Taro na Dauwiliwili
Na cava e vola kina na yapositolo o Paula me baleta na yalewa vakawati lotu Vakarisito: “Ena taqomaki o koya ke vakasucu gone”?—1 Timoci 2:15, NW.
Na cava mada na ibalebale ni ka e tukuna tiko o Paula ena tikinivolatabu oqo? Ena veidusimaki ni yalo tabu, a veivakasalataki ena ka mera cakava na marama lotu Vakarisito ena ivavakoso. A vola: “Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua: me kakua ni tali na drau ni uludra, me kakua ni vakoula, se vakamata-ni-civa, se vakai sulu talei: ia (me vaka ga sa kilikili kei ira na yalewa era kaya era sa lotu) e nai valavala vinaka.” (1 Timoci 2:9, 10) A uqeti ira tiko na ganena lotu Vakarisito o Paula mera lokomi, me veiraurau na nodra digitaka na nodra iukuuku, mera “vakaisulu” tale ga ena ivalavala vinaka.
Sa qai vakamacalataka tarava o Paula na ituvatuva ni veiliutaki ena loma ni ivavakoso, e kaya: “Ka’u sa sega ni laiva na yalewa mei vakavuvuli, se viavialewa vei koya na tagane, ka me tiko lo ga.” (1 Timoci 2:12; 1 Korinica 11:3) E vakamacalataka o koya na yavu ni ituvatuvanaki oqo, qai dusia ni a sega ni temaki Atama o Setani, “na yalewa ga [o Ivi] sa temaki, ka sa talaidredre kina.” Ia, ena rawa gona vakacava ni taqomaki koya e dua na yalewa lotu Vakarisito ena cala a cakava o Ivi? E sauma o Paula: “Ena taqomaki o koya ke vakasucu gone, kevaka era sa tu dei ena vakabauta, kei na loloma, kei na yalosavasava, kei na yalomatua.” (1 Timoci 2:14, 15, NW) Na cava e vakaibalebaletaka o Paula ena veivosa oqo?
E so na ivakadewa ni iVolatabu e vaka ni kaya toka ni vakatau na nona vakabulai e dua na yalewa kevaka e vakasucu. Me kena ivakaraitaki na iVolatabu Vakaviti, e kaya: “Ena vakabulai ni sa vakasucu gone.” Ia, oqo e sega ni ivakadewa dodonu ni ka e kaya o Paula. Ni levu na tikinivolatabu e vakaraitaka, ke vinakata e dua me vakabulai, ena gadrevi me kilai Jiova, vakabauti Jisu, vakabauta mai vu ni yalona, qai cakacakataka nona vakabauta. (Joni 17:3; Cakacaka 16:30, 31; Roma 10:10, VV; Jemesa 2:26) Kena ikuri, a sega tale ga ni vakaibalebaletaka tiko o Paula ni na sega ni tavere na nodra vakasucu na yalewa vakabauta. Era vakasucu vinaka e levu na yalewa, se ra vakabauta se sega. Ena yasana kadua, e ka ni rarawa ni so era mate ena gauna era vakasucu kina, se ra vakabauta se sega.—Vakatekivu 35:16-18.
Eda na kila vinaka na ka e vakaibalebaletaka o Paula ke da raica na ikuri ni nona ivakasala vei ira na marama ena ivola vata tiko ga oqo. A vakasalataka e so na yada gone e laurai nira ‘vucesa; ia era sega ni vucesa wale ga, era dauvakaucaca, dauvakavuca ka vosataka na veika tawakilikili.’ Na cava na ivakasala i Paula? E tomana: “E vinaka cake vei au me ra vakawati na yada gone, me ra vakaluveni ka qarava na nodra vuvale, me kakua ni solia kina vua na meca e dua na gauna me vosa vakacacataki keda kina.”—1 Timoci 5:13, 14, VV.
E vakabibitaka o Paula na yaga ni nodra itavi na marama ena ituvatuvanaki vakavuvale. Nira ogaoga ena vuku ni nodra “vakaluveni ka qarava na nodra vuvale,” ra qai cakava tiko ga ena “vakabauta, kei na loloma, kei na yalosavasava, kei na yalomatua,” era na sega ni goleva kina na ivakarau e sega ni veitaraicake. Ena maroroi na nona bula vakayalo, se “taqomaki.” (1 Timoci 2:15, NW ) Nira muria na ivakasala oqo na yalewa gone, era na rawa ni levea kina na icori i Setani.
Na veivosa oqo i Paula vei Timoci e vukei keda kece, se da tagane se yalewa, meda vakayagataka vinaka na noda gauna. E vakasalataki ira kece na lotu Vakarisito na Vosa ni Kalou: “Mo dou qai raici kemudou vinaka, mo dou i valavala vakayalomatua, mo dou kakua ni vakataki ira na lialia, mo dou vakataki ira ga na vuku.”—Efeso 5:15.