Au Gu Meu Sauva na Noqu iSausau

TALANOATAKA O MARTHA CHÁVEZ SERNA

Dua na siga niu se yabaki 16, au rebo ena gauna au cakacaka tiko kina e vale. Niu vakilai au, au sa davo tu ena loga. Au veilecayaki, qai warumisa na vutu ni uluqu, au sega ni rai rawa se meu rogoca e dua na ka ena vica na miniti. E tuburi au na rere. Na cava a manati au?

RAU leqataki au na noqu itubutubu rau qai kauti au vei dua na vuniwai, e mani solia e so na vitamin. A kaya na vuniwai ni vu oqo ena noqu dau yadra sivia. Ni oti tale e vica na vula, au se baci rebo, oti oya a yacovi au tale vakadua. Keitou lai qara ivakasala vua e dua tale na vuniwai, a nanuma o koya ni dua na leqa e tiko ena noqu nave, mani solia vei au e so na vuanikau.

Ia, sa dau yacovi au wasoma tiko na mate oqori. Au dau rebo, lutu qai mavoa. So na gauna au dau katia na yamequ. Niu sa dau vakilai au tale, e dau vutu na uluqu, au lomaloma ca tale ga. E dau momosi na yagoqu taucoko, qai vakalevu meu sega ni kila na ka a yaco ni se bera niu rebo. Me rawa niu kaukaua tale, au dau davo sara tu ga me dua se rua na siga. Ia, au vakabauta ni sega soti ni na balavu na kena yacovi au tiko na leqa oqo​—ena sega ni dede au sa na bulabula tale.

E Tatara ina Noqu iSausau

Ena gauna au se gone kina, keitou sa tekivu vulica vakavuvale na iVolatabu kei ira na iVakadinadina i Jiova. E vakavulici keitou e rua na painia lavotaki, se o ira era cakacaka vakaitalatala vakatabakidua, e levu na aua era dau vakayagataka ena veivula kece mera vakavulica na iVolatabu. Au raica ni rau marau na painia ena vuku ni nodrau cakacaka vakaitalatala. Au vakila tale ga na marau oqo ena gauna au wasea kina vei noqu qasenivuli kei ira na gonevuli na vosa ni iyalayala ni iVolatabu.

Vakalailai ga oya, eratou sa iVakadinadina i Jiova e levu vei keitou e vale. Dua na ka na noqu marau na vunautaka na itukutuku vinaka! Ena gauna au yabaki vitu kina, au sa lalawataka meu na dua na painia lavotaki. Niu yabaki 16, e dua na ikalawa levu au cakava me baleta na noqu isausau, niu a papitaiso. Ni oti ga oya, e veitaravi na noqu dau rebo.

Cakacaka Vakapainia

Dina niu sotava tiko na leqa oqo, au vakabauta ni se rawa tiko ga meu dua na iVakadinadina i Jiova e cakacaka vakaitalatala vakatabakidua. Ia me vaka niu rebo tiko vakarua ena dua na macawa, e so ena ivavakoso era nanuma meu kua ni vakaitavitaki au ena itavi levu oqo. Au rarawa qai yalolailai kina. Ia, yaco na gauna me rau lewe ni ivavakoso au tiko kina e dua na veiwatini erau veiqaravi tiko ena valenivolavola ni tabana ni iVakadinadina i Jiova e Mexico. Rau rogoca na noqu inakinaki meu dua na painia, rau qai vakayaloqaqataki au sara vakalevu. Rau vakadeitaka ni sega ni dodonu me tarova na noqu veiqaravi vakapainia na kequ mate.

O koya gona ena 1 Sepiteba, 1988, au lesi meu painia tudei ena tauni au susugi kina, o San Andrés Chiautla, e Mexico. Au vakayagataka e levu na aua e veivula meu vunautaka kina na itukutuku vinaka. So na gauna au sega ni rawa ni lako ena cakacaka vakavunau baleta niu baci rebo. Niu sotava oya, au dau volavola vei ira e so ena noqu yalava me baleta e so na ulutaga vakaivolatabu. Au uqeti ira ena ivola mera vulica na iVolatabu.

Kilai na Kequ Mate

Donuya na gauna oya, rau vakayagataka sara e levu na ilavo na noqu itubutubu meu lai laurai vua e dua na vuniwai e kenadau ni nave. E kaya na vuniwai oya ni tauvi au tiko na manumanunisoni. Ena vuku ni veiqaravi a soli vei au ena gauna oya, a tarova toka na kequ mate me va na yabaki. Ena gauna vata oqori, a rawa meu lai vuli ena Koronivuli ni Cakacaka Vakapainia, au vakauqeti kina, sa qai toroya cake ga na noqu via lai veiqaravi ena vanua e gadrevi kina vakalevu na dautukutuku ni Matanitu ni Kalou.

Erau kila na noqu itubutubu niu vinakata meu vakarabailevutaka na noqu veiqaravi. Ni sa vinaka cake na ivakarau ni noqu bula, erau mani vakadonuya meu lako i Zitácuaro, ena yasana o Michoacán, e rauta ni 200 na kilomita mai na vanua keitou tiko kina. Noqu veimaliwai kei na so tale na painia ena vanua oya e vakatitobutaka sara na noqu taleitaka na veiqaravi vakatabakidua.

Oti e rua na yabaki noqu tiko e Zitácuaro, se baci manati au tale na kequ mate. Au mani suka tale e vale vei rau noqu itubutubu, dua na ka na noqu rarawa kei na mosi ni yaloqu, ia ena gauna vata oya, au gadreva na veivuke vakavuniwai. Au lai raica e dua na vuniwai e kenadau tale ga ni nave, qai kaya ni veiqaravi a vakayacori tiko vei au e sa lai vakaleqa tale na yatequ. Au mani vaqara e so tale na veiqaravi vakavuniwai baleta ni kena e vakayacori tiko vei au e vaka meu sa sega ni ceguva rawa na kena isau. Ia, sa toso sobu tiko ga na ituvaki ni noqu bula, yaco sara meu sa vakacegu mai na cakacaka vakapainia. Au dau rarawa sara vakalevu, au yalolailai tale ga ni yacovi au na manumanunisoni. Ia, niu dau wilika na Same, au torovi Jiova ena masu, au dau yaloqaqa qai lomavakacegu tale ga.​—Same 94:17-​19.

Rawata na Noqu iSausau

Ena gauna e dau tarai au kina vakabibi na kequ mate, rawa ni yacovi au vakarua ena loma ni dua na siga na manumanunisoni. Sa qai yaco e dua na veisau levu. E vakarautaka vei au e dua na vuniwai e dua na iwalewale ni veiqaravi ni manumanunisoni, au bula vinaka kina vakadede. O koya gona ena 1 Sepiteba, 1995, au tekivu cakacaka vakapainia tale kina. E vinaka sara tu na ituvaki ni noqu bula, ni oti gona e rua na yabaki na kena sega vakadua ni yacovi au na kequ mate, au kerea sara meu dua na painia lavotaki. Kena ibalebale oqo niu na vakayagataka e levu sara na gauna ena cakacaka vakavunau, e rawa tale ga niu na lesi meu lai veiqaravi ena vanua au gadrevi kina. Vakasamataka mada na noqu marau niu a vakadonui meu painia lavotaki! Au sa sauva na noqu isausau au a biuta niu se gone.

Ena 1 Epereli, 2001, au cakacaka sara ena noqu ilesilesi vou ena dua na itikotiko e veiulunivanua ni yasana o Hidalgo. Ena gauna oqo au sa veiqaravi tiko ena tauni lailai ena yasana o Guanajuato. Au sega ni dau guilecava meu gunuva na mequ wainimate qai vakacegu vinaka tale ga. Au dau qarauna na kakana au kania, vakauasivi na kakana uro, na caffeine, kei na kakana tawaitini. Au saga tale ga me dau maravu na yaloqu, meu kua ni cudru se lomaleqa vakasivia. Ia au vakila ni vinaka vei au na noqu qarauna vaka oqo na noqu bula. Ena noqu veiqaravi tiko mai vakapainia lavotaki, e se qai yacovi au ga vakadua na kequ mate.

Me vaka niu dawai, e sega na noqu icolacola vakavuvale, au marautaka gona meu tomana tiko ga na noqu veiqaravi vakapainia lavotaki. Au lomavakacegu niu kila ‘ni sega ni tawadodonu o Jiova me guilecava na noda cakacaka kei na loloma eda vakatakila ena vuku ni yacana.’ Sa dua dina na Kalou dauloloma, ni sega ni namaka na ka eda sega ni rawa ni solia vua! Noqu ciqoma na vakasama oya, e vukea me veiraurau noqu rai. Kevaka e mani tarova na noqu veiqaravi vakapainia na kequ mate, au kila ni na marautaka tiko ga o Jiova na noqu veiqaravi e vu mai lomaqu.​—Iperiu 6:10; Kolosa 3:23.

Au vakadinadinataka ni vakaukauataki au na noqu wasea yani e veisiga na noqu vakabauta. E vukei au meu nanuma tiko ga na veivakalougatataki i Jiova ena veigauna e se bera mai. Ni yalataka na iVolatabu ni na sega tale ni kune ena vuravura vou na tauvimate, “se na rarawa, se na tagi, ka na sega tale na vutugu: ni sa takali tani na ka makawa.”​—Vakatakila 21:3, 4; Aisea 33:24; 2 Pita 3:13.

[iYaloyalo ena tabana e 24]

Niu se qai yabaki 7 (e cake); niu yabaki 16, ni oti ga vakalailai na noqu papitaiso

[iYaloyalo ena tabana e 25]

Vunau tiko kei na dua na noqu itokani