CAVA MO CAKAVA NI TUBU NA ISAU NI IYAYA?

Mo Lomavakacegu

Era mamarau o ira era lomavakacegu ena ka e tu vei ira. Ni veisau na kedra ituvaki, era cakava na veiveisau me rawa nira bula ena ilavo ga era rawata.

VUNA MO KAUAI KINA

E kaya o Jessica Koehler e dua na vuniwai ni vakasama, ni dau donu tu ga nodra rai o ira na lomavakacegu. Era sega ni dau vuvu. Era mamarau qai sega ni nuiqawaqawa vakalevu. E sega ni levu na ka era taukena o ira era dau mamarau. Na vuna? Baleta nira vakamareqeta na ka e sega ni volia rawa na ilavo, ya na marau era vakila nira vakayagataka nodra gauna ena vuvale se itokani.

“Ke sa tiko na kakana, na isulu, meda lomavakacegu ena veika qo.”—1 Timoci 6:8.

KA O RAWA NI CAKAVA

Kua ni vakatauvatani iko kei ira eso tale. O na sega ni marau qai rawa sara ga ni o vuvu, ke o vakatauvatana na veika e tu vei iko kei ira na vutuniyau. Ia de dua e sega ni dina qori. Eso mada ga era vutuniyau, rairai era dinautaka tu na ka era taukena. O Nicole e tiko e Senegal, e kaya: “Eso e tu vei ira e levu na ka. Ia au marau qai lomavakacegu ni sega ni levu na ka au taukena.”

Tovolea qo: Kua ni vakaraica na itukutuku ni veivoli, se so na ka e biu ena internet e vakaraitaki kina na levu ni ka era taukena eso tale.

“Ke levu mada ga na ka e tu vua e dua, ena sega ni vakatau na nona bula ena veika e taukena.”—Luke 12:15.

Dau vakavinavinaka. O ira na dau vakavinavinaka era na lomavakacegu, ra qai sega ni vakasamataka me levu na ka era taukena. O Roberton e tiko mai Haiti, e kaya: “Au dau vakasamataka na nodra kauaitaki au eso, kei na noqu vuvale. Au dau vakavinavinakataka na ka era cakava. Au vakavulici luvequ tagane e yabaki walu, me vakavinavinakataka tale ga na ka e soli vua.”

Tovolea qo: Vola e veisiga e dua na ka o vakavinavinakataka, me vaka na nomu bula, nomu vuvale, ira na itokani, se na totoka ni dromu ni siga.

“O koya e marau na lomana e kana magiti tiko ga.”—Vosa Vakaibalebale 15:15.

Eso na gauna e dau dredre meda lomavakacegu ena ka eda taukena. Ia ena yaga noda sasaga! Eda na marau nida lomavakacegu, qori e dua na itovo e sega ni volia rawa na ilavo.