iDusidusi ni iVola ni Soqoni ni Bula vaKarisito kei na Cakacaka Vakaitalatala
© 2025 Watch Tower Bible and Tract Society of Pennsylvania
ME 12-18
IYAU MAI NA VOSA NI KALOU VOSA VAKAIBALEBALE 13
Kua ni Vakacalai ena “Nodra Cina na Tamata Ca”
it-2 196 ¶2-3
Cina
Eso Tale na Kena iBalebale. E vakatauvatani kei na cina na ka eda nuitaka me vakararamataka noda sala. E tukuna na vosa vakaibalebale na duidui ni yalododonu kei na tamata ca, e kaya: “Na nodra rarama na yalododonu e serau, ia na nodra cina na tamata ca ena boko.” (Vvb 13:9) Ena serau tiko ga nona rarama na yalododonu. Kena irairai ni serau sara na rarama ni tamata ca, e totoka tale ga nona sala, ia ena tini ca. Ena raica na Kalou me butobuto nona sala, ena tarabe kina na yavana. Qori na ka ena yacovi koya e vosavakacacataka na tamana kei na tinana.—Vvb 20:20.
Ni dua e ‘boko nona cina,’ e kena ibalebale tale ga ni sega nona inuinui. E kaya e dua tale na vosa vakaibalebale: “Ni na sega na nona inuinui na tamata ca, na nodra cina na tamata ca ena boko.”—Vvb 24:20.
Vakekeli ena Vosa ni Kalou
it-2 276 ¶2
Loloma
Na loloma e rawa ni veivakaleqai. O koya e vakaraitaka na loloma dina ena qara na kilaka ena Vosa ni Kalou qai muria na veidusimaki ni yalo tabu. Kena ivakaraitaki, ena lomani luvena e dua na itubutubu. Ia ena rawa ni vakaleqa na loloma qori nona vakademeni luvena, ni solia vua na ka kece e vinakata qai sega ni bureitaka e dua na ka. Ena rairai sega ni qarava nona itavi vakaitubutubu me vakavulici luvena, eso na gauna me kuitataka. (Vvb 22:15) Na loloma va qori ena rawa ni dokadokataka nona vuvale, ena tini nanumi koya ga kina. E tukuna na iVolatabu ni o koya e cakava qori e sega ni lomani luvena, ia e cati koya, ni muria na ivakarau ena sega ni vakabulai luvena kina.—Vvb 13:24; 23:13, 14.
ME 19-25
Vakekeli ena Vosa ni Kalou
it-2 1094
Vakasama
O koya e dau vakayagataka nona vakasama ena rawa tale ga ni cati. Qori na ka e rairai vakamacalataki ena Vosa Vakaibalebale 14:17: “Na tamata e vakasamataka vinaka na ka e cati.” Levu na gauna o ira na sega ni dau vakasamataka vinaka na ka, era cati ira na vakayagataka vinaka nodra vakasama. Na kena ivakavuvuli e baleti ira tale ga na vakayagataka nodra vakasama mera cakava na loma ni Kalou, ya nira na cati kina. Me vaka e tukuna o Jisu Karisito: “Ni dou sega ni vakavuravura, au digitaki kemudou ga mai vuravura, qo na vuna ena cati kemudou kina o vuravura.” (Jn 15:19) Ia na vosa taumada ni ‘vakasama’ ena Vosa Vakaibalebale 14:17, e rawa ni kena ibalebale tale ga na dau lawaki. Koya gona na tikinivolatabu qori e rairai dusia ni o koya e dau lawaki, ena cati. Qori sara ga na ka e tukuna eso tale na vakadewa: “Na tamata sa daulawaki ca sa na cati.”—JP, Ro.
JUNE 2-8
Vakekeli ena Vosa ni Kalou
it-1 629
Veivakavulici
Vinaka ni Muri, ca ni Sega ni Muri. Era vakaraitaka na tamata ca, ira na lialia, se o ira na tawayaga nodra sega ni taleitaka na veivakavulici i Jiova, ya nira cata sara ga. (Sm 50:16, 17; Vvb 1:7) Na ca ni nodra sega ni muria, e vinakati tale kina mera vakadodonutaki, vakalevu ga me tau na itotogi bibi. Me vaka e tukuni ena vosa vakaibalebale: “Era vakavulici ga na lialia ena nodra lialia.” (Vvb 16:22) Era na rairai vakavuna ga nodra dravudravua, madua, tauvimate, kei na matedole. E vakadinadinataki qori ena kedra ivolatukutuku na Isireli. Era sega ni via rogoca na veivunaci kei na veivakadodonutaki era tukuna na parofita. Era sega ni muria na veivakavulici i Jiova, ya na vuna e sega ni taqomaki ira kina se vakalougatataki ira. Kena itinitini, era vakila na mosimosi ni veivakadodonutaki sa tukuni oti mai, ya mera valuti ra qai kau vakavesu.—Jr 2:30; 5:3; 7:28; 17:23; 32:33; Ose 7:12-16; 10:10; Sef 3:2.
JUNE 9-15
Vakekeli ena Vosa ni Kalou
it-1 790 ¶2
Na Mata
Ena kilai ena irairai ni matana e dua na ka e tu e lomana. E rawa ni vakaraitaka na loloma se sega (Vkr 19:13); e rawa ni “bobomataidua” se ‘sauriva’ ena yaloca, se bukana na ka ca. (Sm 35:19; Vvb 6:13; 16:30) O koya e sega ni via raica se via vukea e dua tale, e rawa ni tukuni ni sogota se bobo na matana. (Mac 13:15; Vvb 28:27) E tukuni ni matadra na lialia e “veiraiyaki ina iyalayala kei vuravura,” e sega ni dei ena dua na ka, e veituyaki nona vakanananu, e sega ni tiko ena vanua dodonu me tiko kina. (Vvb 17:24) Na nona bulabula e dua, nona kaukaua, se nona marau ena laurai ena irairai ni matana. (1Sa 14:27-29; Vkr 34:7; Jop 17:7; Sm 6:7; 88:9) E tukuna vei Jiova o Tui Josafati: “Keimami rai ga vei kemuni.”—2Ve 20:12.
JUNE 16-22
Vakekeli ena Vosa ni Kalou
it-2 271-272
Madigi
Era dau vakawirimadigi ena gauna makawa me vakatulewataki kina e dua na ka. Kena ivakarau me biu na vatu lalai se tikinikau ena ilobi ni nona isulu o koya e dabe tiko, se dua na ka vakalomana, oti qai yavalati. Na madigi e lutu se tomiki, ya na kena e digitaki. Na vakawirimadigi e dau salavata kei masu, me vaka ga ena vosa bubului. Oti sa qai waraki na vakatulewa i Jiova. Ni vosa madigi (Iper., goh·ralʹ) e rawa ni kena ibalebale, “iwasewase” se “ivotavota.”—Jos 15:1; Sm 16:5; 125:3; Ais 57:6; Jr 13:25.
Vanua e vakayagataki kina. E kaya na Vosa Vakaibalebale 16:33: “E viritaki na madigi, ia na kena lewa kece e vu mai vei Jiova.” Na ivakavakayagataki donu ni madigi e Isireli, ya me tarovi kina na veiba: “Na vakawirimadigi e vakaotia na veiba, e vakatulewataki rau na ito qaqa.” (Vvb 18:18) E sega ni dau vakayagataki ena qito se veimauilavo. Ena sega na beti, se na ka e rawati kina, me dua e lusi se wini. E sega ni caka na vakawirimadigi mera vutuniyau kina na bete se vakaiyau kina na valenisoro, se vukei kina e dua. Ia eratou nanumi ratou ga na sotia ni Roma eratou vakawirimadigitaka na isulu nei Jisu, me vaka e tukuni ena Same 22:18.—Mac 27:35.
JUNE 23-29
Vakekeli ena Vosa ni Kalou
it-1 515
iVakasala, Daunivakasala
E itaukei ni vuku o Jiova. E sega ni dua e rawa ni vakasalataki koya. (Ais 40:13; Rom 11:34) E “Daunivakasala Vuku” o Luvena, e rawa ni veidusimaki. E dau muria na ivakasala nei Tamana, e sobuti koya tale ga na yalo tabu. (Ais 9:6; 11:2; Jn 5:19, 30) Me rawa ni yaga na ivakasala, e bibi me okati tiko kina o Jiova. Ke saqati kina o koya e Cecere Duadua, ena tawayaga. Ena sega ni wili me ivakasala.—Vvb 19:21; 21:30.
JUNE 30–JULAI 6
Vakekeli ena Vosa ni Kalou
it-2 196 ¶7
Cina
E tukuni ena Vosa Vakaibalebale 20:27: “Na icegu ni tamata na cina i Jiova, e cinava na tikina kece e lomana.” Ni dua e kaburaka na ka e tu e lomana, e vinaka se ca, e vakaraitaka na ka e kilai kina, se na ka e tu e lomana.—Vakatauvatana Cak 9:1.