Veilomani ena Gauna ni Leqa

DAUVOLAVOLA NI YADRA! MAI NIGERIA

E VAKATOKAI na Sigatabu, 27 Janueri, 2002, e Lagos, mai Nigeria, me Sigatabu Ca. E yavalata na loma ni korolevu na kacabote ni dua na vanua ni maroroi iyaragi e koto e lomaniqele qai vakararamataka na karobo ni vanua. E vica vata na aua na kena dede qai sivia e tolu na kilomita na yawa ni vanua e ceburaka kina na gasau ni dakai kei na benu, e vakavuna nodra domobula na lewenikoro.

Sa qai kuria ga na rere na itukutuku lasu. Vuqa sa curumi ira rawa tu na rere era tabili yani ena veitolonisala, era sega ni kila na cava era drovaka kei na vanua tale ga sa ra dro tiko kina. Ni sa bogi, era le vica vata na drau na qase vaka kina e levu na gone era taqaya vakalevu, era luvu nira takosova e dua na ikelimusu. Ra rusa vakadua se vakacacani vakaca na veivale, koronivuli, kei na vanua ni bisinisi, e sega kina nodra vale kei na nodra cakacaka e vica vata na udolu. E nanumi ni 1,000 era mate ena leqa oqo. Ia, na iwiliwili a qai macala e muri e levu cake sara.

Rauta ni 1,350 na gasaukuro, rokete, kei na gasaukuro viritaki era se bera ni kacabote, era qai lai kune ena veitikotiko volekata na vanua ni maroroi iyaragi. Dua na turaga a kunea e loma ni nona vale e dua na iyaya kaukamea. Ni sega ni kila ni gasaukuro, e tomika ga, biuta ena nona motoka, qai kauta lesu vei ira na vakailesilesi ni matanitu.

Ni rogoci na itukutuku ni kacabote, e veitaratara totolo sara na valenivolavola ni tabana ni iVakadinadina i Jiova mai Nigeria kei na dua na qase ni ivavakoso e Lagos, qai dusimaki ira e 16 na ivakatawa dauveilakoyaki mera vakalewa na kedra ituvaki na 36,000 na iVakadinadina e kea. E vakauta na valenitabana e duanamilioni na naira (rauta ni $10,000 ni Mereke), kei na ivakasala me duri kina na komiti ni vakacoko me raica na veivuke.

Vei ira na iVakadinadina, a mavoa vakaca sara e dua na turaga ena miramira ni gasau ni dakai; e ka ni rarawa ni rua na goneyalewa erau mate; qai vakacacani e rua na Kingdom Hall kei na nodra vale e 45 na vuvale.

Ena 2 Feperueri, 2002, ni oti e ono na siga mai na kacabote ni vanua ni maroroi iyaragi, e carubi na veivala vakayavusa ena dua tale na yasa ni korolevu. E kaya na tabana ni Kauveilatai Damudamu, nira le 100 era mate kina, 430 era mavoa, 3,000 era cemuri mai nodra vale, qai 50 na vale era vakamai. Totolo tale e kea na yavala ni komiti ni vakacoko e qaravi ira na vakaleqai ena kacabote ni yaragi ena nodra qarai ira na tacidra lotu Vakarisito ena yasayasa oya.

E sega ni dua na iVakadinadina e mate, ni levu era lako tu ena soqo ni tabacakacaka ena gauna e tekivu kina na veivala. Ia, levu ga vei ira na lewe ni lima na ivavakoso ena yasayasa oya sa sega nodra vale mera lesu kina. Ka ni marau nira veivuke na tacidra lotu Vakarisito. E dua na vuniwai e iVakadinadina kei watina erau vakaicilitaki ira e lewe 27 era cemuri mai nodra vale.

Era cautaka vakayalololoma na kakana, isulu, kei na iyaya ni vale na iVakadinadina a sega ni tarai ira na vakacaca ni kacabote kei na veivala. E kaya na ivakatawa ni koro: “Na veika era cautaka na mataveitacini ena yasayasa vaka Lagos sa sivia tale na ka era gadreva na vakaleqai.” Sa qai volavola ga na valenivolavola ni tabana ina veivavakoso me sa rauta nodra cau. Na ivovo ni iyaya sa qai usa ena tolu na lori mera lai maroroi ena valenivolavola ni tabana.

Era veisiko na qase ni ivavakoso vei ira na vakaleqai vaka kina vei ira na vuvale e mate na wekadra. Era saga mera veivakacegui nira vakayagataka na iVolatabu. E tuvanaka na komiti ni vakacoko me vakavinakataki na veivale era vakacacani. Vakarautaki tale ga vei ira e tarai ira na leqa ruarua oqo na iyaya ni vale, isulu, na kakana kei na nodra vukei mera vakavaletaki o ira na cemuri mai nodra vale. E 90 taucoko na vuvale e vukei ira na komiti ni vakacoko.

Levu era drukataka tale nodra vukei. E kaya e dua na iVakadinadina vei iratou na komiti ni vakacoko: “Ena vo ni noqu bula, ena noqu ‘idrodro kei na noqu kaukaua’ o Jiova!”​—Same 46:1, 2.

Era raica na sega ni iVakadinadina na ivakarau ni nodra veilomani na iVakadinadina i Jiova ena gauna ni leqa. E kaya e dua na turaga vei iratou na qase ni ivavakoso nei vugona iVakadinadina a mate: “Au na lesu tale mai meu vakavinavinakataki kemudou, meu vulica tale ga e levu na ka.” E kaya tale ga vei iratou nona vuvale: “Duatani sara ga na ka au raica mai Lagos. Era sega mada ga ni cakava na veiwekani voleka na ka era cakava o ira oqo.”

[iYaloyalo ena tabana e 13]

Sinai ena lori na iyaya ni vakacoko

[iYaloyalo ena tabana e 13]

E so vei ira na vukei

[iYaloyalo ena tabana e 14]

Na veiwatini oqo erau vakaicilitaki ira e 27 era cemuri mai nodra vale

[iYaloyalo ena tabana e 14]

Ra vakavinakataki vale na iVakadinadina

[iTaba ni Credit Line ena tabana e 13]

E cake: Sam Olusegun-The Guardian