Lewa Vinaka na Lomaocaoca

E tukuni ena iVolatabu na gauna “ena vakilai kina e levu na lomaocaoca kei na leqa.” O na rairai duavata kina nida bula sara tiko ga qo ena gauna e levu kina na lomaocaoca.​—2 Timoci 3:1, na Amplified Bible.

O NA kila vinaka ni rawarawa cake na bokoci ni yameyame lalai mai na dua na kama vakaitamera. E tautauvata tale ga qo ni rawarawa na kena lewai vakavinaka na lomaocaoca e lailai mai na lomaocaoca e kumukumuni tiko mai vakadede ena loma ni dua na gauna. E tukuna e dua na vuniwai, “dina ga ke da sa rui osooso, e bibi dina ena noda bula meda dau lewa vinaka e veisiga na lomaocaoca.”a

E rua tiko na inaki meda dau lewa vinaka kina na noda lomaocaoca e veisiga. Na kena imatai, eda rawa ni vakalailaitaka kina na ka e vakavuna na lomaocaoca. Na kena ikarua, eda rawa ni lewai keda vinaka ena so na ka eda lomaocaocataka ena sega ni levei rawa.

E kunei beka ena iVolatabu na iwali ni lomaocaoca?

E Bibi na Ka Dina ni iVolatabu

Nida vulica na ka dina vakaivolatabu, eda na kila kina na nona vakasama na Dauveibuli, e veivakacegui qai veivakabulai. E yaga na veidusimaki ni Vosa ni Kalou. Qo e vaka e dua na tobu vakaitamera e sinai kina na ka dina vakayalo e rawa ni vakalailaitaka na lomaocaoca! Ena yaga qo meda ‘kua kina ni rere, se yalolailai’ da qai vosota na lomaocaoca ni veisiga.​—Josua 1:7-9.

E uqeti keda na iVolatabu ena dua na sala totoka meda kua kina ni lomaocaoca vakasivia. E vakadeitaka ni “dau yalololoma qai dau veinanumi” na tamada Vakalomalagi o Jiova. (Jemesa 5:11) E kaya o Patricia e dua na parofesa ena univesiti mai Kalifonia, “na ka e uqeti au vakalevu, noqu vakasamataka na loma ni Kalou kei na veika totoka e cakava tiko.”

Vakasamataka mada na kena veivakacegui vei ira na bibivoro kei ira na lomaocaoca ena gauna makawa na nodra rogoca na malumu ni nona vosa o Jisu kei na ka e cakava. “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni.”​—Maciu 11:28-30.

A sega ni yalodredre o Jisu, a cakava na ka e tukuna. A dau nanumi ratou na tisaipeli ena veika eratou gadreva, e tuvanaka sara mada ga na gauna me ratou cegu kina mai na nodratou osooso ni cakacaka vakavunau. (Marika 6:30-32) Ni sa veiliutaki tiko mai lomalagi o Jisu, eda nuidei ni nanumi keda ena gauna e vakamalumalumutaki keda kina na lomaocaoca. Na nona lomani keda e vukei keda “ena gauna eda gadreva kina.”​—Iperiu 2:17, 18; 4:16.

Yaga ni Veivosaki Vinaka

E yaga duadua na veivosaki vinaka me lewai vinaka kina na lomaocaoca. E vakavuvulitaka na iVolatabu: “Ni sa sega na bose, sa sega ni yaco na ka e nanumi: ia ni ra sa lewe vuqa na daubose, sa vakataudeitaki.” (Vosa Vakaibalebale 15:22) Era vakadinata eso, ni lailai nodra lomaocaoca nira veivosaki kei watidra, nodra itokani, se dua era cakacaka vata.

O koya e bibi duadua, e yaga qai vakarawarawataka “na bose” oya na masu vua na Kalou. Nomu vakayagataka wasoma na isolisoli qo ena uqeti iko mo kua “ni lomaocaocataka e dua na ka.” Era vakadinadinataka e levu ni nodra vakararavi ena masu, era vakila kina “na vakacegu ni Kalou e uasivia na vakasama kece.” Nodra nanuma dei na yalayala ena iVolatabu, e taqomaki kina na ‘lomadra kei na nodra vakasama.’​—Filipai 4:6, 7; Vosa Vakaibalebale 14:30.

E vakamacalataka e dua na ivola me baleta na lomaocaoca ni “vinaka cake sara nodra lewa na nodra lomaocaoca o ira era dau tokoni ira nodra itokani, ni vakatauvatani kei ira era via cakava ga vakataki ira na ka kece.” E sega tale ni dua ena veitokoni vinaka me tautauvata kei ira era qarava na Kalou dina o Jiova. Nodra muria na ivakaro ena iVolatabu, era soqoni vata vakawasoma ra qai veivakayaloqaqataki. (Iperiu 10:24, 25) E kaya e dua na dau tiko ena soqoni va qo, “Au dau suka bera mai na cakacaka ena so na gauna, au qai dau lomaocaoca vakalevu. Ia na noqu gole ina soqoni au vakila ena iotioti ni masu, ni sa oti noqu lomaocaoca, au bulabula tale ga.”

Me kua ni guilecavi na yaga ni veiwali nida lomaocaoca. Na Dauvunau 3:4 e kaya ni tiko na siga “ni tagi, kei na siga ni dredre.” E veivakacegui qai veivakabulabulataki na dredre me vaka e vakamacalataka e dua na vuniwai, “sa na tekivu cakacaka ina yagoda na wainimate na endorphin e tiko ena noda mona e dau vakila na mosi, qai tarova na drodro ni adrenaline ena gauna eda dredre kina.” E kaya e dua na yalewa vakawati: “Ena gauna e dredre sara tu ga kina na bula, e dau vakalutu vosa sara o watiqu, e dau yaga dina qo.”

Na iTovo e Vakalailaitaka na Lomaocaoca

Na iVolatabu e uqeta na itovo ena vakalailaitaka na locaocaoca. Qo “na loloma, marau, vakacegu, vosota vakadede, yalololoma, yalovinaka, vakabauta, yalomalua, [kei na] lewai koya vinaka,” era vakatokai me “vua ni yalo tabu [ni Kalou].” E uqeti keda na iVolatabu meda kua ni ‘yaloca, cudrucudru, yalokatakata, karakara, kei na vosavakacaca.’ E qai kuria: “Moni veilomani, ni veinanumi, ni yalorawarawa moni veivosoti.”​—Kalatia 5:22, 23; Efeso 4:31, 32.

A vakamacalataka e dua na vuniwai na yaga ni kena muri na ivakavuvuli vakaivolatabu qo, vakauasivi ena vuravura eda sa bula tu kina qo. E kaya, “Na veidokai e dua na ivakamalumu levu ni lomaocaoca.” E uqeti keda tale ga na iVolatabu meda yalomalumalumu, qo e dusia ni dodonu meda kila ni na vakarauta ga na ka eda rawa ni cakava.​—Maika 6:8.

Na Kalou e namaka meda ciqoma ena yalomalumalumu ni vakaiyalayala ga na ka eda rawata, da qai sega ni cakava rawa kece na ka eda via cakava. Dina ni na dredre, ena vinaka meda vulica noda vakasega ena so na gauna ina so na ka eda kila nida na sega ni cakava rawa.

E sega ni tukuni tiko eke ni kena muri na veidusimaki kece ena iVolatabu e sa cavuti oti mai, sa na oti na lomaocaoca. Na kena dina ga ya, o Setani na Tevoro e sagai ira tiko vakaukaua na dauqaravi Kalou, mera biuta na sokalou dina ena gauna era lomaocaoca kina. (Vakatakila 12:17) Me vaka ga eda sa raica mai, na Kalou e vakarautaka ena gauna donu e vuqa na sala meda vosota da qai kua ni lomaocaoca vakasivia.b

[iVakamacala e ra]

[Kato ena tabana e 17]

ESO NA SALA ME VAKALAILAITAKI KINA NA LOMAOCAOCA

● Kua ni namaka ni o uasivi se o ira tale na so.​—Dauvunau 7:16.

● Me donu na ka o vakaliuca.​—Filipai 1:10, 11.

● Dau vakaukaua yago.​—1 Timoci 4:8.

● Dau marautaka na veika e bulia o Jiova.​—Same 92:4, 5.

● Mo dau vakanomodi ena so na gauna.​—Maciu 14:23.

● Me veiraurau na gauna ni vakacegu kei na moce.​—Dauvunau 4:6.

[iYaloyalo ena tabana e 15]

E bibi na veivosaki me lailai kina na lomaocaoca

[iYaloyalo ena tabana e 15]

E vakalailaitaki na lomaocaoca ni bucini na itovo vakalou