Au Dau Taleitaka tu na iTovo Kaukaua

Talanoataka o Salvador Garza

AU DAU taleitaka na itovo kaukaua niu se gone, au na vaculaki koya tale ga e vakacudrui au. A raica na ka qori e dua na jabeni ni veivacu ena noqu vanua, mani vakavulici au ena veivacu. Toso na gauna au wavokiti Merika ena veivacu saumi. Oti sa qai noqu cakacaka meu dau taqomaka e dua na ilawalawa ca.

Au sa vakawati, sa ono tale ga na luvequ, ia au se taleitaka ga na itovo kaukaua. Ena gauna qori, au sa cicivaka tiko e dua na valenidanisi. E levu na gauna era dau saga eso mera vakamatei au, ia au taleitaka na ivakarau ni bula va qori. Ena dua na gauna au veivacu kei na rua na tagane, au mani vanai rau, rau mavoa sara vakaca. Keitou nakita mada ga kei na so na noqu itokani me keitou vesuka e dua na daunipolitiki rogo. Ia era qai kila na ovisa na ka keitou via cakava, ra mani vesuki au. Ena gauna eratou dro tiko kina na kena vo, era saga na ovisa mera vesuki ratou, yaco kina na veivanavanai, ratou mani mate kece. Ia au kalougata niu a tu e valeniveivesu!

Ni oti e vica na yabaki au sere mai valeniveivesu, mani kunea sara e dua na noqu cakacaka. E dua na siga niu gole tiko e vale niu suka mai na cakacaka, e qai mosi vakasauri na uluqu, e vakamalumalumutaki au sara ga. Dua na ka na noqu lomaleqa au mani kere veivuke ena masu. A vuli iVolatabu tiko o Dolores na watiqu kei ira na iVakadinadina i Jiova, qai dau tukuna vei au ni yaca ni Kalou o Jiova. (Same 83:18) Au mani masu vakadodonu sara ga vua.

Ena gauna au sa bula vinaka kina, a uqeti au o Dolores meu tiko ena nodra soqoni na iVakadinadina i Jiova ena nodra Vale ni Soqoni. Na nodra yalololoma kei na nodra veikauaitaki dina na iVakadinadina e vakadrodroya sara ga na wainimataqu. Qori e vakavuna meu vulica kina na iVolatabu, sa tekivu me veisau sara ga kina na ivakarau ni noqu rai me baleta na bula. Au marautaka dina na ka au vulica tiko.

Ia e taura toka na gauna meu qai lewa vinaka na noqu cudru. Kena ivakaraitaki, dua na siga keirau cakacaka vakavunau tiko e veivale kei na noqu itokani o Antonio, keirau sotava sara e dua na turaga e vosavakacacataki keirau. Dua na ka noqu cudru, au via vacuki koya sara ga. Ia kalougata ni a qai tarovi au o Antonio. E muri sa qai vakamacalataka vakayalololoma vei au na nona vosota o Jisu na veivakalialiai kei na veivakacacani. A vola na yapositolo o Pita, a cakacaka vakavoleka sara kei Jisu: “Ni vakasewasewani e sega ni veivakasewasewani lesu.” (1 Pita 2:23) E tarai au sara ga na veivosa qori.

Niu raica lesu na veiveisau au vakayacora ena vica na yabaki sa oti, au dau vakavinavinakataki Jiova e veigauna ena vuku ni yalona tabu, ni vukei keda tale ga qori meda dau lewai keda vinaka da qai dau veiyaloni. (Kalatia 5:​22, 23) Keitou sa duavata qai marau vakavuvale, keitou vakila tale ga na bula vakacegu. Kuria qori, ni sa noqu cakacaka tudei na vunau, qori noqu vukei ira eso tale mera kunea tale ga na vakacegu ni Kalou.

[iYaloyalo ena tabana e 9]

Nona vulica na iVolatabu o Salvador e kunea kina na vakacegu