Na Rai ni iVolatabu

E Tiko Beka na iValavala ca ena sega ni Bokoci?

E TIKO beka e dua na itotogi e rawa nida kaya ni vakaloloma sara ga, e se bau vinaka na totogi mate? Io, na nona mate e dua qai sega tale ni na vakaturi baleta ni a cakava na ivalavala ca ena sega ni bokoci. A kaya o Jisu ni tiko e dua na mataqali ivalavala ca “e na sega ga ni bokoci.”​—Maciu 12:31, VV.

Ia, e vakaraitaka na iVolatabu ni dauveivosoti na Kalou. O keda na tamata e rawa nida cudru tu vakabalavu da qai sega ni via veivosoti, ia na Kalou e dau veivosoti, e “yalololoma.” (Aisea 55:7-9) Na nona loloma mada ga e vosota kina na rarawa me tala mai na Luvena lomani me mai ibulubulu ni noda ivalavala ca. Na talei ni dra i Luvena e bokoci kina noda ivalavala ca.​—Joni 3:16, 17; Cakacaka 3:19; 1 Joni 2:1, 2.

Ena nona gauna lokuci na Kalou, ena qai vakaturi ira e levu era a cakava e so na cala bibi sara, ia era na sega ni qai lewai ena nodra cala makawa. (Cakacaka 24:15; Roma 6:23) A kaya sara mada ga o Jisu ni “sa rawa me ra kakua ni cudruvi na tamata e na vuku ni nodrai valavala ca, kei na nodra vosa ca kecega,” qai vakavo ga o koya e cakava na ivalavala ca ena sega ni bokoci. (Maciu 12:31) O na vaqaqa beka: Na cala cava sara mada e sa na bau lolovira sara ga me sega kina ni bokoca se vosota na Kalou?’

Ena Sega ni Bokoci

E tau tiko na ivakaro i Jisu vei ira era nakita nodra “vosavakacacataka na Yalo Tabu.” Na cala oqo e sa na sega tu ga ni bokoci “e na gauna oqo, se na gauna ena muri mai.” (Maciu 12:31, 32) Era na sega ni vakaturi o ira era cakava na cala vaka oqo.

Cava na kena ibalebale me dua e vosavakacacataka na yalo tabu? O koya e vosavakacacataka na yalo tabu e cala nakita, e vu sara ga mai lomana na ka e cakava, e vakavotuya na yalo ca kei na inaki ca. Sa qai bibi ga na nona cala baleta ni nakita me saqata na yalo tabu ni Kalou. Kena ivakaraitaki: E so na matanitu nikua era vakaduiduitaka na laba. Na laba e nakiti (first degree) kei na laba e sega ni nakiti (second degree). Na duidui oqo ena kilai mai na inaki i koya e laba, kei na sala e mate kina o koya e mate. E tau ga na itotogi mate vei koya e nakita nona veivakamatei, o koya e sa lalawataka yani me veivakamatei.

A tamata torosobu e liu na yapositolo o Paula, ia e qai kaya: “Sa yalo loloma vei au baleta ni’u . . . a cakacaka tu e na lecaika.” (1 Timoci 1:13, VV) E ivalavala ca ena yalo tabu o koya e nakita me saqata na yalo tabu. Na ca kei na gaga ni lomana e sa yacova e dua na ivakatagedegede e sa sega ni rawa tale kina ni suka.

E vakabauti ni ivalavala ca sara ga vaka oqo a vakasamataka tiko o Paula ena gauna e vola kina: “Sa dredre sara me vakavoui tale me ra veivutuni ko ira ka vakararamataki eliu, era a tovolea nai solisoli vakalomalagi, ka rawata na Yalo Tabu, ka tovolea na vosa vinaka ni Kalou, kei na kaukauwa ni bula ena muri mai, a ra sa qai vuki tale.” (Iperiu 6:4-6) E kaya tale ga na yapositolo: “Sa sega tale ni qai dua na i soro me na kauta tani na i valavala ca kevaka eda sa nakita me da ia tiko ga na i valavala ca ni sa tukuni oti vei keda na ka dina.”​—Iperiu 10:26, VV.

E uqeti Jisu me veivakaroti ena ivalavala ca ena sega ni bokoci na nona raica na nodra ivalavala na iliuliu ni lotu ena nona gauna. Ia, era sega ni kauaitaka nona ivakaro. Tini sara mada ga mera vakamatei koya. E muri, era sa qai rogoca na ivakadinadina ni ka veivakurabuitaki e cakava na yalo tabu. Tukuni vei ira ni sa vakaturi mai na mate o Jisu! Sega tale ni dua e rawa ni vakalasuya ni o Jisu ga na Karisito! Ia, era sega ga ni cegu. Ena ca ni lomadra ena nodra saqata na yalo tabu ni Kalou, era saumi ira kina na sotia ni Roma mera lasutaka ni butakoci na yago i Jisu.​—Maciu 28:11-15.

Ka me Qarauna na Lotu Vakarisito

Na cava mera kua ni vakawaletaka kina na lotu Vakarisito na ivakaro me baleta na ivalavala ca ena sega ni bokoci? Baleta e dina nida kilai koya vinaka beka na Kalou kei na ka e dau cakava na yalona tabu, e rawa ga ni vuki me ca na yaloda. (Iperiu 3:12) Meda kua sara ni nanuma ni na sega ni rawa ni yacovi keda oqo. Vakasamataki Jutasa Isikarioti mada. A imuri yalodina i Jisu. Na nona digitaki me dua vei iratou na 12 na yapositolo e vakaraitaka ni a kune vua e levu sara na ivalavala vinaka. Ia, e qai vakalaiva ena dua na gauna me kadre e lomana na vakasama ca, sega ni dede sa rawai koya. Sa dau butako ilavo sara tiko mada ga ena gauna e vakadinadinataka voli kina e matana na cakamana veivakurabuitaki i Jisu. Sa qai nakita me volitaka na Luve ni Kalou ena vuku ga ni ilavo.

E so era a lotu Vakarisito yalodina tu era sa nakita mera vakayawaki ira vua na Kalou nira rarawataka beka e dua na ka, ena vuku beka ni nodra dokadoka, se kocokoco. Era sa vukitani ra qai saqata vakaukaua ena gauna oqo na yalo tabu ni Kalou. Era nakita mera saqata na veika e sa cakava tiko nikua na yalo tabu. Sa ra cakava sara tiko beka ga o ira oqo na ivalavala ca ena sega ni bokoci? E kila ga o Jiova.​—Roma 14:12.

Eda sega ni via veivakalewai, ia ena vinaka meda qarauna meda kua ni cakava lo e so na cala baleta ni na rawa ni vakaukauataka na lomada. (Efeso 4:30) Eda vakacegu tale ga ni na yalololoma vei keda o Jiova, ena vosoti keda tale ga ena cala bibi eda cakava, kevaka eda veivutuni.​—Aisea 1:18, 19.

[iYaloyalo ena tabana e 23]

E so na Farisi era cakava na ivalavala ca ena sega ni bokoci