2 Timoci 1:7—“Sega ni Solia Mai Vei Keda na Kalou na Yalo ni Rere”

“Ni sega ni solia vei keda na Kalou na yalodatuvu, e solia ga na yaloqaqa, na yalololoma, kei na yalomatua.”—2 Timoci 1:7, iVakadewa ni Vuravura Vou.

“Ni sa sega ni solia mai vei keda na Kalou na yalo ni rere: na yalo ni kaukauwa ga, kei na yalololoma, kei na yalomatua.”—2 Timoci 1:7, New King James Version.

iBalebale ni 2 Timoci 1:7

Na Kalou e rawa ni vakayaloqaqataka e dua me caka dodonu. E sega tale ga ni vinakata na Kalou me dua e rawai ena “yalodatuvu.” Ni rawa ni vakavuna me cakava na ka e sega ni vakamarautaka na Kalou.

Dikeva mada qo e tolu na itovo vakalou e cavuti ena tikinivolatabu qo ena vukei keda meda kua ni rere se datuvu.

“Yaloqaqa.” Era yaloqaqa na lotu vaKarisito nira qarava na Kalou, dina ga nira sotava e levu na meca kei na ituvaki dredre. Era sega vakadua ni bau rere. (2 Korinica 11:23-27) Cava e vukei ira mera cakava qori? E kaya na yapositolo o Paula: “Au rawata na ka kece ena vuku i koya e vakaukauataki au.” (Filipai 4:13) Kena ibalebale, na Kalou e solia vei ira “na kaukaua e uasivia na kaukaua ni tamata,” mera vosota kina ituvaki kece era sotava.—2 Korinica 4:7.

“Yalololoma.” Ni dua e lomana vakalevu na Kalou, ena yaloqaqa me caka dodonu. Na nona lomani ira tale ga na tamata ena uqeti koya me vakaliuca na veika e baleti ira eso tale, ke mani sotava mada ga na veitusaqati se veika rerevaki.—Joni 13:34; 15:13.

“Yalomatua.” Ena iVolatabu, na yalomatua e vakaibalebaletaka nona rawa ni yavutaka vakaivolatabu e dua na lotu vaKarisito na nona vakatulewa. Ena saga tale ga me donu tiko ga na nona rai, qai sega ni tavaiyaya ena gauna e sotava kina na ituvaki dredre. Ena rawa ni yavutaka nona vakatulewa ena rai ni Kalou, ni kila e bibi cake vua nona veiwekani kei koya mai na nodra rai eso tale.

Tikina Yavolita na 2 Timoci 1:7

E vola na yapositolo o Paula na ivola na iKarua ni Timoci. Qo na nona ivola vei Timoci na nona itokani lomani, rau veiqaravi vata tale ga. E vakayaloqaqataka tiko na cauravou qo me tomana tiko ga na nona gugumatua ena cakacaka vakaitalatala. (2 Timoci 1:1, 2) E rairai dau mamadua o Timoci, qori e vakavuna me sega ni solia nona vinaka kece ena ivavakoso vaKarisito. Ia e kaya vua o Paula me kua ni guilecava ni sa soli vua e dua na iloloma talei, ya na nona rawa ni veiqaravi ena ivavakoso. Me vaka ni dua na ivakatawa ena ivavakoso o Timoci, e uqeti koya o Paula me vakayagataka vinaka qori ena kena vunautaki na itukutuku vinaka. Me vosota tale ga kina na ituvaki dredre ena vuku ni nona vakabauta.—2 Timoci 1:​6-8.

Dina ni volai na ivola qo vei Timoci, ia e rawa ni vakayaloqaqataki ira kece na via qarava na Kalou ena gauna qo. Se mani ituvaki dredre cava era sotava, na Kalou ena vukei ira mera yalodina tiko ga.