Yaga Vei Keda na iTuvatuva ni Vulivola ni iVavakoso
1. E yaga vakacava vei keda na lima na soqoni e veimacawa?
1 Na lima na soqoni e veimacawa e duidui na kedra inaki vakakina na kedrai cakacaka. Ia, era bibi kece nira vukei keda meda ‘vakasamataka na sala meda dui veivakauqeti kina ena loloma kei na cakacaka vinaka.’ (Iper. 10:24, 25, VV) Ia vakacava na Soqoni ni Vulivola ni iVavakoso, na cava soti na kena yaga vei keda?
2. Na cava na yaga ni vulivola vakaiwasewase lalai?
2 Noda Toso Vakayalo: E dau lailai ga era tiko ena vulivola ni vakatauvatani kei na vo ni soqoni. Oya na vuna e vanua vinaka kina ni veikilai, qai veiuqeti vakayalo. (Vkai. 18:24) Vakacava, eda dau saga meda kilai ira kece era tiko ena noda iwasewase ni vulivola, qai cakacaka vakavunau vata kei ira? Na soqoni ni vulivola ena vukei koya tale ga na kena ivakatawa me kilai ira vinaka na lewe ni nona vulivola, qai vakayaloqaqataki ira.—Vkai. 27:23.
3. E vukea vakacava noda saumitaro na tiko ena vulivola, kei na cava ena uqeti ira na vuli iVolatabu mera tiko tale ga kina?
3 Vakacava, eda sa bau sureta na noda vuli iVolatabu mera tiko ena vulivola? O ira na tataleitaki era dau madua na tiko ena noda soqoni vakaivavakoso, e rawa nira tiko ena vulivola baleta ni lailai ga era lewena, qai caka tale ga ena dua na vale. Na veimaliwai veivolekati vaka oqo ena rawarawa kina vei ira na vuli iVolatabu kei ira na gone mera saumitaro. Nida le lailai ga, ena rawa kina nida saumitaro vakalevu meda vakacaucautaki Jiova.—Same 111:1.
4. Sala cava e veiganiti kina na vanua ni vulivola?
4 Na vulivola e dau vakayacori ena vanua veiganiti ena noda yalava. Meda nanuma tiko ni sega ni rawa nida biu kece ena dua na vanua e voleka ga vei keda. Ia e rawarawa cake noda tiko ena vulivola baleta ni dau voleka ga na vanua e vakayacori kina mai na noda gole ina soqoni vakaivavakoso. E rawa tale ga ni caka na sota ni cakacaka vakavunau ena vanua ni vulivola.
5. Sala cava e rawa ni vukei keda kina na ivakatawa ni vulivola ena cakacaka vakavunau?
5 Noda Cakacaka Vakavunau: E dodonu vua na ivakatawa ni vulivola me vukei ira na lewe ni nona vulivola mera vakaitavi wasoma ena cakacaka vakavunau, me rawa kina ni vuavuaivinaka, ra marautaka tale ga. O koya gona, ena saga me cakacaka vata kei ira kece na lewena, qai vukei ira ena basoga kece ni cakacaka vakavunau. Ke via dredre toka na noda vakayacora e dua na taba ni cakacaka vakavunau me vaka na veisikovi lesu, e rawa sara ga nida kere ivakasala vua na ivakatawa ni vulivola. Ena qai rawa ni lesia e dua na dautukutuku matua meda cakacaka vata. Ena vakavinakataka tale ga noda caka vuli iVolatabu na noda dikeva matua na ivakarau ni nona veivakavulici na ivakatawa ni vulivola ena gauna ni vuli.—1 Kor. 4:17.
6. Na cava na yaga ni noda muria na ituvatuva ni vulivola?
6 Sa dua dina na ituvatuva vakayalololoma na Vulivola ni iVavakoso! Na ituvatuva oqo i Jiova e vukei keda meda dei tiko ga ena nona i soqosoqo, vakauasivi ena gauna dredre eda sa bula tu kina oqo.—Same 26:12.