Vosa Vakaibalebale 3:5, 6—“Kua ni Ravi ena Nomu Yalomatua”

“Mo nuitaki Jiova ena lomamu taucoko, mo kua ni vakararavi ena nomu yalomatua. Mo nanumi koya ena ka kece o cakava, ena vakadodonutaka na nomu ilakolako o koya.”—Vosa Vakaibalebale 3:5, 6, Vakadewa ni Vuravura Vou.

“Mo nuitaka na TURAGA ena lomamu taucoko, kua ni vakararavi ena nomu yalomatua, mo vakarogotaka vua na nomu sala kece, ena qai vakadodonutaka na nomu ilakolako o koya.”—Vosa Vakaibalebale 3:5, 6, New International Version.

iBalebale ni Vosa Vakaibalebale 3:5, 6

Nida cakava eso na vakatulewa bibi e dodonu meda nuitaka nona veidusimaki na Kalou o Jiovaa, da qai kua ni nuitaki keda ga.

“Nuitaki Jiova ena lomamu taucoko.” Nida cakava na ka ena sala e vinakata o Jiova, qori e vakaraitaka nida nuitaki koya. E dodonu meda nuitaka vakatabakidua na Kalou mai vu ni lomada. Ena iVolatabu, na lomada e vakaibalebaletaka na ivakarau ni lomada, noda inaki, ka eda vakasamataka kei na noda itovo. E levu gona na ka e okati nida nuitaka na Kalou mai vu ni lomada. Qo e dua na vakatulewa eda vakadeitaka kina ni kila vinaka na Dauveibuli na ka e yaga vei keda.—Roma 12:1.

“Kua ni vakararavi ena nomu yalomatua.” E dodonu meda nuitaka na Kalou nida tamata ivalavala ca. Ke da nuitaki keda se vakatulewataka ga na ka meda cakava, ena tini ga ina leqa na ka eda na rairai nanuma ni vinaka vei keda. (Vosa Vakaibalebale 14:12; Jeremaia 17:9) E uasivi duadua nona vuku na Kalou. (Aisea 55:8, 9) Eda na marautaka na bula nida vakalaivi Jiova me dusimaki keda.—Same 1:1-3; Vosa Vakaibalebale 2:6-9; 16:20.

“Nanumi koya ena ka kece o cakava.” E dodonu meda vakaliuca na rai ni Kalou ena ka kece eda cakava ena noda bula, kei na vakatulewa bibi eda cakava. Eda na kerea gona nona veidusimaki ena masu, da qai muria na ka e kaya na nona Vosa ena iVolatabu.—Same 25:4; 2 Timoci 3:16, 17.

“Ena vakadodonutaka na nomu ilakolako o koya.” Ena vakadodonutaka na Kalou noda ilakolako nida muria nona ivakatagedegede savasava. (Vosa Vakaibalebale 11:5) Eda na sega ni sikalutu ena so na leqa, ia eda na marautaka na noda bula.—Same 19:7, 8; Aisea 48:17, 18.

iKotokoto ni Vosa Vakaibalebale 3:5, 6

E tiko ena Vosa Vakaibalebale na ivakavuvuli meda marautaka na bula, me vakadonui keda tale ga na Kalou. Na imatai ni ciwa na wase e tukuni kina nona ivakasala na tama vei luvena tagane. E vakamacalataka na wase 3 na yaga ni noda mareqeta kei na noda muria nona ivakasala vuku na Dauveibuli.—Vosa Vakaibalebale 3:13-26.