LESONI 42
Rai ni iVolatabu me Baleta na Dawai kei na Vakawati
Eso na vanua, era vakabauta ni na marau ga e dua ke vakawati. Ia era sega ni marau kece na vakawati kei ira na dawai. E kaya na iVolatabu ni isolisoli na bula vakadawai kei na vakawati.
1. Na cava na yaga ni dawai?
E kaya na iVolatabu: “O koya e vakawati ena vinaka vua, ia o koya e sega ni vakawati ena vinaka cake.” (Wilika 1 Korinica 7:32, 33, 38.) Ena sala cava ena “vinaka cake” kina o koya e dawai? O ira na dawai lotu vaKarisito era na sega ni leqataka e dua na ka ni sega na watidra. Era na galala vakalevu. Kena ivakaraitaki, eso e rawa nira vakarabailevutaka nodra cakacaka vakaitalatala mera gole ena so tale na vanua mera vunautaka na itukutuku vinaka. Koya e bibi sara, ni levu na gauna era na volekati Jiova kina.
2. Na cava e yaga kina me vakalawataki na vakamau?
Me vaka ga na dawai, e tiko tale ga na yaga ni vakawati. E kaya na iVolatabu ni “vinaka na le rua mai na le dua.” (Dauvunau 4:9) Era vakadinadinataka qo na lotu vaKarisito era muria na ivakavuvuli vakaivolatabu ena nodra vakawati. Ni rau vakamau e le rua, erau yalataka ni rau na veilomani, veidokai qai veikaroni. Erau na nuidei kina ni vakatauvatani kei ira na bula vata tu ga era sega ni vakamau. Na vakawati vinaka tale ga e yavu dei me tauyavu kina na vuvale.
3. E raica vakacava o Jiova na vakawati?
Ni tauyavutaka o Jiova na imatai ni vakawati, e kaya: “Ena biuti tamana . . . kei tinana o tagane, ena kabiti watina.” (Vakatekivu 2:24) E vinakata o Jiova me rau veilomani na veiwatini, me rau duavata tiko ga me yacova na mate. E vakatara na veisere ke dua vei rau e veibutakoci. Ena ituvaki qori, o Jiova e solia na galala vua na isa ni vakawati e sega ni cala me digitaka me sereki watina se sega.a (Maciu 19:9) E sega ni vakadonuya o Jiova me dua na lotu vaKarisito me levu tu na watina.—1 Timoci 3:2.
VAKEKELI
Ke o dawai se vakawati vulica na sala mo marau kina, me marau tale ga o Jiova.
4. Vakayagataka vinaka na isolisoli ni bula vakadawai
E raica o Jisu na bula vakadawai me isolisoli. (Maciu 19:11, 12) Wilika Maciu 4:23, qai veivosakitaka na taro qo:
E vakayagataka vinaka vakacava o Jisu na isolisoli ni bula vakadawai me qaravi Tamana, me vukei ira eso tale?
E rawa nira marautaka na lotu vaKarisito na nodra bula vakadawai me vakataki Jisu. Sarava na VIDIO, qai veivosakitaka na taro tarava.
E rawa nira vakayagataka vinaka vakacava na lotu vaKarisito na nodra bula vakadawai?
O bau kila?
E sega ni cavuta na iVolatabu na yabaki me vakawati kina e dua. Ia e veivakasalataki ga me “sivia na bula vakaitabagone,” qori na gauna e kaukaua kina na gagadre ni veiyacovi ni rawa ni vakaleqa na nona vakatulewa.—1 Korinica 7:36.
5. Digia vinaka na kemu isa
E dua na vakatulewa bibi duadua oya nomu digia na kemu isa. Wilika Maciu 19:4-6, 9, qai veivosakitaka na taro qo:
Na cava me kua ni vakatotolotaka kina na lotu vaKarisito na vakawati?
Na iVolatabu ena vukei iko ena ka mo raica vua na kemu isa. Koya e bibi duadua, vaqara e dua e lomani Jiova.b Wilika 1 Korinica 7:39 kei na 2 Korinica 6:14, qai veivosakitaka na taro qo:
Na cava meda vakawatitaka ga kina e dua e lotu vaKarisito?
Na cava o nanuma, na cava na rai i Jiova ke o vakawatitaka e dua e sega ni lomani koya?
Ke rau biu vata e rua na manumanu erau duidui sara, ena dredre me rau cakacaka vata. Ena va tale ga qori na lotu vaKarisito e vakawatitaka e dua e sega ni tiko ena dina
6. Raica na vakawati mai na rai i Jiova
E Isireli makawa, eso na tagane era sereki watidra ena nodra kocokoco. Wilika Malakai 2:13, 14, 16, qai veivosakitaka na taro qo:
Na cava e cata kina o Jiova na veisere e sega ni yavutaki vakaivolatabu?
Na veibutakoci kei na veisere e vakararawataki ira na isa ni vakawati e sega nodra cala kei ira na gone
Sarava na VIDIO, qai veivosakitaka na taro tarava.
Ke o vakawatitaka e dua e sega ni qaravi Jiova, cava mo cakava me dei kina nomudrau vakawati?
7. Muria na ivakatagedegede i Jiova me baleta na vakawati
Ena rairai ka ni sasaga vua e dua me muria na ivakatagedegede i Jiova me baleta na vakawati.c Ia o Jiova ena vakalougatataki ira na cakava qori. Sarava na VIDIO.
Wilika Iperiu 13:4, qai veivosakitaka na taro qo:
Cava o nanuma, e veiganiti na ivakatagedegede i Jiova me baleta na vakawati? Na vuna?
E namaka o Jiova mera vakalawataka na lotu vaKarisito na nodra vakawati, kei na nodra veisere. Nira vinakata tale ga qori eso na vakailesilesi vakamatanitu ena levu na vanua. Wilika Taito 3:1, qai veivosakitaka na taro qo:
Ke o sa vakawati, o vakadeitaka ni sa vakalawataki na nomu vakamau qai kilai vakamatanitu?
KE TAROGA E DUA: “Cava mo vakamau kina, sega ni rawa nida tu vata ga?”
O na sauma vakacava?
KA O VULICA
Na bula vakadawai kei na vakawati e isolisoli i Jiova. Ena marautaki ga ke salavata kei na lomana.
Railesuvi
Ena vakayagataka vinaka vakacava e dua nona bula vakadawai?
Na cava e kaya kina na iVolatabu meda vakawatitaka ga e dua na lotu vaKarisito?
Na cava na yavu duadua ga vakaivolatabu ni veisere?
IKURI
Na cava na ibalebale ni “vakawati ga ena Turaga”?
Sarava e rua na vidio ena vukei iko mo vakatulewa vinaka ni o veibuku qai vakawati.
Dikeva na vuna e kaya kina e dua na tacida ni ka e solia vua o Jiova e uasivi sara mai na ka e vakayalia.
Na cava eso na ka me vakasamataka tiko e dua ni bera ni vakatulewataka me veisere se veibiu?
“Rokova ‘na ka sa Vauca Vata na Kalou’” (Na Vale ni Vakatawa, Tiseba 2018)
a Raica na iKuri ni iVakamacala 4 me baleta na veibiu e sega ni okati kina na veibutakoci.
b Ena so na vanua, era dau digitaka na isa ni vakawati na itubutubu. Ke yaco qori, na itubutubu dauloloma ena sega ni kauaitaka na ilavo se na itutu, ena kauaitaka ga me lomani Jiova.
c Ke o tiko vata kei na dua drau sega ni vakamau, na nomu biuti koya se vakamautaki koya e nomu vakatulewa sara ga.