IWALI NI LOMAOCAOCA

Ena Oti na Lomaocaoca

E rawa ni vukei keda na vuku vakaivolatabu meda kua ni lomaocaocataka eso na ka e sega ni bibi. Ia eda sega ni rawa ni walia na lomaocaoca, na Dauveibuli ga ena vakaotia vakadua na veika eda lomabibitaka. Sa lokuca mada ga e dua me vakacegui keda, oya o Jisu Karisito. Ena vakayacora e vuravura raraba na veika totoka e vakaraitaka ena nona bula voli vakatamata. Me kena ivakaraitaki:

ENA VAKABULAI IRA NA TAUVIMATE O JISU ME VAKA GA E CAKAVA E LIU.

“Ra mani kau vua o ira kece na bikai tu ena veimataqali mate . . . , e vakabulai ira o koya.”—MACIU 4:⁠24.

ENA VAKARAUTAKA O JISU NA VALE KEI NA KAKANA.

“Era [ira na vakarurugi ena veiliutaki i Karisito] na tara vale era na tiko kina, era na tea na loganivaini era na kania na vuana. Era na sega ni tara vale qai duatani e tawana, era na sega ni tea qai duatani e kania.”—⁠AISEA 65:21, 22.

VAKILAI NA SAUTU KEI NA VEIYALONI E VURAVURA NI VEILIUTAKI O JISU.

“Ena nona siga era na buroro na yalododonu, ena qai vakilai na sautu me yacova ni oti na vula. Ena lewai ira o koya mai na dua na wasawasa ina dua tale na wasawasa mai na Uciwai tale ga ina iyalayala kei vuravura. . . . Na kena meca tale ga era na dramica na kuvuniqele.”—⁠SAME 72:7-9.

ENA VAKAOTIA O JISU NA LEWA CA.

“Ena lomani ira na vakaloloma kei na dravudravua, ena vakabula tale ga na dravudravua. Ena vakabulai ira mai na veivakasaurarataki kei na ivalavala kaukaua.”—⁠SAME 72:13, 14.

ENA VAKAOTIA O JISU NA RARAWA KEI NA MATE.

“Sa na sega tale na mate, na lolosi, na tagiyaso, kei na mosi.”—⁠VAKATAKILA 21:⁠4.

“GAUNA LEWALEWAI DREDRE NI LOMAOCAOCA”

“Sa qai vakilai ga vakalevu e vuravura nikua na lomaocaoca, nuiqawaqawa, rarawa kei na mosi ena kena ivakatagedegede ca sara.”—⁠Mohamed S. Younis, manidia ni kabani na Gallup.

Cava sa rui levu kina na lomaocaoca? E vakamacalataka vinaka na iVolatabu. E tukuni ena 2 Timoci 3:1: “Na iotioti ni veisiga . . . e gauna lewalewai dredre ni lomaocaoca kei na leqa.” (The Amplified Bible). E tomana na iVolatabu qori ni vakavuna na lomaocaoca na itovo ni tamata. Era okati ena itovo qori na kocokoco, dokadoka, lotu vakarairai, ivalavala voravora, sega na veilomani vakaveiwekani, sega tale ga na lewa matau. (2 Timoci 3:2-5) Ena cava na iotioti ni veisiga ni sa Tui ni Matanitu ni Kalou o Karisito me veiliutaki mai lomalagi, me lewai keda na tiko e vuravura.—⁠Taniela 2:⁠44.