Era Vesu, Ia Era Galala!

Dauvolavola ni Yadra! Mai Mexico

E KOTO na veiyatu yanuyanu na Islas Marías rauta ni 90 na kilomita mai na ra ni baravi kei Mexico.a E dua vei ira na yanuyanu ni Pasifika oqo, o María Madre, e dau vakayagataki mera lai tu kina na kaivesu tekivu sara mai ena 1905, ia e qarava na matanitu o Mexico. Dua na gauna, era dau kilavaka na kaivesu na lako e kea, ia ena gauna oqo sa rawa nira kerea tale na kaivesu ivakaraitaki vinaka mera kau e kea!

E dua na vuna, oya ni so vei ira na kaivesu e vakatarai mera tiko vata kei ira na nodra vuvale. Era sa na sega gona ni tiko ena lokamu, ia era sa na vakaitikotiko ena veivale lalai. Na itikotiko qo e levu sara kina na tabana ni veiqaravi me vaka ga o rawa ni raica ena dua na tauni lailai. E rawa gona ni ra veitaratara kei ira e taudaku ena nodra dau qiri ena talevoni, vakau telekaravu, sara retioyaloyalo, ra qai vakau meli. O ira na gone e rawa nira vuli ga ena koronivuli ni paraimari e kea, ia era na lako i Mexico mera vuli ena sekedri. E vakadredretaki na lako ina yanuyanu o María Madre, vakadua ena veimacawa ena soko e kea na waqa ni mataivaluiwai me usana na veika e gadrevi, vaka kina o ira na vulagi.

Vakacava nodra vukei na kaivesu mera veisau? O ira na kaivesu​—era sa vakatokai ira mera lewenikoro​—ena vinakati me dua na cakacaka mera cakava me vica na aua ena dua na siga. Oqo ena sega ni yaga wale ga ena gauna era sa na sere kina ia ena vukei ira sara ga ena nodra qarava nodra bula. E tu tale ga na galala vei ira na “lewenikoro” mera qara na nodra cakacaka vakataki ira me vaka na teitei kei na cakacaka ni liga mera rawa ilavo kina. E sega ni kena ibalebale oqo nira sa lewai ira ga na kaivesu. Baleta ena veimataka ni caka na kacivi yaca e dodonu mera dau tiko, ena ciwa na kaloko ena bogi sa dau vakatabui na veilakoyaki.

Era Sereki Vakayalo Mai na Islas Marías

Rauta na yabaki 1985, a kerea e so na veivuke vakayalo e dua na “lewenikoro” e María Madre, vei ratou na nona vuvale iVakadinadina i Jiova. A tekivutaki na vuli iVolatabu ena meli. Yaco na gauna me tauyavu e dua na ilawalawa lailai era dau vulica na iVolatabu, qai tekivu vakayacori tale ga na soqoni vakarisito. Ni sa solia na matanitu na nona veivakadonui, era sa qai lako wasoma na iVakadinadina i Jiova mai Mazatlán, ina yanuyanu o María Madre, oya e rauta ni dua taucoko na bogi nodra soko. Me yacova mai oqo, e rauta ni 40 na kaivesu era sa vulica mai kea na ka dina ena Vosa ni Kalou, ra papitaiso, era sa sereki tale ga ni cava na nodra yabaki ni tu vakavesu. Ena gauna e volai kina na italanoa oqo eratou se tiko ga e kea e 6 na iVakadinadina papitaiso, qai rauta ni 25 era dau tiko ena soqoni vakarisito.

O ira na veiliutaki e kea sa dua na ka na nodra vakacaucautaki ira na iVakadinadina ena vuku ni nodra sasaga, ra qai rokovi tale ga na kaivesu era sa mai iVakadinadina i Jiova. Na ivukevuke ni dairekita ni koro a kaya vua e dua na iVakadinadina a veisiko yani: “Keimami qoroya na nomuni kauaitaka na nodra bula kei na nodra itovo na kaivesu, sa yaga sara vakalevu! Keimami na tokoni kemuni ena veika oni vinakata.” A bolea me vakavinakataka na vale sa soli mera dau soqoni kina na mataveitacini.

E kaya e dua na iVakadinadina papitaiso sa vesu tu me tini na yabaki: “Nira taroga na mataveitacini era mai sikovi keimami seu vinakata meu sa suka, au tukuna niu vinakata meu veiqaravi ga e ke, au raica rawa ni oqo e sa noqu yalava sara ga, gadrevi vakalevu e ke na cakacaka. Ia, ena ka marautaki sara vei au meu bau lako ena soqo ni tabacakacaka meu lai veimaliwai kei ira e levu tale na mataveitacini vakarisito.” Ena sereki o koya ena yabaki oqo ena vuku ni nona itovo vinaka.

E rawa ni tukuni ni ituvatuva e vakayagataki me baleti ira na kaivesu e Islas Marías e yaga, baleta nira vukei kina e so mera veisautaka nodra bula. Ia, na itukutuku ga ni Matanitu ni Kalou e kauta mai na galala vakayalo kei na veisau dina, era sereki kina vakayalo na tiko e valeniveivesu.​—Luke 4:​18; Aisea 61:1.

[iVakamacala e ra]

[Kato/iYaloyalo ena tabana e 19]

Bobula ena Wainimate Gaga, Nikua sa Qase ni iVavakoso

A vesu o Guillermo ena nona dau vakayagataka qai volitaka butako na wainimate gaga. Ni sa lai tiko e Islas Marías, se bobula voli ga ena wainimate gaga. Dua na ka a dikeva rawa ni so era kaivesu vata era a vesu tale ga ena vuku ni cala me vaka na volitaki butako ni wainimate gaga, ia e maqosa na kedra irairai, era mamarau, era itovo vinaka. Gauna e kila kina nira vuli iVolatabu tiko kei ira na iVakadinadina i Jiova, a mani ciqoma na veisureti me lai tiko ena nodra soqoni. E muri sa qai tekivu me vuli iVolatabu.

E levu sara na veisau e cakava o Guillermo ena nona bula, sega ni dede ga sa sereki. Sega tale ni wawa ni sa lai qarai ira na iVakadinadina i Jiova me tomana tale nona vuli. Nikua sa dua o koya na qase ni ivavakoso vakarisito, qai 17 na nona lewenivuvale era sa iVakadinadina i Jiova. E vakamacalataka: “Noqu mai kilai Jiova e kauta sara ga mai vei au na vakacegu, au sa vakanadakuya tale ga kina na veika ca kece. E levu na noqu itokani makawa era sa mate ena vuku ni wainimate gaga. E vakaleqa na noqu vakasama na wainimate gaga, e vakavuna meu guiguileca. Ia na iwalewale ni vuli era vakayagataka na iVakadinadina e veivuke vakalevu. Era druka na vuniwai, era nanuma ni sa na sega tale ni vinaka noqu vakasama. E kurabuitaki na ka e cakava na ka dina mai na iVolatabu ena noqu bula kei ratou noqu vuvale. Neitou bula e liu a bula ga ni duiyaloyalo ia oqo keitou sa duavata.”

[Mape ena tabana e 18]

(Raica tale na ivola)

Mazatlán

Islas Marías

María Madre

[iYaloyalo ena tabana e 18]

“Lewenikoro” kei ira nodra dui vuvale ena soqoni ena Kingdom Hall e María Madre