Na Lawa Kabikabi ni Viritalawalawa

NA LAWA ni viritalawalawa ni Merika e kaukaua vinaka na kena kabikabi, e kabita dei na lalaga, ia ni butuka na manumanu eso, e talave mai ra, qai coko kina na manumanu ya. E vu mai vakacava na drega kabikabi ni viritalawalawa?

Vakasamataka mada: E viria na nona lawalawa ena lalaga se dokanivale ena nona talia na wa silika kaukaua qai kabikabi e yacana vakaPeritania na scaffolding silk, e rawa ni coko kina na manumanu lalai cava ga e vuka takoso. Era dikeva na dauvakadidike ena Univesiti o Akron, mai Ohio, Merika, ni duidui sara na ibulibuli ni lawa silika e viria ena fuloa, e vakatokai ena yacana vakaPeritania na gumfoot silk. E sega ni kabikabi sara me vaka na kena e kabi e lalaga, e talave rawarawa me toboka na manumanu cava ga e takoso.

E tukuna e dua na tabana ni itukutuku mai na Univesiti o Akron ni o ira na dikeva na ka vakasakiti e rawa ni cakava na manumanu qo era sa “bulia tiko e dua na mataqali drega kabikabi e vakatotomuria vinaka na kabikabi ni lawa ni viritalawalawa ni Merika.” Era vinakata na saenitisi mera bulia e dua na mataqali isulu kabikabi me ivakadreti, me sema tale ga na sui ramusu.

Na cava o nanuma? E bula vakaidewadewa na kabikabi ni lawa ni viritalawalawa ni Merika se buli?