Ena Rawa ni Vakavinakataki Nomu Bula Vakawati?

O NA via cakava tale ga qori ena nomu vakawati? Ke vaka kina, o na tekivu e vei? Tovolea mada eso na vakatutu qo.

1 iNakinaki.

Drau nakita vakaveiwatini mo drau cakacaka vata me vakavinakataki nomudrau vakawati. Tovolea mo dau vola na ka drau vakatulewataka. Drau na veitokoni ke drau vinakata ruarua me vakavinakataki nomudrau vakawati.​—Dauvunau 4:9, 10.

2 Kila rawa na leqa.

Na cava eso na leqa e kune tiko ena nomu vakawati? Ena dua na yatuvosa, vola na ka o nanuma me vakavinakataki se o vinakata me veisau. (Efeso 4:22-24) Macala ga ni na sega ni tautauvata na leqa drau vola.

3 Dua nomudrau isausau.

Na cava o na vinakata ena nomu vakawati ena vula ono mai qo? Na veisau cava o na via raica? Vola nomu isausau. Ni sa matata vei iko na ka e vinakati, ena qai rawarawa na sauvi ni isausau.​—1 Korinica 9:26.

4 Muria na ivakasala vakaivolatabu.

Gauna o sa kila kina na ka e vakavuna tiko na leqa, kei na ka me vakavinakataki, qara ivakasala sara ena iVolatabu. E dau yaga tu ga na kena ivakavuvuli. (Aisea 48:17; 2 Timoci 3:17) Kena ivakaraitaki, e uqeti kemudrau na iVolatabu mo drau dauveivosoti. E tukuna na iVolatabu ni ‘rogo vinaka o koya e sega ni cudruvaka na cala.’​—Vosa Vakaibalebale 19:11; Efeso 4:32.

Ke sega sara ni vuavuaivinaka nomu sasaga, kua ni soro! E veiuqeti na ka e ripotetaka na ivola The Case for Marriage me baleta e dua na vakadidike, e tukuni kina: “E kurabuitaki dina ni 86 na pasede era sega ni marautaka nodra vakawati, ia era dei tiko ga ena nodra vakawati veitalia ni vakilai tiko na dredre, ni oti e lima na yabaki era vakadinadinataka ni sa mamarau nodra vakawati.” O ira mada ga na veiwatini era tukuna ni sega ni marautaki nodra vakawati, era sa vakila na veisau.

De dua e rawa tale ga ni yaco qo vei iko. O ira na iVakadinadina i Jiova era tabaka na ivola qo, era vakadinata ni iVolatabu e vakarautaka na ivakavuvuli yaga vei ira na veiwatini. Kena ivakaraitaki, e vakavinakataki e levu na bula vakawati nira veikauaitaki na veiwatini, ra yalololoma ra qai yalorawarawa ni veivosoti. Era vulica na yalewa vakawati na yaga ni “lomavakacegu kei na yalomalua,” ra kila tale ga na tagane vakawati na yaga ni nodra sega ni dau cudruvi ira na watidra.​—1 Pita 3:4; Kolosa 3:19.

E yaga dina na ivakavuvuli vakaivolatabu qo, baleta o Jiova na Kalou e vakavuna na iVolatabu, e nona ituvatuva tale ga na vakawati. Vakacava mo tarogi ira na iVakadinadina i Jiova se na yaga vakacava na iVolatabu ena nomu vakawati?a