Rawati Beka na Veisaututaki e Vuravura ke Veivosakitaki?

O VINAKATA me oti vakadua na ivalu kece? E dodonu me tiko e so na kena iwali vinaka, ena nodra dau veivosaki na veimatanitu me baleta na veileqaleqati ena loma ni dua na vanua se e vuravura raraba. Era nanuma e levu ni na vakaoti ga na ivalu ke ra veitokoni na iliuliu kei vuravura. Ia, ena rairai vakayalolailaitaki iko na macala ni veivosaki vaka oya. Sa vica vata mai oqo na senitiuri na nodra vakadonuya vata na veidinadinati na veimatanitu, ra vakatura e so na iwali ni leqa, ra vakaitavi tale ga ena bose lelevu, ia lailai sara na ka era sa rawata.

Levu sara na ka e kaya na iVolatabu me baleta na kena dau yaco na veivosaki me rawa kina na veisaututaki. E saumi kina e vica na taro oqo: Na cava e vakataotaka tiko na veivosaki me baleta na veisaututaki? E dodonu beka mera vakaitavi na lotu Vakarisito ena mataqali veivosaki vaka oqo? Ena rawati ga vakacava na veisaututaki dina?

Na Cava e Vakataotaka na Veisaututaki?

E vakaraitaki ena vica na itukutuku ena iVolatabu ni rawati na veisaututaki ni rau veivosaki sara ga na ito ruarua. Kena ivakaraitaki, a qaseqase o Apikali ni lai vosa sara ga vei Tevita kei na nona mataivalu mera kua ni sauma na ca a cakava vei iratou. (1 Samuela 25:18-35) E tukuna o Jisu e dua na ivakatautauvata me baleta e dua na tui, a talai ira nona mata mera lai veisorosorovi me rawa kina nira veisaututaki. (Luke 14:31, 32) E vakadinadinataka gona e ke na iVolatabu ni rawa ni wali na veileqaleqati ke matau na veivosaki. Ia, na cava ga e lailai sara kina na ka e rawati nira veivosaki na ito ruarua era veileqaleqati tiko mera veisaututaki?

Sa tukuna oti tu na iVolatabu nida na sotava e levu na ka e dau vakatubuleqa. Ena veivakamuai cala i Setani na Tevoro, era na “dauyalayala ka lasu tale” na tamata, ra qai “daucudrucudru, era na daucati ira na tamata vinaka, era na dauveisoliyaki me mate, era na qaqa sodrosodro, era na yalolevu.” (2 Timoci 3:3, 4; Vakatakila 12:12) Me ikuri ni veika oqori, e parofisaitaka o Jisu ni na vakatakilakilataki na iotioti ni vakarau ni veika ca eda sotava tu oqo ena “[i]valu, kei nai rogorogo ni valu.” (Marika 13:​7, 8) O cei e rawa ni vakalasuya na kena sa qai takalevu tiko ga na veileqa oqori? Sa rauta gona mera guce ena nodra saga mera veisaututaki na veimatanitu.

Dikeva mada oqo: Era dau saga na mata ni veimatanitu mera kakua ni dauveisaqasaqa ena gauna era lai veivosaki kina, ia na ka dina ga era vinakata tiko oya me rawaka mai kina na nodra dui matanitu. Oqori ga na itinitini ni ka e dau yaco. E dodonu beka mera vakaitavi na lotu Vakarisito ena veivosaki vaka oqo?

Me Mata Beka ni Matanitu na Lotu Vakarisito?

E veivakaroti na iVolatabu: “Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina.” (Same 146:3) E kena ibalebale ga oqo ni sega vei ira na mata mai na veivanua na kaukaua se na igu mera bulia kina na iwali tudei ni leqa, se mani vakacava sara na inaki ni lomadra.

E kaya o Jisu ni veilewaitaki koya tiko o Ponitio Pailate: “Na noqu matanitu e sega ni matanitu ni vuravura oqo; kevaka e ka ni vuravura oqo, ke ra na vala na noqu tamata, me’u kakua kina ni soli vei ira na Jiu. Sega, e sega ni wili e ke na noqu matanitu.” (Joni 18:36, VV) Ni dau lalawataki na tiko veisaututaki e levu na gauna e sa dau veiwaki tiko kei na veicati vakamatanitu kei na kocovi ni veika vakapolitiki. O koya gona, era sega sara ga ni vakaitavi na lotu Vakarisito dina ena duiyaloyalo e yaco tu oqo e vuravura kei na sasaga ni veivakameautaki.

E kena ibalebale beka oqori nira tawaveinanumi na lotu Vakarisito, ra sega tale ga ni via kila na veika e yaco tiko e vuravura? Era sega beka ni kauai ena nodra vakalolomataki tiko na kawatamata? E sega. Na kena veibasai ga, na iVolatabu e vakamacalataki ira na dausokalou dina tiko nira tamata ga era “vutugu ka qoqolou” ena vuku ni veika ca sa yaco wavoliti ira tu. (Isikeli 9:4) Era nuitaka na lotu Vakarisito na veisaututaki e yalataka na Kalou. E ibalebale beka ni veisaututaki vei iko na kena vakaoti na ivalu? Oqori sara ga na ka ena mai cakava na Matanitu ni Kalou. (Same 46:8, 9) Me kena ikuri, ena vakadeitaka na Matanitu oqori na bula nuidei kei na tiko vinaka vei ira kece na lewe i vuravura. (Maika 4:3, 4; Vakatakila 21:3, 4) Ena sega ni rawati na veisaututaki cecere vaka oqori ena nodra veivosaki na veimatanitu se nodra sasaga na isoqosoqo ni “veitaqomaki.”

E vakamatatataka na parofisai vakaivolatabu kei na veika sa yaco oti ni dau tini ga ena rarawa na nuitaka na veisaututaki era saga ga na tamata. O ira na vakararavi vakatabakidua vei Jisu Karisito me na kauta mai na veisaututaki ra qai tokona na Matanitu ni Kalou, era na raica na kena vakavatukana na nodra gadreva na veisaututaki dina. Me kena ikuri, era na qai marautaka tiko na veisaututaki oqori me tawamudu!​—Same 37:11, 29.