Na Ka e Yalataka “na Kalou Dina Duaduaga”

NA Kalou o Jiova, a biuti rau na imatai ni veiwatini ena parataisi e vuravura​—na were o Iteni. A tukuna vei rau me rau vakaluveni rau qai ‘vakamalumalumutaka na vuravura,’ e okati tale ga kina nodrau na vakatetea na nodrau Parataisi ni sa na tubu na iwiliwili ni nodrau vuvale. (Vakatekivu 1:26-28; 2:15) Ena vakayacori beka na inaki ni Kalou vei keda na kawatamata meda marautaka na bula ena parataisi e vuravura?

Io, ena vaka kina! Me vaka e kaya na parofisai ena iVolatabu, “ena vakaotia sara na mate . . . ko Jiova” qai “tavoya na wai ni mata mai na matadra na tamata kecega.” Ni sa na yaco oqo, “a ra na qai kaya, . . . Raica, oqo na noda Kalou, eda a waraki koya, ena vakabulai keda ko koya: oqo ko Jiova, eda a waraki koya; eda na reki ka marau ni sa ia na veivakabulai ko koya.”​—Aisea 25:8, 9.

Na iotioti ni ivola ena iVolatabu e vakamacalataka na bula totoka e vuravura ni sa na kau tani na ituvaki ca ni veiliutaki i Setani ena gauna oqo. Me baleta na “vuravura vou” era na lewena na tamata era lomana na Kalou, e kaya na iVolatabu: “[N]a vale ni Kalou sa tu vei ira na tamata, ia ena tiko vata kei ira ko koya, ia era na nona tamata; ia ko koya na Kalou ena tiko vata kei ira, me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.”​—Vakatakila 21:1-4.

Era totoka dina na vosa ni yalayala oqori! Ia, eda na vakabauta beka? Vakasamataka mada na yavu eda nuidei kina ni na vakayacora na Kalou na nona vosa ni yalayala kece ga, oya na nona mate vakaisoro o Jisu vaka kina na nona cakamana.​—2 Korinica 1:20.

Solia Nona Bula o Jisu me iVoli

Ena nona vakamuai Atama o Setani me talaidredre vua na Kalou, qai valavala ca, e dewavi keda kece kina na kawa i Atama na nona ivalavala ca. “Me vaka sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca,” e kaya na iVolatabu, “sa yaco vakakina na mate ki na tamata kecega, ni sa cala na tamata kecega.” Ia, e kuria na itukutuku ena iVolatabu: “Sa vakadonui . . . na lewe vuqa e na vuku ni nona talairawarawa na le dua [na tamata uasivi o Jisu].” (Roma 5:12, 19) Me vaka eda sa raica mai ena imatai ni ulutaga, ni o Jisu “ko Atama sa muri,”​—o koya sa lako “mai lomalagi”​—e solia na nona bula “me kedra i voli na lewe vuqa.”​—1 Korinica 15:45, 47; Maciu 20:28.

O ira kece era vakabauti Jisu e rawa nira sereki mai na ivalavala ca ena vuku ni ‘ivoli’ qai rawa nira marautaka na bula tawamudu. (Efeso 1:7; Joni 3:36) E rawa gona nida marau ni Kalou o Jiova e lomani keda na kai vuravura ena nona solia na Luvena me noda iVakabula! (Luke 2:10-12; Joni 3:16) Noda vakadikeva na veika a cakava o Jisu ena vukudra na tamata era a rarawa tu ena imata ni senitiuri, e vakatitobutaka noda kila na veika e baleta na gauna se bera mai. Na veika a cakava oya o Jisu e veivakadrukai dina!

iVakaraitaki Lailai ni Vuravura Vou

A rawa vei Jisu me vakabulai ira kece na tauvimate kei ira na malumalumu era a kau yani vua. Sega ni dua na tauvimate e kau vua me sega ni vakabulai. Kena ikuri, a vakani ira vakacakamana e udolu ena vica ga na ika kei na ibuli madrai, e cakava oqo ena levu na gauna.​—Maciu 14:14-22; 15:30-38.

Ena gauna sa dolava kina o Jisu na matana e dua na turaga a sucu mataboko me rai, era kila na cakamana oqo na tiko tikivi koya kei ira era veikilai vinaka, ia o ira na iliuliu ni lotu Vakajiu era vakatitiqataka. A mani tukuna na tamata sa rai oqo vei ira na iliuliu ni lotu: “Mai na i tekivu kei vuravura e sega ni sa bau rogoci mada me dua na tamata me vakabula, me rai rawa tale, . . . na tamata e a sucu mataboko. Kevaka e a sega ni lako mai vua na Kalou na tamata oqo, ke a sega ni rawata e dua na ka.”​—Joni 9:32, 33, VV.

Ena gauna ni cakacaka vakaitalatala i Jisu, a vesu tu na tavalena, o Joni na Dauveipapitaisotaki, qai tala e rua na mata me rau lai vakadeitaka na itukutuku baleti Jisu. “E na tiki-ni-siga ko ya,” e kaya na iVolatabu, “era sa lewe vuqa sa vakabula ko koya [Jisu] mai na mate kei na rarawa, ka maivei ira na yalo ca; a ra sa lewe vuqa era sa mataboko sa lewa ko koya me ra rai rawa.” Sa qai kaya o Jisu vei rau na mata: “Tukuna vei Joni na veika drau sa raica ka rogoca; ni ra sa rai na mataboko, sa lako na lokiloki, sa vakasavasavataki na vukavuka, sa rogo na didivara, sa vakaturi cake tale na mate.”​—Luke 7:18-22.

Vakasamataka mada na veika oqo: Kevaka a yaco e dua na ka vinaka ena gauna sa sivi, e sega beka ni o na nuidei ni rawa ni yaco tale? Na nona cakamana o Jisu e ivakaraitaki lailai ga ni veika lelevu ena qai cakava ena gauna sa na veiliutaki kina vakatui ena Matanitu ni Kalou. Na nona cakamana tale ga e ivakadinadina ni a talai koya mai na Kalou, ni o koya dina ga na Luve ni Kalou.

Ena veiliutaki ni Matanitu ni Kalou, era sa na qai vakayacori dina na parofisai me baleta na veika vakatubuqoroqoro. Me vaka a tukuni tu mai, ena rai na matadra na mataboko, ena rogo na daligadra na didivara, ena ladelade na lokiloki me vaka na me kila, qai sega ni dua ena tauvimate. Sa na yaco tale ga na bula vakacegu kei na sautu e veiyasa i vuravura kece. Na manumanu sara mada ga era dau vakarerevaki tu ena gauna oqo sa ra na manoa.​—Aisea 9:6, 7; 11:6-9; 33:24; 35:5, 6; 65:17-25.

O na vinakata beka mo bula tawamudu ena ruku ni veiliutaki ni Matanitu ni Kalou ena ituvaki era cavuti koto e cake? E vakaraitaka o Jisu na ka e dodonu mo cakava ena qaqa ni nona masu vei tamana: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Mo kua sara ni laiva e dua na ka me vakalatilati ena nomu vuli tiko ga mo rawata na kilaka ena rawati kina na bula.

[iYaloyalo ena tabana e 10]

Oqo na ka e yalataka na Kalou me baleta na vuravura