iVakasala Yaga Vei Ira na Dawai kei Ira na Vakawati

“Au tukuna qo . . . meu uqeti kemuni ga moni cakava na ka e dodonu, ya me kua ni dua na ka e vakalatilati ena nomuni qarava tiko na Turaga.”—1 KOR. 7:35.

1, 2. Na cava e bibi kina meda qara na ivakasala ena iVolatabu me baleta na bula vakadawai kei na vakawati?

E VICA toka na ka e dau vakavuna na marau, rarawa se lomaleqa, dua vei ira qori na noda veimaliwai na tagane kei na yalewa. Ni veiveisau na ituvaki qori, ena vinakati meda kerea na veidusimaki ni Kalou. Ia e tiko eso tale na vuna meda cakava kina qori. Ena rairai marautaka tiko e dua na lotu vaKarisito na nona bula vakadawai, ia e vakila tale ga na nodra veiuqeti na nona vuvale se itokani me vakawati. Dua tale ena vinakata me vakawati, ia e se sega ni kunea e dua e veiganiti. Eso tale era vinakata na veidusimaki mera kila kina na itavi ni tagane se yalewa vakawati. Kuria qori, era vakatovolei na lotu vaKarisito dawai kei ira na vakawati ena veiyacovi vakasisila.

² Na ituvaki kece qori ena sega wale ga ni tara na noda bula marau, ena tara tale ga na noda veiwekani kei Jiova. Ena wase 7 ni nona ivola o Paula vei ira e Korinica, e veivakasalataki ena bula vakadawai kei na bula vakawati. A nona inaki me uqeti ira na dauwiliwili mera ‘cakava na ka e dodonu, ya me kua ni dua na ka e vakalatilati ena nodra qarava tiko na Turaga.’ (1 Kor. 7:35) Ke o dawai se vakawati, vakasamataka na ivakasala i Paula qai vakayagataka vinaka na kemu ituvaki mo qaravi Jiova kina.

Vakatulewa Bibi Meda Cakava

3, 4. (a) Na cava e rawa ni yaco ke ra lomaleqa na weka se itokani ni sega ni vakawati e dua? (b) E yaga vakacava na ivakasala i Paula me donu tiko ga kina na noda rai me baleta na vakawati?

³ Me vakataki ira na Jiu ena imatai ni senitiuri, e levu tale ga na itovo vakavanua nikua e vakabibitaki kina na vakawati. Ke dua na cauravou se goneyalewa sa sivita na yabaki ni vakawati, de dua era na lomaleqataki koya na nona itokani kei ira na wekana, ra qai uqeti koya me vakawati. Era na rairai tukuna me kua ni wele me vaqaqara tiko ga. De dua era na vakatututaka e dua e veiganiti me vakawatitaka. Eso era na rairai cakava vaqaseqase me rau sota e le rua. Qori e rawa ni vakavuna ena so na gauna na madua, tagutuvi ni veikilai kei na rarawa.

⁴ O Paula a sega vakadua ni vakasaurarataka e dua me vakawati se me dawai. (1 Kor. 7:7) E marau ga ni qaravi Jiova ena nona bula vakadawai. A sega ni vakalewai ira na via vakawati. O ira tale ga na lotu vaKarisito nikua, e tu vei ira na dodonu mera vakatulewataka mera vakawati se sega. E sega ni dodonu me vakasaurarataki e dua me vakawati se me dawai.

Vakayagataka Vinaka na Bula Vakadawai

5, 6. Na cava e vakatututaka kina o Paula na bula vakadawai?

⁵ E laurai mai na ka e cavuta o Paula vei ira e Korinica, ni donu na nona rai me baleta na bula vakadawai. (Wilika 1 Korinica 7:8.) A dawai o Paula, ia a sega ni vakacerecerei koya vei ira na vakawati, me vaka era cakava tu nikua na iliuliu ni lotu dawai ena veivanua lotu vakarisito. E tukuna ga na ka vinaka era na marautaka e levu na dawai era italatala ni itukutuku vinaka. Na ka vinaka cava qori?

⁶ Ena rawarawa vua na lotu vaKarisito dawai me ciqoma eso na ilesilesi vaKalou, de dua ena dredre me cakava qori o koya e vakawati. A ciqoma o Paula e dua na ilesilesi dokai me ‘yapositolo e talai ina veimatanitu.’ (Roma 11:13) Wilika na Cakacaka wase 13 ina wase 20, raitayaloyalotaki Paula kei ratou na nona itokani daukaulotu ni ratou vunau tiko ena so na yalava vovou kei na nodratou tauyavutaka na ivavakoso ena veivanua eratou lakova. A vosota o Paula na ituvaki dredre vata ga era sotava tu eso nikua. (2 Kor. 11:23-27, 32, 33) A rawa ni vosota na ituvaki dredre qori baleta ni via veivakatisaipelitaki, qo e vakamarautaki koya vakalevu. (1 Ces. 1:2-7, 9; 2:19) De dua ena sega ni cakava rawa qori o Paula ke vakawati se vakaluveni.

7. Tukuna e dua na kena ivakaraitaki ena nodrau vakayagataka na nodrau bula vakadawai e rua na iVakadinadina me rau vakalevutaka kina na cakacaka ni Matanitu ni Kalou.

⁷ E levu na lotu vaKarisito nikua era vakayagataka na nodra bula vakadawai mera vakalevutaka kina na cakacaka ni Matanitu ni Kalou. Erau dawai o Sara kei Limbani, erau painia tiko e Bolivia. Erau toki ina dua na koro e sega ni tarai tu me vica vata na yabaki. Vakacava ena vakadredretaka na nodrau toki ni sega kina na livaliva? Erau tukuna: “E sega na retio kei na tivi, na ka ga ena vakawelei ira na lewenivanua na wilivola, nira dau taleitaka qori.” Eso na lewenikoro era vakaraitaka vei rau na noda ivola vakaivolatabu era dau wilika, sa sega tale ni qai tabaki nikua. E voleka nira tataleitaki kece na itaukeinivale, e dredre kina me rau tara kece na yalava oya. E tukuna vei rau e dua sa kena marama sara: “Kena irairai ni sa voleka qo na icavacava baleta oni sa qai mai vunau na iVakadinadina i Jiova.” Ni toso na gauna, eso vei ira qori era tiko sara ena soqoni.

8, 9. (a) Na cava e tukuna kina o Paula ni vinaka meda qaravi Jiova nida dawai? (b) Na cava e rawa nira cakava na lotu vaKarisito dawai?

⁸ E vuavuaivinaka tale ga na nodra cakacaka na lotu vaKarisito vakawati nira vunau ena yalava dredre. Ia eso na ilesilesi era qarava na painia dawai, ena rairai dredre vei ira na vakawati se vakaluveni. A raica o Paula ni levu na ka e rawa nira cakava na ivavakoso me vunautaki kina na itukutuku vinaka. A vinakata mera marau tale ga me vakataki koya. Oya na vuna e tukuna kina ni vinaka na qaravi Jiova nida dawai.

⁹ E tukuna e dua na tacida yalewa dawai, e painia tiko e Merika: “Eso era nanuma ke da sega ni vakawati eda na sega ni marau. Ia au raica ni rawati na marau dina ena noda veiwekani kei Jiova. Nida dawai, eda vakuai keda mai na levu na ka, ia ena yaga ga vakalevu ke da vakayagataka vakavinaka na gauna qori.” E tukuna me baleta na rawati ni marau: “Na bula vakadawai e rawa ni rawati kina na marau, e sega ni vakadredretaka. Au kila ni o Jiova e lomani keda kece, ke o dawai se vakawati.” E marautaka tiko na tacida qo na nona veiqaravi ena vanua e gadrevi vakalevu kina na dautukutuku ni Matanitu ni Kalou. Ke o dawai, o rawa ni vakayagataka na galala qori mo vakalevutaka na nomu veivakavulici ena ka dina vei ira tale eso? O na vakadinadinataka tale ga ni bula vakadawai e nona iloloma talei o Jiova.

O Ira na Via Vakawati

10, 11. Nira vaqara tiko na dawai na kedra isa veiganiti, ena tokoni ira vakacava o Jiova?

¹⁰ Nira dawai voli ena loma ni dua na gauna, e levu na dauveiqaravi i Jiova era nanuma mera sa qara e dua me watidra. Nira kila ni gadrevi na veidusimaki, era kerea na veivuke i Jiova ena nodra qara e dua na kedra isa veiganiti.—Wilika 1 Korinica 7:36.

¹¹ Ke o via vakawatitaka e dua e tautauvata na nomudrau isausau mo drau qaravi Jiova ena lomamudrau taucoko, talaucaka qori vei Jiova. (Fpai. 4:6, 7) Se mani vakacava na dede ni nomu wawa, kua ga ni yalolailai. Mo nuitaka ni na vukei iko na Kalou dauloloma, ena tokoni iko mo vosota tiko na ituvaki qori.—Iper. 13:6.

12. Na cava me vakasamataka vinaka na lotu vaKarisito ke dua e vosaki koya?

¹² Vakacava ke dua e malumalumu tu vakayalo se dua e sega ni qaravi Jiova e vosaka e dua na lotu vaKarisito dawai? Ke o sotava qori, nanuma tiko ni rarawa o na vakila ena nomu digidigi cala, ena levu cake mai na galili o vakila ena gauna o se dawai kina. Mo kila tiko ni gauna o sa vakawati kina, ke mani vinaka se ca na bula vakawati, drau sa vauci vata ena nomudrau bula taucoko. (1 Kor. 7:27) Kua gona ni vakatulewa vakariri mo vakawatitaka ga e dua, de o na veivutunitaka e muri.—Wilika 1 Korinica 7:39.

Vakavakarau ena Bula Vakawati

13-15. Ni rau veibuku tiko e rua, na cava eso na ka me rau veivosakitaka ena rawa ni vakaleqa na nodrau bula vakawati?

¹³ A tukuna o Paula ni vinaka meda qaravi Jiova nida dawai, e sega ga ni vakalewai ira na via vakawati. Ia na nona ivakasala uqeti vaKalou, e vukei ira na veiwatini mera vosota na ka era na sotava kei na ka mera cakava me dei tiko ga kina na nodra bula vakawati.

¹⁴ Eso na veiwatini ena vinakati mera veisautaka na nodra rai me baleta na ka era nanuma ni na yaco ena nodra bula vakawati. Ena gauna era veibuku kina, erau na rairai nanuma ni totoka vakaoti na nodrau veilomani. Erau nanuma ni sega ni dua na ka ena vakaleqa na nodrau veivinakati. Ia qori e sega ni dau yaco dina. E kamikamica dina na veidomoni, ia me rau kua ni nanuma ni na vukei rau qori me rau walia kina na ituvaki rarawataki e dau yaco ena bula vakawati.—Wilika 1 Korinica 7:28.a

¹⁵ Era dau kurabui ra qai rarawa e muri e levu na veiwatini vou nira sega ni duavata vakaveiwatini ena so na ka bibi. De dua ena duidui na nodrau rai ena sala me vakayagataki kina na ilavo, na nodrau gauna galala, vanua me rau vakaitikotiko kina, kei na levu ni gauna me rau sikovi ira kina nodrau dui vuvale. E tiko tale ga na nodrau dui malumalumu ena rawa ni vakararawataki rau. Ni rau veibuku tiko, de dua erau nanuma ni sega ni gadrevi me veitalanoataki qori, ia e muri ena rawa ni vakaleqa na nodrau bula vakawati. E vinaka gona me rau veivosakitaka vinaka qori ni bera ni rau vakawati.

16. Ni basika eso na leqa ena bula vakawati, na cava e bibi kina me rau duavata tiko ga na veiwatini?

¹⁶ Me dei qai marautaki na bula vakawati, ena vinakati me rau cakacaka vata na veiwatini me rau walia na ituvaki e dau basika. Me rau duavata tale ga ena sala mera vakavulici kina na gone kei na qaravi ni nodrau dui itubutubu. Me kua ni vakaleqa na nodrau duavata na leqa e dau basika ena vuvale. Ke rau muria na ivakasala vakaivolatabu, erau na walia e levu na leqa, vosota na leqa rau sotava tiko, rau na marau tiko ga.—1 Kor. 7:10, 11.

17. Na cava na “veika ni vuravura” era na lomaocaocataka na veiwatini?

¹⁷ E dua tale na ka e dau yaco ena bula vakawati, e volatukutukutaka o Paula ena 1 Korinica 7:32-34. (Wilika.) O ira na vakawati era na “lomaocaocataka na veika ni vuravura,” me vaka na kakana, isulu, vale, kei na so tale na ka vakayago. Na vuna? Ni se dawai e dua na tacida tagane, ena rairai vakaogai koya vakalevu ena cakacaka vakaitalatala. Ia ni sa vakawati, ena vakayagataka eso na gauna kei na nona kaukaua e dau vakayagataka e liu me qarava kina na ka e vinakata o watina me rawa ni vakamarautaki koya. E tautauvata tale ga qori kei ira na yalewa vakawati. Ni Kalou vuku o Jiova e kila vinaka tu na ituvaki qori. E kila tale ga o koya ni rau vinakata na veiwatini me vinaka na nodrau vakawati, ena vinakati gona me rau vakayagataka ena nodrau bula vakawati eso na gauna kei na nodrau kaukaua erau dau vakayagataka tu eliu ni rau se dawai.

18. Na veisau cava mera cakava na veiwatini me baleta na nodra veimaliwai kei na so tale?

¹⁸ Ia e dua tale na ka me nanumi. Ke rau vakayagataka eso na gauna kei na kaukaua erau dau vakayagataka tu e liu ena nodrau sokalou me vinaka kina na nodrau vakawati, me rau cakava tale ga qori ena ka e vauca na ka ni veivakamarautaki. Ena vakacava na nona rai e dua na yalewa vakawati, ke se vakayagataka tiko ga o watina e levu na gauna kei ira na nona ilala ena qito? Se vakacava na nona rai o tagane vakawati ke se vakayagataka tiko ga vakalevu o yalewa na nona gauna vei ira na nona ilala? Ena rairai galili e dua vei rau, rarawa, qai sega ni lomani. Ena sega ni yaco qori ke rau saga ena nodrau vinaka taucoko me dei na nodrau vakawati.—Efeso 5:31.

Vinakata o Jiova Meda Savasava

19, 20. (a) Na cava era sega ni galala kina mai na ivalavala vakasisila o ira na vakawati? (b) Na cava e rawa ni yaco ke ra veiyawaki na veiwatini ena levu na gauna?

¹⁹ O ira na qaravi Jiova e dodonu me savasava tiko ga na nodra ivalavala. Eso era nanuma mera vakawati mera kua kina ni beca na savasava i Jiova. Ia na vakawati e sega ni kena ibalebale nida na galala mai na veitemaki ni veiyacovi vakasisila. Ena gauna vakaivolatabu, ke ra tiko ga na lewenivanua ena loma ni koro e viribaiti vakavinaka, era na taqomaki kina. Ke curu i tuba e dua, era na vakamatei koya se butakoci koya o ira na daubutako kei ira na dauvakacaca. E va tale ga qori o ira na vakawati. Era na taqomaki mai na ivalavala vakasisila ke ra muria tiko ga na lawa kei na ivakatagedegede ni vakawati e tauyavutaka o Jiova.

²⁰ A vakamacalataka o Paula na ivakatagedegede qori ena 1 Korinica 7:2-5. E dodonu ga vua na yalewa me veiyacovi kei watina, me cakava tale ga qori o tagane. Ena vinakati me rau solia ‘na ka e dodonu me nodrau,’ se me rau tu vakarau me rau veivakacegui. Ia eso na tagane kei na yalewa vakawati era tu veiyawaki ena levu na gauna—duidui na vanua se na gauna erau na gade kina ena vuku ni cakacaka, vakavuna kina me rau sega ni solia kina ‘na ka e dodonu me nodrau.’ Vakasamataka na leqa e rawa ni yaco ke dua vei rau na veiwatini e ‘sega ni lewai koya rawa,’ mani rawai ena veitemaki i Setani, lai veibutakoci sara. O Jiova e vakalougatataki ira na tagane vakawati era qaravi ira na nodra vuvale, era sega tale ga ni cakava eso na ka me vakaleqa na nodra bula vakawati.—Same 37:25.

Yaga ni Muri na iVakasala Vakaivolatabu

21. (a) Na cava e sega ni rawarawa kina meda vakatulewataka meda dawai se vakawati? (b) Na cava e yaga kina na ivakasala ena 1 Korinica wase 7?

²¹ E sega ni ka rawarawa me vakatulewataka e dua me dawai se me vakawati. Ke o digia mo dawai se vakawati, ena basika ga na leqa baleta nida sega ni uasivi. O ira mada ga e lomana qai vakalougatataki ira o Jiova era sotava tale ga na rarawa, ke ra mani dawai se vakawati. Ke o muria na ivakasala yaga ena 1 Korinica wase 7, o na rawa ni walia e levu na leqa. Ke o dawai se vakawati o na rawa ni “vinaka” ena mata i Jiova. (Wilika 1 Korinica 7:37, 38.) E ka bibi duadua nikua me vakadonui keda o Jiova. Ke vakadonui keda, eda na rawata kina na bula ena vuravura vou. Ena sega ni vakilai ena gauna qori na ka dredre era sotava tu nikua na tagane kei na yalewa.

[iVakamacala e ra]

O Rawa ni Sauma?

• Na cava e sega ni dodonu kina meda vakasaurarataka e dua me vakawati?

• O na vakayagataka vinaka vakacava na nomu bula vakadawai ni o qaravi Jiova?

• Ni rau veibuku tiko e rua, erau na vakarautaki rau vakacava ena ka erau na sotava ena bula vakawati?

• Ni vakawati e dua, na cava e sega ni galala mai kina ena veiyacovi vakasisila?

[iYaloyalo ena tabana e 14]

Era na marau na dawai era vakalevutaka na nodra cakacaka vakaitalatala

[iYaloyalo ena tabana e 16]

Na veisau cava era na cakava eso nira sa vakawati?