Kato ni Taro

◼ Cava e vinaka kina meda lako ga ena ivavakoso eda tiko ena kena yalava?

Eda uqeti ena ivavakoso meda ‘veivakatakatai, meda dau loloma ka ivalavala vinaka.’ (Iper. 10:24, 25) Eda vulica kina na ka dina da qai vakarautaki meda vakayacora vinaka noda itavi ni veivakatisaipelitaki. (Maciu 28:19, 20) Eda vakaukauataki meda yalodina ni vosota na veivakatovolei, ra qai tu tale ga na ivakatawa dau loloma mera vukei keda ena bula dredre kei na lomaocaoca ni gauna oqo. O koya gona, e yaga dina na ivavakoso ena noda bula vakayalo. Ia, e dua beka na kena yaga noda lako ena ivavakoso eda tiko ena kena yalava?

E duidui na keda ituvaki yadua, me vaka na cakacaka, e tawavakabauta beka na keda isa, se dredre na gaunisala ni veilakoyaki, e rawa ni vakatau kina na noda vakatulewataka na ivavakoso eda lewena. Ia, e yaga dina vei keda vakayalo, vakayago, ke da lewena ga na ivavakoso eda tiko ena kena yalava. Ena rawa vei ira na qase mera veitaratara totolo kei ira kece na dautukutuku ke yaco e dua na leqa. E kau cake tale ga mai ena Kato ni Taro ni Noda Cakacaka Vakaitalatala ni Matanitu vakavalagi ni veiyabaki sa oti e so na kena yaga.​—Me 1991, Maji 1976, kei na Janueri 1967.

E yaga dina ke da lewena ga na ivavakoso eda voleka kina, eda rawa ni yaco totolo yani meda veikidavaki kei ira na tacida, da qarava rawa e so na itavi, da qai donuya na lagati ni imatai ni sere kei na masu. Ke da tiko veitikivi kei ira na tataleitaki vou, ena rawarawa vei keda meda veitaratara kei ira, vuli iVolatabu, qai kauti ira ina ivavakoso e voleka vei ira.

Eda nuidei ni na masulaka na ulunivuvale na ka oqo, ni na raica na yasana kece ni vakatulewataka na veika ena vinaka kina nona vuvale, vakayalo, vakayago tale ga.​—1 Tim. 5:8.