Na Rai ni iVolatabu

Meda Raici Ira Vakacava na iTabaqase?

E DUATANI sara na katakata e tarai Urope ena vulaikatakata ni 2003 ni vakatauvatani kei na 60 na yabaki yani e liu, ra mate sara ga kina e vica na udolu. Dua na iwiliwili levu vei ira oqo era itabaqase. E so vei ira era a biu taudua tu mai ra qai dui gade na wekadra. E tukuni ni so tale era mate ena valenibula kei na vale ni malumalumu ena nodra sega ni kauaitaki, nira sa rui osooso ena gauna oya na nasi kei na vuniwai. E kaya na niusiveva Le Parisien, ni korolevu mada ga o Parisi e 450 na yagonimate era biu tu e valeniwawa nira sega ni kauai na wekadra mera mai raica na yagodra. Na vakaloloma ni nodra mate taudua kei na nodra sega ni kauaitaki o ira oqo, e taroga kina na niusiveva, “Sa vakacava sara tu mada na ivakarau ni noda bula meda sa lai guilecavi ira kina na tamada, tinada, na tubuda kei na tukada?”

Sa tubu totolo sara na kedra iwiliwili na itabaqase ena veiyasa i vuravura​—rauta nira le 795,000 e veivula era sivita na yabaki 65. Era kauai vakalevu na kenadau ena tikina oqo ra qai dau bosea na sala vinaka mera qaravi kina. E kaya o Nancy Gordon, e dua na marama e dairekita tiko ena tabana ni wili lewenivanua e Mereke: “E se qai yaco vakadua e vuravura na tubu totolo ni kedra iwiliwili na itabaqase, e bibi kina me keimami kauaitaka na nodra dui sasaga na veimatanitu me toroicake kina na veiqaravi vei ira oqori.”

O Koya tale ga e buli keda e dau kauaitaki ira vakalevu na itabaqase. E sega wale ga ni kauaitaki ira, e vakarautaka sara mada ga ena nona Vosa, na iVolatabu na sala mera kauaitaki kina.

Dokai Ira na Qase

E vakabibitaki ena Lawa ni Kalou a soli vei Mosese ni dodonu me dokai e dua ni sa qase. E kaya na Lawa: “Mo tu cake e matadra sa sika na uluna, ka doka na matadra na tamata qase.” (Vunau ni Soro 19:32) E vinakati vei ira na dauveiqaravi talairawarawa ni Kalou mera “tu cake” e matana e dua sa kena turaga se kena marama me (1) ivakaraitaki ni nodra dokai koya, (2) me ivakaraitaki ni nodra rerevaka na Kalou. E vakaraitaka oqo vei ira na itabaqase nira sega ni beci, ia era rokovi qai ra vakamareqeti.​—Vosa Vakaibalebale 16:31; 23:22.

Eda sega ni vakarurugi na lotu Vakarisito nikua ena Lawa i Mosese, ia nida dikeva na kena ivakavuvuli e vakamatatataka vei keda na rai i Jiova me baleti ira na itabaqase, oya nira ka talei dina ga vua. Era sega ni lecava na tikina oqo na lewe ni ivavakoso vakarisito ena imatai ni senitiuri. Eda na vakadinadinataka oqo nida raica na kena itukutuku ena ivola na Cakacaka. E so ena ivavakoso e Jerusalemi ena gauna oya era yada dravudravua. De dua e so era sa kena marama sara. Era qai lesia na yapositolo e vitu “na tamata sa rogorogo vinaka” me ratou qarava na votai ni kedra na yada e veisiga. Macala gona nira raica na yapositolo ni veiqaravi vakayalololoma vaka oqo e tiki ni nodra itavi na lewe ni ivavakoso.​—Cakacaka 6:1-7.

E vakaraitaka tale na yapositolo o Paula ni rawa ni vakayagataki ena loma ni ivavakoso vakarisito na ivakavuvuli e volai ena lawa i Mosese, oya mera ‘tu cake e matadra sa sika na uludra.’ E kaya vei Timoci e dua na ivakatawa ni ivavakoso e se cauravou: “Kakua ni vosataka vakaukauwa e dua na qase ia mo vosa ga vakamalua vua me vaka vua na tamamu. Okati ira . . . na yalewa qase me vaka era tinamu.” (1 Timoci 5:1, 2, VV) E dina ni itavi vakaivakatawa i Timoci e okati kina ena so na gauna nona dusimaki ira kei na nona vakasalataki ira na lewe ni ivavakoso era sa qase, ia e vakadreti koya o Paula me kua ni beca e dua sa kena turaga. Me laurai ga ena nona vosa kei na nona ivalavala na veidokai me vaka ga e dau cakava vei tamana. Me na dokai ira tale ga na kena marama ena ivavakoso. Na vosa gona i Paula vei Timoci e dodonu me uqeti koya, vaka kina o keda kece na lewe ni ivavakoso vakarisito, meda ‘tu cake e matana e dua sa sika na uluna.’

E sega ni kena ibalebale oqo nira na dokai ira ga na qase na tamata ni Kalou ke ra vakaroti kina. Dikeva mada na ivakaraitaki i Josefa ena iVolatabu. E tiko e Ijipita qai rogoca na lauqa e tara na vanua e vakaitikotiko kina na tamana, o Jekope. Sa yabaki 130 o tamana ena gauna oya, mani vakarautaka o Josefa na ka kece me kauti tamana mai i Ijipita. Sa oti e ruasagavulu vakacaca na yabaki erau sega ni sota kei tamana, ia ena gauna erau sota kina “sa mokota na domona, a sa tagi vakadede kina.” (Vakatekivu 46:29) E laurai ena veika a vakayacora o Josefa ni duavata nona rai kei na rai ni Kalou me baleta na nodra dokai na qase, e dina ni a se bera ni soli na ivakaro oqori vei ira na Isireli.

A dau vakaraitaka o Jisu ena nona cakacaka vakaitalatala ni kauaitaki ira na qase. A vosataki ira na iliuliu ni lotu nira vakayagataka nodra ivakavuvuli vakalotu me iulubale ni nodra sega ni qaravi ira nodra itubutubu era sa qase. (Maciu 15:3-9) E laurai tale ga na yalololoma i Jisu ena levu ni nona kauaitaki tinana ni sa dua toka na itaba. Ena gauna dredre sa vako tu kina ena kaunirarawa, e kauaitaki tinana tiko ga qai tataunaki koya vei Joni, na yapositolo a nona itokani dredre.​—Joni 19:26, 27.

Sega ni Guilecavi Ira Nona Tamata Yalodina na Kalou

A masuta na Kalou na daunisame: “Kakua ni biuti au e na gauna ka’u sa qase mai kina; kakua ni laivi au ni sa oti na noqu kaukauwa.” (Same 71:9) De dua era nanuma e so ni sa sega tale na betedra nira yacova na bula vaqase. Ia e duidui sara na rai i Jiova. Ena sega ni “biuti” ira nona tamata yalodina nira sa qase. E sega ni nanuma na daunisame ni sa biuti koya o Jiova, e vakila ga ni bibi vei koya me vakararavi vakalevu sara vua na Kalou ena nona bula vaqase. E dau dolea na yalodina vaka oya o Jiova ena nona tokoni ira nona tamata ena nodra bula taucoko. (Same 18:25) Na veitokoni oqo e dau vakilai ena nodra veivuke na tacidra vakayalo ena ivavakoso vakarisito.

Sa macala mai na veika e vakamacalataki e cake ni noda dokai koya na Kalou e vauci tale ga kina na noda dokai ira na itabaqase. Era ka talei sara ena mata ni Kalou. Eda buli meda ucui koya, e bibi gona me tiko vei keda nona rai me baleti ira na itabaqase.​—Same 71:18.

[iYaloyalo ena tabana e 21]

Era dau dokai ira na itabaqase na lotu Vakarisito