E dua vei ira na taro era dau taroga na tacida nida sa mai veikilai. Eda taleitaka meda rogoca na sala era mai kilai Jiova kina na tacida, era lomani koya tale ga. Oti eda qai tukuna vei ira na vuna eda taleitaka kina na ka dina. (Roma 1:11) Nida dau veivosakitaka qori, eda na vakasamataka tiko ga na talei ni ka dina. Ena uqeti keda tale ga meda gumatua ni “muria tiko ga na ka dina,” ya nida qarauna na ivakarau ni noda bula me rawa ni vakalougatataka o Jiova, me vakadonuya tale ga.—3 Joni 4.

2. Na cava eda na veivosakitaka ena ulutaga qo?

² Eda na veivosakitaka ena ulutaga qo e vica na vuna eda taleitaka kina na ka dina. Oti eda na veivosakitaka na sala meda vakaraitaka tiko ga kina nida taleitaka na iloloma totoka qo. Nida cakava qori, eda na vakavinavinakataka vakalevu nona vagolei keda mai o Jiova ina ka dina. (Joni 6:44) Eda na vinakata tale ga vakalevu meda wasea yani na ka dina qori.

VUNA EDA TALEITAKA KINA NA “KA DINA”

3. Na cava na vuna levu duadua eda taleitaka kina na ka dina?

³ E levu na vuna eda taleitaka kina na ka dina. Na vuna levu duadua oya nida lomana na Kalou o Jiova, na iVurevure ni ka dina. Nida vulica nona Vosa na iVolatabu, eda kila kina ni Dauveibuli kaukaua duadua ni lomalagi kei na vuravura, e Tamada vakalomalagi dauloloma, e dau kauaitaki keda vakalevu. (1 Pita 5:7) Eda kila ni “dauyalololoma qai dauveinanumi, e berabera ni cudru, qai vuabale ena loloma e dei kei na dina.” (Lako 34:6) O Jiova e vinakata na lewadodonu. (Aisea 61:8) E rarawa vakalevu ni raica nida rarawa, e tu vakarau tale ga me vakaotia na noda rarawa kece ena gauna lokuci, io e vinakata sara ga me cakava. (Jere. 29:11) Sa bau totoka dina qori! Sa rauta meda lomani Jiova vakalevu!

4-5. Na cava e vakatauvatana kina na yapositolo o Paula na noda inuinui kei na ikelekele?

⁴ Na cava e dua tale na vuna eda taleitaka kina na ka dina? E yaga vakalevu vei keda na ka dina. Raica mada qo e dua na kena ivakaraitaki. Na ka dina ena iVolatabu e okati kina na noda inuinui ena gauna se bera mai. Ni vakamacalataka na yapositolo o Paula na yaga ni inuinui, e vola: “Na inuinui qo e ikelekele ni noda bula, e dei qai kaukaua.” (Iper. 6:19) Me vaka ga na ikelekele e taura dei tu na waqa, na noda inuinui vakaivolatabu ena vakadeitaki keda ena gauna dredre.

⁵ E vakamacalataka o Paula ena tikinivolatabu qo na inuinui vakalomalagi era mareqeta na lotu vaKarisito lumuti. Na ka e tukuna e yaga tale ga vei keda na lotu vaKarisito eda vakanamata meda bula tawamudu ena parataisi e vuravura. (Joni 3:16) E vakainaki na noda bula nida vulica na inuinui me baleta na bula tawamudu.

6-7. E yaga vakacava vei Yvonne na nona vulica na ka dina me baleta na gauna se bera mai?

⁶ Dikeva mada qo na nona ivakaraitaki e dua na tacida yalewa o Yvonne. A sega ni susu ena dina, ni se gone e dau rerevaka na mate. E vakasamataka lesu nona wilika e dua na matavosa qai sega sara ga ni guilecava rawa: “Dua na gauna sa na sega na siga nimataka.” E kaya: “Au sega sara ga ni moce rawa ena bogi niu vakasamataka na veigauna se bera mai. Au veinanuyaka ‘Sega ni inaki ni bula qo. Na cava na inaki ni noqu bula?’ Au sega ni via mate!”

⁷ Ni sa itabagone o Yvonne e sotavi ira na iVakadinadina i Jiova. E kaya: “Au sa tekivu vakabauta na inuinui meu rawa ni bula tawamudu ena parataisi e vuravura.” E yaga vakacava vei Yvonne na ka dina? E kaya: “Au sa sega tale ni yadra tu ena bogi niu leqataka na veigauna se bera mai se na mate.” Vakasamataka na yaga ni ka dina vei Yvonne, e marautaka, e tekivu wasea tale ga yani na inuinui qori vei ira eso tale.—1 Tim. 4:16.

8-9. (a) Ena dua na vosa vakatautauvata i Jisu, na cava e cakava e dua na turaga ni sa kunea na iyau? (b) Cava nomu rai me baleta na ka dina?

⁸ Na ka dina vakaivolatabu e okati tale ga kina na itukutuku vinaka me baleta na Matanitu ni Kalou. E vakatauvatana o Jisu na ka dina me baleta na Matanitu qori kei na iyau e vunitaki tu. Me vaka e tukuni ena Maciu 13:44, e kaya o Jisu: “Na Matanitu vakalomalagi e vaka na iyau e vunitaki tu ena were, e kunea e dua qai sega ni vakaraitaka. Ena levu ni nona marau, e lai volitaka na ka kece e tu vua me volia kina na were ya.” Dikeva ni a sega ni vaqara tiko na iyau na turaga qori. Ia na gauna e kunea kina, e dua na ka levu e qai cakava. E volitaka na ka kece e tu vua. Na vuna? E kila vinaka na talei ni iyau qori. E sega ni vakatauvatani rawa kei na ka kece e volitaka qori.

⁹ Vakacava e va qori nomu rai me baleta na ka dina? E macala ni vaka kina! Eda kila ni sega ni dua na ka ena vuravura qo e vakatauvatani rawa kei na noda marautaka tiko ena gauna qo na noda qaravi Jiova, vaka kina na inuinui ni bula tawamudu ena gauna se bera mai ena veiliutaki ni Matanitu ni Kalou. Na noda veiwekani voleka kei Jiova e sega ni vakatauvatani rawa kei na ka kece eda vakuai keda kina. Eda marau vakalevu nida “vakamarautaki koya.”—Kolo. 1:10.

10-11. Na cava e uqeti Michael me veisautaka na nona bula?

¹⁰ Eda dau vakuai keda ena levu sara na ka me rawa ni vakadonui keda kina o Jiova. Kena ivakaraitaki, eso era biuta na cakacaka vinaka e saulevu. Eso era sega ni vinakata na bula vutuniyau. Eso tale era veisautaka na nodra bula nira sa mai vulici Jiova. Qori na ka e cakava o Michael. A sega ni susu ena dina. Ni se cauravou e dau vuli karate. E kaya: “Au dau vakabibitaka na vakaukauayago. Eso na gauna au dau nanuma ni sega tale ni dua e siviti au.” Ia ni vulica na iVolatabu sa qai kila na rai i Jiova me baleta na itovo kaukaua. (Same 11:5) E tukuna me baleti rau na veiwatini iVakadinadina i Jiova erau vakavulici koya: “Rau sega vakadua ni tukuna me sa cegu noqu vuli karate, rau vakavulici au tiko ga ena ka dina vakaivolatabu.”

¹¹ Na levu ga ni nona vulici Jiova o Michael na levu tale ga ni nona lomani koya. E uqeti koya vakalevu na nona dau lomani ira na nona dauveiqaravi o Jiova. Toso na gauna e qai raica ni vinakati me vakatulewataka e dua na ka bibi. E kaya: “Au kila ni na dredre sara ga meu biuta na karate. Ia au kila tale ga ni na marau kina o Jiova, au vakadeitaka gona ni bibi duadua na noqu qaravi koya ni vakatauvatani kei na veika kece au sa biuta.” E vakavinavinakataka o Michael na nona kila na ka dina, e uqeti koya sara ga me cakava na veisau lelevu ena nona bula.—Jeme. 1:25.

12-13. E veisautaka vakacava na rai nei Mayli na ka dina vakaivolatabu?

¹² E vakaraitaka na iVolatabu na yaga ni ka dina ni vakatauvatana kei na rarama ni cina ena vanua buto. (Same 119:105; Efeso 5:8) E dua na tacida yalewa o Mayli, mai Azerbaijan, e vakavinavinakataka vakalevu na veivakararamataki ni Vosa ni Kalou. E susu ena vuvale duidui lotu. E Musulomani o tamana, e Jiu o tinana. E kaya: “Au vakabauta ni bula dina tiko na Kalou. Ia au dau lomatarotarotaka e levu na ka. Au dau vaqaqa, ‘Na cava e buli keda kina na Kalou, cava tale ga na yaga ni noda bula, ni oti ga eda lai vakararawataki tu me tawamudu mai eli?’ Nira kaya e levu ni ka kece e yaco e inaki ni Kalou, au dau taroga, ‘Sa lewa tu ga na Kalou na nodra bula na tamata kece qai taleitaka nodra vakararawataki tiko?’”

¹³ E vaqara tiko ga o Mayli na isau ni nona taro. Toso na gauna e vulica na iVolatabu qai mai kila na ka dina. E kaya: “E veisautaka sara ga na noqu rai me baleta na bula na veika dina au vulica ena iVolatabu. E veivakacegui sara ga na ka e vakamacalataka tu vakamatata na Vosa ni Kalou.” Me vakataki Mayli, eda vakacaucautaki Jiova, o “koya e kacivi [keda] mai na butobuto ina nona rarama uasivi.”—1 Pita 2:9.

14. Eda na vakaraitaka vakacava nida taleitaka vakalevu na ka dina? (Raica tale ga na kato “Eso Tale na iVakatautauvata.”)

¹⁴ Qori e vica na ivakaraitaki me baleta na yaga ni ka dina. E macala ga ni o kila tu e levu tale. O rawa ni vulica vakataki iko eso tale na vuna eda taleitaka kina na yaga ni ka dina. Na levu ga ni noda taleitaka na ka dina, na levu tale ga ni noda qara na sala meda vakaraitaka kina noda taleitaka.

SALA EDA VAKARAITAKA KINA NIDA TALEITAKA NA KA DINA

15. Na cava e dua na sala eda vakaraitaka kina nida taleitaka na ka dina?

¹⁵ Eda na vakaraitaka nida taleitaka na ka dina nida vulica wasoma na iVolatabu kei na ivola vakaivolatabu. Ke sa dede mada ga noda tiko ena dina, se levu tiko ga na ka meda vulica. E tukuni ena imatai ni itabataba ni mekesini qo: “Na ka dina e vaka na senikau lailai totoka ena vanua talasiga e wavokita tu e levu na co ca ni ka lasu qai voleka ni vakamatea. Ke o via raica mo vakararai vinaka sara ga. . . . Ke o vinakata me nomu, o na cuva sobu sara ga mo taura mai. Kua ni lomavakacegu ena dua ga na senikau ni ka dina. . . . Kumukumuna tiko ga, vaqaqara tiko ga.” Io, e vinakati meda gumatua ena vuli ni yaga vakalevu.

16. Na iwalewale ni vuli cava e yaga vei iko? (Vosa Vakaibalebale 2:4-6)

¹⁶ Eso era sega ni taleitaka na wili ivola kei na vuli. Ia e sureti keda o Jiova meda “qara tiko ga” e levu na ka me baleta na ka dina. (Wilika Vosa Vakaibalebale 2:4-6.) Nida cakava qori ena yaga vakalevu. Kena ivakaraitaki, e kaya na tacida tagane o Corey ni dau raica yadudua na tikinivolatabu ena nona wili iVolatabu vakataki koya. E kaya: “Au dau wilika kece na ivakamacala e ra, na idusi ni tikinivolatabu, au vakekeli tale ga. . . . Au kila e levu na ka au wilika niu muria na iwalewale qori!” Ke da vakayagataka na iwalewale qori se dua tale, eda na mareqeta na ka dina nida vakayagataka na gauna da qai saga meda vulica.—Same 1:1-3.

17. Na cava na ibalebale ni noda muria na ka dina? (Jemesa 1:25)

¹⁷ Eda kila vinaka ni sega ni yaga meda vulica wale ga na ka dina. Me yaga vei keda, e vinakati meda muria sara ga na ka dina, me laurai ena noda bula. Qori ga na sala ena vakamarautaki keda kina nakadina.(Wilika Jemesa 1:25.) Eda na vakadeitaka vakacava nida sa muria tiko na ka dina? E vakatututaka e dua na tacida tagane meda dikevi keda yadudua ena ka eda vinaka kina kei na ka meda vakavinakataka. E tukuna na yapositolo o Paula: “Se mani toso cava eda sa cakava, meda toso tiko ga i liu ena ivakarau vata ga qori.”—Fpai. 3:16.

18. Na cava meda gumatua kina ni “muria tiko ga na ka dina”?

¹⁸ Vakasamataka ga na yaga ni noda gumatua ni “muria tiko ga na ka dina”! Ena vinaka kina na ivakarau ni noda bula, eda na vakamarautaki Jiova tale ga kei ira na tacida vakayalo. (Vkai. 27:11; 3 Joni 4) Qori na vuna levu meda taleitaka kina na ka dina qai muria tiko ga.