iMatai ni Tui Isireli

E lesi ira na turaganilewa o Jiova mera liutaki ira na Isireli, ia era vinakata me dua nodra tui. Era tukuna vei Samuela: ‘Na veimatanitu kece qo e tiko nodra tui. Keimami vinakata tale ga e dua.’ E sega ni duavata kina o Samuela, mani masu vei Jiova. E tukuna vua o Jiova: ‘Era sega ni beci iko, era beci au ga. Tukuna vei ira ni rawa ni dua nodra tui, ia ena namaka vei ira e levu na ka.’ Era kaya na Isireli: ‘Veitalia, keimami vinakata ga e dua na tui!’

E tukuna vei Samuela o Jiova ni na digitaki Saula me imatai ni tui. E lako i Rama o Saula vei Samuela, e lumuti koya e kea ni livia e uluna na waiwai.

Dua na gauna e muri, e kacivi ira na Isireli o Samuela me vakaraitaka nodra tui vou. Ia e yali o Saula. Na vuna? Ni vuni tu ena ibinibini iyaya. Ni sa kune, e kau sara me duri ena kedra maliwa. E balavu duadua qai rairai vinaka. E tukuna o Samuela: ‘Raici koya e digitaka o Jiova.’ Era mani kailavaka: ‘Me bula balavu na tui!’

E dau rogoci Samuela o Tui Saula ni se qai tekivu veiliutaki, e talairawarawa tale ga vei Jiova. Ia e mani veisau. Kena ivakaraitaki, a sega ni dodonu me vakacaboisoro. Dua na gauna, e tukuna vei Saula o Samuela me waraki koya. Ia ni bera mai, e vakatulewataka ga o Saula me vakacaboisoro. Na cava e tukuna o Samuela? E kaya vei Saula: ‘E dodonu mo talairawarawa vei Jiova.’ Vakacava a vuli kina o Saula?

Ni lai valuti ira na Amalekaiti o Saula, e tukuna vua o Samuela me kua ni vakabula e dua. Ia e vakatulewataka me vakabulai Tui Ekaki. E tukuna o Jiova vei Samuela: ‘Sa gole tani o Saula qai sega ni muria na noqu vosa.’ E yalolailai sara ga o Samuela, e tukuna vei Saula: ‘Ni o sega ni talairawarawa vei Jiova, ena digia e dua tale na tui.’ Ni vuki o Samuela me lako, e dreta na bele ni nona kote o Saula mani kadresu. E qai tukuna vua o Samuela: ‘Sa kauta tani vei iko o Jiova na veiliutaki vakatui.’ Ena solia o Jiova na veiliutaki vua e dua e lomani koya, e talairawarawa tale ga vua.