Vakaukauataki Samisoni o Jiova

Era qaravi matakau tale e levu na Isireli, mani vakatara o Jiova mera lewa na kai Filisitia nodra vanua. Ia era lomani Jiova eso na Isireli, dua vei ira o Manoa. Rau sega ni vakaluveni kei watina. Dua na siga, e tala o Jiova e dua na agilosi me tukuna vei wati Manoa: ‘Ena dua na luvemu tagane. Ena vakabulai ira na Isireli vei ira na kai Filisitia. Ena Nasaraiti o koya.’ O kilai ira na Nasaraiti? Era dauveiqaravi digitaki i Jiova. E tabu ni koti na drauniuludra.

E qai sucu na luvena tagane o Manoa, e vakayacani koya me o Samisoni. Ni tubu cake tiko, e vakaukauataki koya o Jiova. A rawa ni vakamatea ga e ligana na laione. Dua na gauna e vakamatea e 30 na kai Filisitia. Era sevaki koya na kai Filisitia ra qai via vakamatei koya. Dua na bogi ni se moce tiko o Samisoni ena koro o Kesa, era waraki koya tu na lewenivanua ena matamatanikoro mera vakamatei koya ena mataka tarava. Ia e duri mai ena lomaloma ni bogi o Samisoni, e lako qai cavuta na matamatanikoro qori. E colata sara ina dua na ulunivanua volekati Epironi!

Era qai lako na kai Filisitia vei Tilaila, na itau nei Samisoni, era kaya: ‘Keimami na solia vei iko e vica vata na udolu na tikinisiliva ke o tukuna na vuna e kaukaua kina o Samisoni. Keimami via biuti koya e valeniveivesu.’ E vinakata na ilavo o Tilaila, mani vakadonuya. A sega ni via tukuna o Samisoni na vu ni nona kaukaua. Ia e cike tiko ga o Tilaila qai tukuna vua o Samisoni nona ka vuni. E kaya, ‘Se sega vakadua ni koti na drauniuluqu niu dua na Nasaraiti. Ke koti, au na malumalumu.’ E cala sara ga na ka e cakava o Samisoni, se vakacava?

E lai tukuna sara o Tilaila vei ira na kai Filisitia: ‘Au kila nona ka vuni!’ E vakamoceri Samisoni, e qai kotiva na drauniuluna e dua tale. E kailavaka o Tilaila: ‘Samisoni, era sa tu qo na kai Filisitia!’ E duri mai o Samisoni, ia sa oti nona kaukaua. Era vesuki koya, vakamatabokotaki koya, ra qai biuti koya e valeniveivesu.

Dua na siga, era soqoni yani e vica vata na udolu na kai Filisitia ena valenisoro ni nodra kalou o Tekoni, era kailavaka: ‘Sa soli Samisoni mai na noda kalou! Kauti koya mai tuba! Meda dredrevaki koya mada.’ Era vakaduri koya ena maliwa ni duru ra qai vakalialiai koya. E masu o Samisoni: ‘Kemuni Jiova, yalovinaka ni vakaukauataki au tale mada.’ Ena gauna qo sa balavu tale na ulu i Samisoni. E biliga na duru ni valenisoro ena nona igu kece qai bale na vale. Era mate kece na tiko e loma, wili kina o koya.