Na Rai ni iVolatabu

E Dodonu mo Lai Masu ga Vua na Kalou e Valenilotu?

E LEVU na tamata era dau gole ina vale e dau caka kina na sokalou mera lai masu vua na Kalou. Eso tale era dau gole mai vakayawa mera sokalou ena vanua va qori. Na cava o nanuma, e dodonu mo gole ina valenisoro, itikotiko tabu se valenilotu mo masu kina vua na Kalou? Se o nanuma ni o rawa ni vosa vua ena dua ga na gauna se vanua cava ga? Na cava mada e tukuna na iVolatabu?

Ena itekitekivu ni bula ni kawatamata, a sega na vale me caka kina na sokalou. Na nodrau itikotiko na vuda e dua na were totoka. (Vakatekivu 2:8) Ena vanua qori a rawa ni rau veivosaki kina kei na Dauveibuli, na Kalou o Jiova. Toso na gauna sa tubu na iwiliwili ni tamata e vuravura, eso vei ira qori era tagane yalododonu, me vakataki Noa ra qai ‘dau lakovata kei na Kalou dina’​—e sega ni gadrevi e dua na vale ni sokalou mera cakava kina qori. (Vakatekivu 6:9) A vakadonui ira o Jiova nira lomani koya qai dei nodra veiwekani baleta nira dau masu, dina ga nira sega ni vakayagataka e dua na vale ni sokalou.

Na Kalou e Sega ni Vakaitikotiko ena Vale e Tara na Tamata

O ira na tamata yalodina ena gauna makawa era kila ni o koya e bulia na lomalagi kei na vuravura e sega ni vakaitikotiko ena ka era tara na tamata. A taroga na Tui vuku o Solomoni: “Ena tiko vata vakaidina li na Kalou kei ira na tamata e vuravura?” E qai vakadeitaka: “Raica, ko lomalagi, kei lomalagi ecake sara, ko ni sa sega ni yalani rawa kina.” (2 Veigauna 6:18) E macala ga ni tiko na nodra valeniveitavaki na Isireli makawa, toso na gauna era sa soqovata ena nodra valenisoro mera solevu kina vakadua e veiyabaki me vaka e vakarota na Lawa ni Kalou. (Lako Yani 23:​14-17) Ia e rawa nira masuta na Kalou ena gauna cava ga era vinakata​—ena gauna era vakatawa sipi tiko kina, nira cakacaka tiko ena nodra were, nira veimaliwai vakavuvale se gauna era tiko taudua kina.​—Same 65:2; Maciu 6:6.

Eda rawa tale ga ni masuta na Kalou ena vanua kei na gauna cava ga eda vinakata kina. Noda ivakaraitaki o Jisu Karisito, e dau gole ena dua na vanua vakanomodi se vanualala me masu kina. (Marika 1:35) Kena ivakaraitaki, ena dua na gauna “e qai lako cake kina ina ulunivanua me lai masu, e masu tiko vua na Kalou ena bogi taucoko.”​—Luke 6:12.

Me vaka ni Jiu o Jisu, e dau yalodina ni gole ena solevu e dau vakayacori ena valenisoro e Jerusalemi. (Joni 2:​13, 14) Ia a parofisaitaka ni na dua na gauna ena sega tale ni vakayagataki na valenisoro me seda ni sokalou dina. Ena gauna e vosa tiko kina vua na yalewa ni Samaria ena vanua volekata na ulunivanua ekea​—na vanua e tiko kina na nodra valenisoro​—a tukuna o Jisu: “Sa voleka mai na gauna oni na sega ni qarava na Tamada ena ulunivanua qo se mai Jerusalemi.” E qai tukuna ni o ira na dausokalou dina era na ‘sokalou vakayalo vei Tamada qai yavutaki ena dina.’​—Joni 4:​21, 23.

Io, e vakabibitaka o Jisu na sokalou dina e vu mai lomada, sega ni vale e caka ena biriki kei na drega kabikabi. Ia kena ibalebale beka qori ni o ira na imuri i Jisu​—era qai vakatokai mera lotu vaKarisito​—era na sega sara ga ni vakayagataka na vale mera sokalou kina? (Cakacaka 11:26) Sega. E tiko na vuna vinaka era na vakayagataka e dua na vale mera sokalou kina.

Era Vuvale Vakayalo na Tamata ni Kalou

O ira na dauveiqaravi dina ni Kalou era lewe ni dua na vuvale​—e dua na vuvale vakayalo. (Luke 8:21) Na vuvale vinaka ena dau cakava vata e levu na ka, me vaka na nodra marautaka vata e dua na kakana, qori ena dei kina nodra veiwekani na lewe ni vuvale. E va tale ga qori na vuvale vakayalo. Na soqoni vaKarisito e vaka e dua na kana magiti vakayalo, ena vakayaloqaqataka na lomada qai vakaukauataka na noda veiwekani vakayalo. E vola na yapositolo o Paula: “Meda dau veinanumi, meda veivakauqeti, meda veilomani, meda caka vinaka tale ga, meda kua ni vakawaletaka na soqoni me vaka e nodra ivalavala eso, ia meda veivakayaloqaqataki.”​—Iperiu 10:​24, 25.

Era kila gona na dausokalou dina ni yaga na ivavakoso, baleta ni rawa nira bucina kina na lewe ni ivavakoso yadua na itovo vaKarisito. Era na sega ni bucina rawa na itovo kece qori ke ra sega ni lewe ni ivavakoso. Era okati ena itovo qori na loloma, veivosoti, yalololoma, yalomalua kei na vakacegu.​—2 Korinica 2:7; Kalatia 5:​19-23.

Na vanua cava era dau soqo vata ra qai sokalou kina na lotu vaKarisito taumada? E levu na gauna era dau soqoni ena dua na vale. (Roma 16:5; Kolosa 4:15) Kena ivakaraitaki, ena gauna a volavola kina na yapositolo o Paula vua e dua na tacina lotu vaKarisito, a vakadreti ira tale tiko ga ‘na ivavakoso era dau soqoni ena nona vale.’a​—Filimoni 1, 2.

E sega tale ga ni gadrevi vei ira na tamata ni Kalou nikua me dua nodra valenisokalou e ukutaki vakasivia, ia me veiganiti qai veirauti vinaka vei ira na gole yani. E va qori tale ga na vanua era dau soqoni kina na iVakadinadina i Jiova, era vakatoka me Vale ni Soqoni. De dua e tiko sara ga e dua na nodra Vale ni Soqoni ena nomu yasayasa. E tara vakamatau qai veiganiti, na sokalou tale ga e dau caka kina e rawarawa ga​—e okati kina na lagasere, masu kei na kena veivosakitaki na iVolatabu.

Era dau vakamareqeta na iVakadinadina i Jiova na gauna era dau veivosaki taudua kina kei na Kalou. Era dau vakayagataka gona nodra gauna e veisiga mera masu, qori era dau cakava vakavuvale se ra cakava duadua ga. E tukuna na Jemesa 4:8: “Toro voleka yani vua na Kalou ena qai toro voleka mai vei kemuni.”

[iVakamacala e ra]

O BAU VAKASAMATAKA?

● E vakaitikotiko dina na Kalou ena vale era tara na tamata?​—2 Veigauna 6:18.

● Na vanua cava a masu kina o Jisu ena dua na bogi taucoko?​—Luke 6:12.

● Na cava era dau soqoni vata kina na dau sokalou dina?​—Iperiu 10:​24, 25.

[Tikina bibi ena tabana e 30]

Vakacava ena rogoci nomu masu ena so ga na vanua?