“Me Yaco Mai na Nomuni Matanitu”

E yalataka o Jiova: ‘Sa na sega tale na tagi, na mosi, na tauvimate, se mate. Au na qusia tani na wainimata kece mai na matadra. Sa na guilecavi na ka ca kece e dau yaco e liu.’

O Jiova a biuti Atama kei Ivi ena were o Iteni me rau bula marau, bula vakacegu tale ga. E dodonu me rau sokaloutaka na Tamadrau vakalomalagi, me rau vakatawai vuravura kei na nodrau kawa. Erau talaidredre vei Jiova o Atama kei Ivi, ia e sega ni veisautaka nona inaki. Eda raica ena ivola qo ni yaco dina na ka kece e yalataka na Kalou. Ena vakarautaka nona Matanitu e levu sara na veivakalougatataki totoka e vuravura, me vaka e yalataka vei Eparama.

Sa vakarau vakarusai o Setani, ira nona timoni, kei ira kece na tamata ca. Era na sokalou vei Jiova o ira kece na bula. Eda na sega ni tauvimate se mate. Eda na bulabula vinaka nida yadra e veimataka, eda na mamarau. Sa na parataisi na vuravura. Eda na marautaka na kakana totoka kei na vale vinaka. Eda na veilomani, sa na sega na ivakarau kaukaua. Era na sega ni rerevaki keda na manumanu kila, eda na sega tale ga ni rerevaki ira.

Sa na marautaki mada ga ni tekivu veivakaturi o Jiova. Eda na sotavi Epeli, Noa, Eparama, Sera, Mosese, Ruci, Esiteri, kei Tevita. Eda na cakacaka vata me veisautaki na vuravura me parataisi. Ena levu sara na itavi marautaki meda cakava.

E vinakata o Jiova mo tiko e kea. Ena levu tale na ka o na vulica me baleti koya. Meda toro volekati koya tiko ga ena veisiga me tawamudu!