Vakamacalataka Nona Vakabauta e Dua na Dautaba Piano

Na cava o vulica kina na taba piano?

Erau dautaba piano na noqu itubutubu. Erau vakavulici au niu se yabaki lima. Toso na gauna, au lai vuli ena koronivuli ni vuli vakatagi mai Tashkent.

Vakamacalataka mada eso na ka dredre ni o lewe ni dua na mataivakatagi.

Era duidui kece na mataivakatagi. Era vaka na iyaya ni ivakatagi vakaitamera era tabaka tiko na kena iliuliu (conductor). E dau dredre vei koya e taba piano duadua, me rau veirogorogoci vinaka kei iliuliu. E vaka ga nodrau veitalanoa na veitokani​—erau na veirogoci, sega ni dua ena vosa tu ga. Ena vakayacori vakadua se vakarua na vakatovotovo me rawa ni muri vinaka na nona veidusimaki na iliuliu ni mataivakatagi.

Vakacava mada na levu ni gauna o dau vakatovotovo kina?

Au na vakatovotovo me tolu na aua ena dua na siga​—au na sega ni vakatovotovotaka ga na vanua e dredre meu na vakatagi duadua kina. Au na wilika vinaka tale ga na ikabakaba ni ivakatagi au na vakaitavi kina, ia au na sega ni vakatovotovotaka ena piano. Meu kila vinaka na sere au na vakatagitaka, au na rogoca eso tale na ivakatagi nei koya e bulia na sere.

Na cava na idivi ni kenadau ena taba piano?

Na nona vakavuna me ‘lagasere’ na piano. Meu vakamacalataka mada. Na piano e iyaya ni vakatagi dau tabaki ena iqaqalo. Ni tabaki oti ga, ena seavu vakamalua na rorogo, e sega ni vaka na iyaya ni vakatagi e vakarogoi ni vakayagataki na cagi se voqa ni domoda, e rawa ni yara na kena rorogo se rawa ni rogo levu sara. Na cakacaka levu duadua vua na dautaba piano, oya me kua ni mudu na rorogo ni piano. Ena rawata ga qori ke vakayagataka toka na iqaqalo kei na ilabeniika, kei na nona butuka veitarataravi toka yani na icegucegu (pedal), e dau vukea me yara toka na rorogo qai veisola vinaka. Ni sa buta vinaka ena iwalewale qori e dua na dautaba piano, e rawa vua me vakatagitaka na piano me vaka na rorogo ni bitu ni vakatagi, biukila se na rorogo ni mataivakatagi. E rawa mada ga nira vakamurimuria na iyaya ni vakatagi rogo gasagasa duadua, ya na domo ni tamata.

Macala ni o taleitaka vakalevu na ivakatagi.

Eso na gauna e dredre meu vakamacalataka na ka e tu e lomaqu, ia e vakavotui qori ena ivakatagi.

Na cava e vakavuna mo kauaitaka na veika vakayalo?

E bini tu e vale na ivola a kauta mai o Tamaqu mai Moscow. Au taleitaka vakalevu na ivola ni italanoa vakaivolatabu me baleta na buli ni vuravura kei na veika me baleti ira na Isireli. Au wilika tale ga na ivola E Rawa mo Bula Tawamudu ena Parataisi e Vuravura, tabaka na iVakadinadina i Jiova.a Au qoroya na matata ni ivakavuvuli vakaivolatabu e vakamacalataki tu kina. Niu toki i Sipeni ena 1991 meu vuli ivakatagi, au kauta tu na ivola qori qai wilika vakavica. Au kila kina ni vakabauta e yavutaki ena kena vakalewai vinaka qai vakadeitaki e dua na ka e dina, e sega ni yavutaki ga ena ivakarau ni lomada.

E dua na ivakavuvuli e tarai au, oya na ka e yalataki tu ena iVolatabu ni rawa meda bula tawamudu e vuravura. E vakavure vakasama dina qori! Ia au se sega ga ni sotavi ira na iVakadinadina i Jiova. Au mani vakadeitaka ni gauna au sotavi ira kina au na kerea sara ga mera vakavulici au ena iVolatabu.

O sotavi ira vakacava na iVakadinadina i Jiova?

Ni oti e vica na siga noqu vakadeitaka meu vulica na iVolatabu, au raica e rua na marama rau taura tu na iVolatabu. Au kaya lo: ‘Erau vakataki ira sara ga era tabaki tu ena ivola au wilika tiko. Rau vunau me vakataki ira ga na lotu vaKarisito ena gauna vakaivolatabu.’ Sega ni dede, sa vakavulici au ena iVolatabu e dua na iVakadinadina. E dau vakamarautaki au nikua na noqu vukea eso tale mera vulica na veika me baleta na Dauveibuli.

E liu o sega ni vakabauta na Kalou, na cava o sa qai vakabauta kina ni tiko na Dauveibuli?

E uqeti au sara ga na ivakatagi. O keda eda duidui sara mai vei ira na manumanu nida kila na ivakarau ni yalo e vakavotui ena ivakatagi. E rawa ni vakavotui ena ivakatagi na ivakarau ni yalo me vaka na marau, nuidei, veikauaitaki, kei na so tale. Eda dau malaude nida rogoca na ivakatagi. Ia ena rawati beka na bula ena noda kila na ivakatagi? A basika beka na ivakatagi ena ka era vakavuvulitaka na bula vakaidewadewa “nira na bula ga na qaqa”? Sega. Au vakabauta na vakasakiti ni mona me bulia qai taleitaka na ivakatagi, me vaka na nodrau ivakatagi o Mozart kei Beethoven, e sega ni vu mai na bula vakaidewadewa. E vakadinadinataki ga kina ni noda mona e bulia e dua na Dauveibuli vuku qai yalololoma.

Na cava o vakabauta kina ni Kalou e vakavuna na iVolatabu?

E tiko ena iVolatabu e 66 na ivola lalai ra qai vola e rauta e 40 na tagane ena sivia e 1,600 na yabaki sa oti. Au mani lomatarotarotaka, ‘O cei e tuvanaka na kena volai na ivola vakasakiti qo?’ Na Kalou duadua ga. Au raica ni iVolatabu e vaka e dua na ivola ni vakatagi e tuvani vakamaqosa, e cakava e dua na kenadau, qai veiuqeti na itukutuku e tiko kina.