Na Cicivaki kei na Tuvanaki ni iVavakoso

ENA imatai ni nona ivola na yapositolo o Paula vei ira mai Korinica, e vakaraitaka kina e dua na ka bibi me baleta na Kalou: “Ni Kalou e sega ni Kalou ni yakusurasura, ia e Kalou ni vakacegu.” E tomana nona ivakamacala me baleta na soqoni vakaivavakoso: “Na ka kece e caka me rakorako qai tuvanaki vakamatau.”—1 Kor. 14:33, 40.

² Ena itekitekivu ni ivola vata qo, e veivakasalataki kina na yapositolo me baleta na duiyaloyalo sa mai basika ena ivavakoso e Korinica. E uqeti ira na mataveitacini mera ‘duavata ena ka era tukuna,’ mera ‘duavata ena rai kei na inaki.’ (1 Kor. 1:10, 11) Sa qai vakasalataki ira ena vica na ka e vakavuna tiko na duiyaloyalo ena ivavakoso. E vakayagataka na ivakatautauvata ni yago me vakaraitaka na bibi ni duavata kei na veitokoni. E uqeti ira ena ivavakoso mera kua ni kauaitaka na ka era duidui kina, mera veilomani ga, mera veinanumi. (1 Kor. 12:12-26) Na nodra duavata e vakaraitaka ni na tuvanaki vakamatau na ivavakoso.

³ Ia ena tuvanaki vakacava na ivavakoso vaKarisito? O cei ena tuvanaka? Na idusidusi cava me muri? O cei ena veiqaravi kina? Eda na raica na kena isau ena iVolatabu.—1 Kor. 4:6.

TUVANAKI VAKALOU

⁴ A tauyavu na ivavakoso vaKarisito ena Penitiko 33 G.V. Na cava eda vulica me baleta na ivavakoso ena imatai ni senitiuri? A tuvanaki qai liutaki (vaKirisi, kraʹtos) vakalou (the·osʹ). Na vosa ruarua qori e basika ena 1 Pita 5:10, 11. E macala mai na ka e yaco e Jerusalemi rauta na 2,000 na yabaki sa oti, ni a tauyavutaka na Kalou na nodra ivavakoso na lotu vaKarisito lumuti. (Caka. 2:1-47) Na ivavakoso qo e vale ni Kalou, se nona lewenivuvale. (1 Kor. 3:9; Efeso 2:19) Nikua tale ga era muria tiko na ivavakoso vaKarisito na ituvatuva kei na cicivaki ni ivavakoso e tekivutaki ena imatai ni senitiuri.

⁵ E rauta nira le 120 na tisaipeli ena gauna e tauyavu kina na ivavakoso. A sovaraki e liu na yalo tabu vei ira qo me vaka e parofisaitaki ena Joeli 2:28, 29. (Caka. 2:16-18) Ena siga vata ya era papitaiso kina ena wai e rauta ni le 3,000 tale, mera okati ena ivavakoso vaKarisito lumuti. Era ciqoma na itukutuku i Karisito ra qai “muria tiko ga na nodra ivakavuvuli na yapositolo.” Tekivu mai na gauna ya, “e vakatubura tiko ga o Jiova e veisiga na kedra iwiliwili na vakabulai.”—Caka. 2:41, 42, 47.

⁶ Totolo sara na tubu ni ivavakoso e Jerusalemi, era mani kudruvaka na nodra bete levu na Jiu ni vakasinaiti Jerusalemi na nodra ivakavuvuli na tisaipeli. Era mai tisaipeli vou e Jerusalemi e levu na bete ni lotu vakaJiu, era sa mai veitomani ena ivavakoso.—Caka. 5:27, 28; 6:7.

⁷ E kaya o Jisu: “Dou na qai tukuni au e Jerusalemi, e Jutia taucoko, e Samaria, kei na veivanua yawa sara kei vuravura.” (Caka. 1:8) E qai yaco dina na ka e kaya. Ni mate oti ga o Sitiveni, era tusaqati vakaca na tisaipeli e Jerusalemi, ra mani dui se ena vanua taucoko o Jutia kei Samaria. Era kacivaka na tisaipeli na itukutuku vinaka ena vanua kece era dui se kina. Levu tale na tisaipeli vou, wili kina eso mai Samaria. (Caka. 8:1-13) Toso na gauna e vunautaki rawa na itukutuku vinaka vei ira na veimatanitu tawacili, era sega ni Jiu. (Caka. 10:1-48) Levu era mai tisaipeli ena vuku ni cakacaka vakavunau kece qori, sa tauyavu tale ga na ivavakoso vou ena taudaku kei Jerusalemi.—Caka. 11:19-21; 14:21-23.

⁸ Na ituvatuva cava e muri me tuvanaki qai cicivaki kina vakalou na ivavakoso vou? Ena veidusimaki ni yalo tabu, era lesi eso na ivakatawa mera qarava na qelenisipi. Na ivavakoso erau sikova o Paula kei Panapasa ena imatai ni nodrau ilakolako vakaulotu, erau a lesia eso na qase. (Caka. 14:23) E vakamacalataka na dauvola iVolatabu o Luke nodra bose kei Paula na qase ena ivavakoso e Efeso. E kaya vei ira o Paula: “Ni qarauni kemuni kei na qelenisipi e lesi kemuni kina na yalo tabu moni kena ivakatawa, ni vakatawa na ivavakoso ni Kalou e volia sara ga ena dra i Luvena.” (Caka. 20:17, 28) Era lesi mera qase nira rawata na kena ivakatagedegede vakaivolatabu. (1 Tim. 3:1-7) A vakaitavi tale ga o Taito na itokani vakacakacaka i Paula, me lesi ira na qase ena ivavakoso e Kiriti.—Taito 1:5.

⁹ Ni tauyavu e levu na ivavakoso ena imatai ni senitiuri, era vakatulewataka tiko ga na yapositolo kei na qase e Jerusalemi na veika e vauca na ivavakoso kece. Era kena ilawalawa dauvakatulewa.

¹⁰ Ni volavola na yapositolo o Paula ina ivavakoso e Efeso, e vakamacalataka ni cakacaka vata na ivavakoso vaKarisito kei na yalo tabu ni Kalou, sa rawa nira duavata na ivavakoso vaKarisito nira tokona na veiliutaki i Karisito. E vakadreti ira na lotu vaKarisito e kea na yapositolo mera yalomalumalumu, mera maroroya na “duavata e vakavuna na yalo tabu,” qori nodra veiyaloni kei ira kece ena ivavakoso. (Efeso 4:1-6) E cavuqaqataka sara na Same 68:18 qai vakamacalataka ni vakarautaka o Jiova na isolisoli tamata era matua vakayalo mera qarava na ivavakoso. Eso era yapositolo, so era parofita, eso mera vunautaka na itukutuku vinaka, eso era ivakatawa, eso tale era qasenivuli. Era isolisoli i Jiova me vakaukauataki kina vakayalo na ivavakoso kece me rawa ni vakadonuya na Kalou.—Efeso 4:7-16.

MURI NIKUA NA ITUVATUVA ERA TAUYAVUTAKA NA YAPOSITOLO

¹¹ Nikua, e muri na ituvatuva qori ena ivavakoso kece ni iVakadinadina i Jiova. E duavata na ivavakoso kece e vuravura, era tiki bibi ni ivavakoso qo na lotu vaKarisito lumuti. (Saka. 8:23) E rawati qori ni a dina tiko ga o Jisu Karisito ena nona yalataka ni na tiko vata kei ira nona tisaipeli lumuti “ena veisiga kece me yacova na ivakataotioti ni veika vakavuravura.” Era sa mai okati ena ivavakoso, era ciqoma na itukutuku vinaka ni Kalou, era yalataka vakatabakidua vei Jiova na nodra bula, ra qai papitaiso mera tisaipeli i Jisu. (Maciu 28:19, 20; Mari. 1:14; Caka. 2:41) Era kila ni “ivakatawa vinaka” o Jisu Karisito e Ulu sara ga ni qelenisipi taucoko, okati kina o ira na lotu vaKarisito lumuti kei na ‘so tale na sipi.’ (Joni 10:14, 16; Efeso 1:22, 23) Na “dua ga na qelenisipi” qo e duavata nira doka na veiliutaki i Karisito ra qai vakamalumalumu ina ilawalawa e lesia o Karisito me cicivaka na isoqosoqo, na “dauveiqaravi yalodina e vuku.” Meda nuitaka mada ga vakatabakidua na ilawalawa qori nikua.—Maciu 24:45.

ITAVI NI ISOQOSOQO VAKALAWA

¹² Me rawa ni vakarautaki na kakana vakayalo ena kena gauna donu, me vunautaki tale ga na itukutuku vinaka ni bera na icavacava, e tauyavu kina eso na isoqosoqo vakalawa. Na isoqosoqo qori e rejisitataki vakamatanitu ra qai cakacaka vata kece. E vakarawarawataka na vunautaki ni itukutuku vinaka e veiyasa i vuravura.

NA CICIVAKI NI VALENIVOLAVOLA NI TABANA

¹³ Ni tauyavu na valenivolavola ni tabana ena dua na matanitu, e dau lesi e dua na Komiti ni Tabana me cicivaka. Na komiti qo eratou lewena e tolu na qase se sivia. Eratou na qarava na veika e vauca na cakacaka ena nodratou vanua kei na so tale na matanitu era vakarurugi ena valenivolavola ni tabana ya. Dua vei ratou ena lesi me Kodineita ni Komiti ni Tabana.

¹⁴ Na ivavakoso era vakarurugi ena valenivolavola ni tabana yadua era wasei ena vica na tabacakacaka. E duidui na levu ni tabacakacaka, vakatau ena levu ni vanua, veiyawaki ni ivavakoso, vosa e vosataki kina, kei na levu ni ivavakoso e lesi ena valenivolavola ni tabana ya. E dau lesi e dua na ivakatawa ni tabacakacaka me qarava na ivavakoso kece ena dua na tabacakacaka. Na valenivolavola ni tabana ena veidusimaki ena ka me cakava na ivakatawa ni tabacakacaka.

¹⁵ Era muria na lewe ni ivavakoso na ituvatuva ni isoqosoqo ni yaga vei ira kece. Era duavata ena nodra lesi na qase, nira qarava na itavi ena valenivolavola ni tabana, na tabacakacaka, kei na ivavakoso. Era nuitaka na dauveiqaravi yalodina e vuku me vakarautaka na kedra kakana vakayalo ena kena gauna donu. Ena gauna vata qori, e talairawarawa na dauveiqaravi yalodina ena veiliutaki i Karisito, e muria na ivakavuvuli vakaivolatabu kei na veidusimaki ni yalo tabu. Nida cakacaka vata kece, ena yaco na veika vata ga a yaco ena ivavakoso ena imatai ni senitiuri: “E vakadeitaki tiko ga nodra vakabauta na lewe ni ivavakoso qai tubu tiko ga e veisiga na kedra iwiliwili.”—Caka. 16:5.