Kunei na Ka a Yali

Ena yabaki sa oti, e Maryland, mai Mereke, a sega ni taleitaka e dua na turaga na ivoladraudrau Na Vale ni Vakatawa kei na Yadra! Ia, e kerea o luvena goneyalewa me taura, mani vakadonuya o tamana. Erau savata tiko na nodratou motoka, rau biuta tiko na benu ena kavanibenu e toka volekata na nodratou vale. Nona nanuma na iVakadinadina ni na biu laivi tale ga na ivoladraudrau, e nakita me lesuva me lai raica tale mada na kavanibenu.

Sa yali na ivoladraudrau, ia sa tu e loma ni kavanibenu e dua na bausi kei na dua na taga ni ilavo. Sega ni bera sa qiriti sara na marama e volai tu na yacana kei na nona itikotiko ena bausi. Ni rau yaco yani na veiwatini iVakadinadina oqo e nona vale, rau raica sara e dua na marama uabula ni kauta tiko e dua na ose me lai biu ena kena ba. E vaka oqo na ka e kaya na marama oya ni rau sa solia vua na iyaya: “Vinaka noqu Kalou, era tiko e ke na noqu iyaya dredre kece​—na noqu ivolatara ni biu vanua, na noqu ivola ni jeke, na credit card, kei na ivolanikawa ni ose.” E kaya ni a butakoci ena bogi na iyaya oya. Ni vakarau kautani na benu, e kalougata dina ni raici tale na kavanibenu.

E via saumi rau vakailavo na marama oya. Erau sega ni taura na veiwatini na ilavo, ia rau solia ga vua na ivola Na Cava e Loma ni Kalou vei Keda? E dolea ena nona sainitaka e dua na jeke na marama oya me vakayagataki ena kena tokoni na veisoliyaki ni ivola yavutaki vakaivolatabu vaka oqo e vuravura raraba. Me tekivu mai na gauna oya sa dau taleitaka o koya na vuli iVolatabu.

Ke oni gadreva e dua na ilavelave ni ivola e 32 na taqana, Na Cava e Loma ni Kalou vei Keda?, vakalewena na fomu ni kerekere e toka e ra, qai vakauta mai ena itikotiko e volai koto kina, se ena itikotiko veiganiti era koto ena taqana e 5.

◻ Au kerea me dua na noqu ivola Na Cava e Loma ni Kalou vei Keda?

Vosa o vinakata kina․

◻ Au kerea me dua e mai vakavulici au wale e vale ena iVolatabu.