Era Yaga Vakalevu na Dauveiqaravi ni iVavakoso

E VOLA na yapositolo o Paula ina ivavakoso mai Filipai: “O keirau o Paula kei Timoci, keirau dauveiqaravi i Karisito Jisu, vei kemuni kece na yalosavasava oni tisaipeli i Karisito Jisu oni tiko e Filipai, o kemuni na ivakatawa kei na dauveiqaravi ni ivavakoso.” (Fpai. 1:1) O raica eke ni kidavaki ira tiko na dauveiqaravi ni ivavakoso o Paula. O ira na tagane qo era qarava na itavi bibi ena nodra vukei na qase ni ivavakoso ena gauna ya. Qori tale ga na ka era cakava tiko nikua. Na nodra veiqaravi e yaga vakalevu vei ira na ivakatawa qai cicivaki vinaka kina na ivavakoso.

² Vakacava o kilai ira na dauveiqaravi ena nomu ivavakoso? O kila ni itavi era qarava tiko e yaga vei iko kei na ivavakoso? E marautaka o Jiova na nodra veiqaravi na tagane qo. E vola o Paula: “Ena rogo vinaka o koya e vinaka nona veiqaravi, ena doudou tale ga me tukuna yani na nona vakabauti Karisito Jisu.”—1 Tim. 3:13.

IVAKATAGEDEGEDE VAKAIVOLATABU ME SAUVA NA DAUVEIQARAVI

³ Bibi me lotu vaKarisito matua na dauveiqaravi ni ivavakoso, me nuitaki, me qarava vinaka tale ga na nona itavi. Qori e salavata kei na ka e tukuna o Paula ena nona ivola vei Timoci, me baleta na ivakatagedegede me sauva na dauveiqaravi ni ivavakoso: “O ira tale ga na dauveiqaravi ni ivavakoso e dodonu mera matua, mera kua ni dau vosavosarua, mera kua ni dau gunu waini vakalevu, mera kua ni kocokoco ena nodra qara na sala mera rawaka ga kina, mera dei tiko ga ena vakabauta vaKarisito, ya na ka vuni tabu ni Kalou, me savasava tale ga nodra lewaeloma. Mera vakatovolei tale ga e liu me laurai se ganiti ira se sega na itavi, oti mera qai vakadonui mera veiqaravi, nira sega ni beitaki ena dua na ka. Me dua ga na watina na dauveiqaravi ni ivavakoso, me lewa vinaka na luvena kei na nona vuvale.” (1 Tim. 3:8-10, 12) Ni muri na ivakatagedegede cecere qori, ena sega kina ni dusi na ivavakoso me baleti ira na tagane era lesi ena itavi bibi.

⁴ Se ra gone se qase na dauveiqaravi ni ivavakoso, era na vakaitavi vakalevu e veivula ena cakacaka vakaitalatala. Era na vakatotomuri Jisu ena nodra gumatua ena cakacaka vakaitalatala. Nira cakava qori, era sa vakaraitaka tiko na rai i Jiova, oya mera vakabulai na kawatamata.—Aisea 9:7.

⁵ Mera ivakaraitaki vinaka tale ga na dauveiqaravi ni ivavakoso ena nodra isulusulu, sasauni, ivosavosa, itovo, kei na nodra ivakarau ni bula. Era dokai na dauveiqaravi ni ivavakoso nira yalomatua. Kena ikuri, era raica vakabibi nodra veiwekani kei Jiova kei na nodra itavi dokai ena ivavakoso.—Taito 2:2, 6-8.

⁶ O ira na tagane qo era “vakatovolei” ni bera nira lesi. Era vakaraitaka nira yalodina ni qaravi itavi, era vakaliuca na Matanitu ni Kalou, era tadolova tale ga na itavi kece ni veiqaravi. Era ivakaraitaki vinaka dina vei ira ena ivavakoso.—1 Tim. 3:10.

NODRA VEIQARAVI

⁷ Levu sara na itavi era qarava na dauveiqaravi ni ivavakoso vei ira na tacidra vakayalo. Nira cakava qori, sa rawa ni levu na gauna me vakayagataka na ivakatawa ena veivakavulici kei na veivakatawani. Nira lesia na itavi na ilawalawa qase, era na kauaitaka tiko na ka e rawa nira cakava yadua na dauveiqaravi ni ivavakoso kei na ka e vinakati ena ivavakoso.

⁸ Vakasamataka mada eso na itavi era qarava: Ena rairai lesi e dua na dauveiqaravi me qarava na tabana ni ivola, me rawa nida vakayagataka ena noda vuli vakataki keda kei na cakacaka vakaitalatala. Eso tale era qarava na akaude ni ivavakoso se yalava ni cakacaka vakavunau. Eso era qarava na gusunivosa, misininivosa, mera dauveivuke kei na so tale na sala mera vukei ira kina na qase. E levu tale ga na cakacaka e okati ena vakavinakataki ni noda Vale ni Soqoni kei na kena samaki, vakalevu mera dau kerei na dauveiqaravi ni ivavakoso mera veivuke ena qaravi ni itavi qo.

⁹ Ena so na ivavakoso, ena rairai lesi yadua vei ira na dauveiqaravi na itavi kece qori. Ia ena so tale na ivavakoso, ena rairai qarava e dua na dauveiqaravi e vica vata na itavi. Ena so na ituvaki, era na rairai qarava e vica na dauveiqaravi ni ivavakoso e dua ga na itavi. Ke lailai na dauveiqaravi, e rawa ni lesia na ilawalawa qase eso na tagane papitaiso era ivakaraitaki vinaka mera qarava eso na itavi qo. Ni caka qori, sa rawa ni tu vei ira na kila ena yaga vakalevu nira lesi ena dua na gauna mera dauveiqaravi. Ke sega na tacida tagane, e rawa nira vakayagataki na tacida yalewa era ivakaraitaki vinaka mera veivuke ena so na itavi, ia era na sega ni lesi mera dauveiqaravi ni ivavakoso. Ni dua e ivakaraitaki vinaka, eda na via vakatotomuria nona ivalavala kei na ivakarau ni nona sokalou. Qori ni tiko wasoma ena soqoni, vakaitavi ena cakacaka vakaitalatala, bula vakavuvale, ka ni veivakamarautaki e digia, isulusulu, sasauni kei na so tale.

¹⁰ Ke vica toka ga na qase ni ivavakoso, e rawa nira vakayagataki na dauveiqaravi ni ivavakoso matua mera dikeva na taro ni papitaiso. Qori na taro e vauca na ivakavuvuli vakaivolatabu e tiko ena iKuri, Wase 1, “Vakabauta vaKarisito,” kei na Wase 2, “Bula vaKarisito,” e baleta tiko na veika bibi meda dui vakatulewa kina, e dodonu me dikeva ga na qase ni ivavakoso.

¹¹ Ke tiko e dua na vuna vinaka, e rawa ni lewa na ilawalawa qase me veisau ena so na gauna na nodra itavi yadua na dauveiqaravi ni ivavakoso. Ia e yaga vakalevu ke qarava tiko mada ga e dua na itavi na dauveiqaravi ena loma ni dua na gauna mera kenadau kina.

¹² Ni laurai na ituvaki, eso tale na itavi e rawa ni lesi vei ira na dauveiqaravi era “raica na tamata kece” na nodra toso. (1 Tim. 4:15) Ke ra lailai na qase, e rawa nira lesi na dauveiqaravi mera ivukevuke ina iwasewase lalai, se so na ituvaki mera dauveiqaravi ni iwasewase lalai, ra qai cakacaka vakavoleka kei ira na qase. E rawa nira lesi na dauveiqaravi ni ivavakoso mera qarava eso na itavi ena Soqoni ni Bula vaKarisito kei na Cakacaka Vakaitalatala, mera liutaka na Vuli iVolatabu ni iVavakoso ke gadrevi, mera vunau tale ga ena vunau soqovi levu. E rawa ni lesi vei ira eso tale na itavi ke gadrevi dina, mera rawata tale ga na kena ivakatagedegede me salavata kei na itavi qori. (1 Pita 4:10) E dodonu mera tu vakarau na dauveiqaravi mera vukei ira na qase.

¹³ E duidui na nodra itavi na dauveiqaravi kei ira na qase, ia era veiqaravi tabu kece vei Jiova, qai yaga vakalevu ena cici vinaka ni ivavakoso. Ni toso na gauna, ke ra qarava vinaka nodra itavi na dauveiqaravi ni ivavakoso, ra rawata tale ga na ivakatagedegede ni ivakatawa, ra qai qasenivuli maqosa, sa rawa nira vakaturi mera qase.

¹⁴ Ke o dua na tacida itabagone, se o qai papitaiso ga, vakacava o saga tiko mo dua na dauveiqaravi ni ivavakoso? (1 Tim. 3:1) Dua na ka na levu ni tamata era gole tiko mai na dina e veiyabaki, e vinakati kina na tagane vakayalo mera veiqaravi ena ivavakoso. O rawa ni veiqaravi ke o bucina na yalo ni veivuke. Dua na sala mo cakava kina qori, oya mo vakasamataka vakatitobu na ivakaraitaki uasivi i Jisu. (Maciu 20:28; Joni 4:6, 7; 13:4, 5) Ni o vakila na yaga ni soli ka, ena gu na lomamu mo veiqaravi. (Caka. 20:35) Mo tu vakarau gona ni veivuke, mo veivuke ena vakavinakataki ni Vale ni Soqoni, se veisosomitaki ena dua na itavi ena Soqoni ni Bula vaKarisito kei na Cakacaka Vakaitalatala. E okati tale ga ena nomu via veiqaravi, oya na nomu bucina na itovo vakayalo. Ena rawa ga qori ke dua nomu ituvatuva vinaka ni vuli vakataki iko. (Same 1:1, 2; Kala. 5:22, 23) Kena ikuri, o koya e via veiqaravi ena nuitaki qai qarava ena yalodina na itavi e lesi vua ena ivavakoso.—1 Kor. 4:2.

¹⁵ Era lesi ena yalo tabu na dauveiqaravi mera veivuke ena ivavakoso. E rawa nira vakavinavinakataka na ivavakoso na nodra gumatua na dauveiqaravi nira veitokoni ena nodra qaravi itavi. Ena sala qo, o sa na vakaraitaka tiko kina ni o doka na isolisoli i Jiova, me qaravi vinaka kina na nona vuvale.—Kala. 6:10.