NA RAI NI IVOLATABU

“Na Qito Rerevaki”—O na Douvaka na Qito Rerevaki?

“ENA GAUNA QO, LEVU ERA SEGA NI SARAVA WALE GA NA QITO REREVAKI, ERA LADE MAI NA PARASUTU, LILI SOBU ENA YASA NI ULUNIVANUA, VODO BAVELO ENA SAVU, RA NUNU TALE GA KEI NA QIO.”—NIUSIPEPA THE WILLOW GLEN RESIDENT.

QORI e vakamacalataka na ka sa laurai tiko ena qito. Sa takalevu ena gauna qo na qito rerevaki. Levu era cakava tale ga na ka rerevaki ena nodra basikeli, nodra qiqi ni vakatasisisi ena ucacevata (snowboard) kei na nodra qiqi ni vakatasisisi e vanua (skateboard). E tukuna na mekesini na Time, ni takalevu na qito va qo nira vinakata e levu mera cakava na ka rerevaki me oti kina nodra rere, ra qai marautaka na nodra bula.

Ni sa takalevu tiko na qito rerevaki va qori qai voravora na nodra ivakarau e levu ena qito mada ga e sega ni rerevaki, e levu era mavoa tiko. Ena 1997 mai Merika, e levu era curu e valenibula ena vuku ni mavoa. Me kena ivakaraitaki, e tubu ena 33 na pasede o ira na mavoa ena vakatasisisi e vanua (skateboard), e 31 na pasede ena vakatasisisi ena ucacevata (snowboard), e 20 na pasede vei ira na kaba e ulunivanua. Eso tale na qito e ca sara, levu era mate tiko ena qito rerevaki. O ira mada ga na vakaitavi kina era kila na kena rerevaki. E kaya e dua na marama e dau vakaitavi ena vakatasisisi rerevaki: “Au kila tu ga niu rawa ni mate.” E kaya e dua na turaga e kenadau ena vakatasisisi ena ucacevata, “Ke o sega ni mavoa, o sega ni sasaga tiko vakaukaua.”

Nida kila na rerevaki ni qito qori, vakacava meda vakaitavi kina na lotu vaKarisito? Ena vukei keda vakacava na iVolatabu meda vakaitavi se sega ena qito rerevaki? Nida vakasamataka na rai ni Kalou me baleta na dokai ni bula ena vukei keda meda sauma na taro qo.

Rai ni Kalou me Baleta na Bula

E tukuna vei keda na iVolatabu ni o Jiova na “ivurevure ni bula.” (Same 36:9) E bulia na kawatamata, e vakarautaka tale ga na ka meda marautaka kina na bula. (Same 139:14; Cakacaka 14:16, 17; 17:24-28) E vakaraitaka gona qori ni namaka meda mareqeta na isolisoli ni bula. Na Lawa e solia ina matanitu o Isireli e vakaraitaka ni bibi vua na bula.

E tiko na Lawa e dusimaki ira na Isireli mera taqomaka na nodra bula eso tale. Ke sega ni talairawarawa na Isireli ena lawa qori mani mate kina e dua, ena rawa ni okati me vakadavedra. Kena ivakaraitaki, ke dua e tara nona vale vou, e vakaroti me cakava e dua na bai lekaleka me wavokita na dela ni nona vale. Ke sega, ena rawa ni okati me vakadavedra ke lutu mai na dela ni nona vale e dua mani mate. (Vakarua 22:8) Ke dua na bulumakau e cumuta vakacalaka e dua mani mate, ena sega ni totogitaki na kena itaukei. Ia ke kilai ni rerevaki na bulumakau mani tukuni vua na kena itaukei, ia e sega ni vesuka vinaka qai cumuta e dua, ena okati me vakadavedra o kena itaukei, e rawa tale ga ni totogi mate. (Lako Yani 21:28, 29) E vakarautaka o Jiova na Lawa qo vei ira na Isireli ni bibi vua na bula, e vinakata mera taqomaka.

Era kila na dausokalou yalodina ke sega ni tiko e dua na lawa matata, ena cala ke ra cakava eso na ka ena vakaleqai kina nodra bula, se na nodra bula eso tale. Ena dua na ivakaraitaki vakaivolatabu, e tukuna o Tevita ni via “gunuva . . . na wai mai na mataniwai volekata na matamata e Peceliema!” Ena gauna ya era lewai Peceliema na kai Filisitia. Nira rogoca na kerekere nei Tevita e tolu na nona sotia, eratou curuma vakaukaua na nodra keba na kai Filisitia, ratou takiva mai na wai mai na mataniwai e Peceliema, ratou kauta sara vei Tevita. Na cava e cakava o Tevita? E sega ni via gunuva na wai qori, mani sova ina qele. E kaya: “Au na sega ni cakava qo mai na rai ni noqu Kalou! Meu gunuva na nodratou dra na tagane qo eratou bolemate? Ni ratou bolemate me ratou kauta mai.” (1 Veigauna 11:17-19) E sega ni vinakata o Tevita me vakaleqai na nodratou bula na nona sotia ni ratou kauta mai vua e dua na ka e vinakata.

Ni vakatovolei Jisu na Tevoro, de dua ena raivotu, me lade mai na valenisoro me raica ke ra na taqomaki koya na agilosi, e sega ni cakava qori o Jisu. E tukuna: “Mo kua ni vakatovolei Jiova na nomu Kalou.” (Maciu 4:5-7) Io, erau kila o Tevita kei Jisu ni sega ni vinakata na Kalou me rau cakava na ka rerevaki e rawa ni rau mate kina, vaka kina eso tale.

Nida dikeva na ivakaraitaki qo, eda na rawa ni taroga, ‘Eda na kila vakacava na qito e rerevaki? Eso e dau voravora na nodra ivakarau ena qito mada ga e sega ni rerevaki. Eda na kila vakacava na iwalewale donu meda muria?’

Meu Tovolea?

Na cava meda cakava meda vakatulewa vinaka kina? E bibi meda vakasamataka vinaka na qito meda vakaitavi kina. Kena ivakaraitaki, eda rawa ni taroga, ‘Vakacava, e levu era mavoa ena qito qo? E vinakati meu vulica, se tiko na iyaya me taqomaki au meu kua ni mavoa? Keu lutu se sega ni cakacaka na iyaya me taqomaki au, au na mavoa vakalailai se mavoa bibi se mate?’

Ke nakita na lotu vaKarisito me vakaitavi ena qito rerevaki, e rawa ni vakararawataki Jiova, ena sega tale ga ni ivakaraitaki vinaka. (1 Timoci 3:2, 8-10; 4:12; Taito 2:6-8) Koya gona, ena gauna mada ga ni qito, meda dau vakasamataki Jiova kei na kena bibi vua na bula.