E Rawa ni o Vulica na Veiyaloni

EDA na rairai sucukaya mai eso na gagadre ca, ia sega ni kena ibalebale qori ni na tutu ga meda cakava na itovo kaukaua. E va qori tale ga na veiyaloni. Ia eda na rawa vakacava ni veiyaloni dina? E macala ni o koya ga na Dauveibuli ena vakavulici keda meda dau veiyaloni ni tu vua na kaukaua levu duadua, e sega tale ga ni vakatauvatani rawa nona vuku. Raica mada e lima na tikina qo kei na kedra ivakamacala vuku ena iVolatabu, era vaka na vatutalei.

1 “Mo kakua ni vuvutaka na tamatai valavala vakasaurara.” (Vosa Vakaibalebale 3:31) Era sega ni tamata kaukaua o ira era vakayacora na itovo qori, o ira ga era dau vakaitovotaka na lewa matau kei na yalomalua. E tukuna na Vosa Vakaibalebale 16:​32, “Sa vinaka cake ko koya sa berabera ni cudru ka ca na tamata qaqa.” O koya e vakayacora qori ena rawa ni lewai koya vinaka ena gauna e vakacudrui kina me vaka ga e dua na ilatiniwai kaukaua ena dua na drano. Ena sauma tale ga ena yalomalua, me ‘vakamalumutaka kina na cudru.’ (Vosa Vakaibalebale 15:1) Ia na tamata dau cudrucudru ena totolo ga na nona cudru ke mani vakacudrui mada ga vakalailai.​—Vosa Vakaibalebale 25:28.

2 Digia vinaka nomu ilala. E tukuna na Vosa Vakaibalebale 16:29: “A tamatai valavala kaukauwa sa vecea na kai nona.” Ena yasana adua, “ena vuku mai ko koya sa malele vata kei ira na vuku.” (Vosa Vakaibalebale 13:20) Io, nida vakailala kei ira era dauveiyaloni, lewai ira vinaka qai yalomalua, eda na rawa sara ga ni vakatotomuri ira.

3 Bucina na loloma dina. Na ivakamacala totoka duadua ni loloma e tiko ena 1 Korinica 13:​4-7. E tukuni ena vica na tikina: “Na loloma e vosota vakadede qai yalovinaka. . . . e sega ni cudrucudru. E sega ni katona na ca. . . . E ubia na ka kece, . . . e vosota na ka kece.” E tukuna o Jisu ke da vinakata meda vakatotomuria na loloma ni Kalou, e dodonu meda lomani ira mada ga na keda meca.​—Maciu 5:​44, 45.

4 Nuitaka na Kalou ni na sauma na ka ca. “Kua ni sauma na ca e caka vei kemuni. . . . moni veiyaloni kei ira na tamata kece. Kemuni na taciqu lomani, ni kua ni sauma na ca e caka vei kemuni, . . . ni volai: ‘E noqu itavi meu veisausaumi; au na sauma, e kaya o Jiova.’ ” (Roma 12:​17-19) Nida vakabauta na Kalou kei na nona yalayala, eda na vakila na vakacegu era sega ni vakila tu o ira e lailai na nodra vakabauta.​—Same 7:​14-16; Filipai 4:​6, 7.

5 Nuitaka na Matanitu ni Kalou me na kauta mai na vakacegu dina e vuravura. Na Matanitu ni Kalou e dua dina na matanitu vakalomalagi ena vakarau vakarusa na ka ca kece, sa na qai liutaka na vuravura taucoko. (Same 37:​8-11; Taniela 2:44) Ena ruku ni Matanitu ya, “ena tubu vinaka mai . . . na yalododonu,” ena vakilai tale ga na “sautu levu, ka yacova na gauna e oti kina na vula.”​—Same 72:7.

Na ivakavuvuli vakaivolatabu kece qori e sa vukei ira e vica vata na milioni na tamata​—okati kina eso era dau vakayacora na itovo kaukaua​—mera dauveiyaloni. Dikeva mada na ivakaraitaki i Salvador Garza.