LESONI 51

O na Vakamarautaki Jiova Vakacava ena Nomu Vosa?

iLavelave e Tabaki

Ni buli keda o Jiova, e solia vei keda na isolisoli talei ni vosa. Vakacava e kauaitaka na sala eda vakayagataka kina na isolisoli qori? Io! (Wilika Jemesa 1:26.) Eda na vakamarautaki Jiova vakacava ena noda vosa?

1. Mo vakayagataka vakacava na isolisoli ni vosa?

E tukuna na iVolatabu “moni veivakayaloqaqataki tiko, moni veivakauqeti.” (1 Cesalonaika 5:11) O rawa ni vakasamataka eso era vinakata tu na veivakayaloqaqataki? O na vukei ira vakacava? Tukuna vei ira ni o kauaitaki ira. De dua mo tukuna na ka o taleitaka vei ira. O kila e dua na tikinivolatabu mo vakayaloqaqataka kina e dua drau veikilai? E levu tu na tikinivolatabu o rawa ni vakayagataka. Mo nanuma tale ga me veiuqeti na itautau ni nomu vosa. Ena vinaka gona mo vosa vakayalovinaka, me tau tale ga vakamalua.—Vosa Vakaibalebale 15:1.

2. Na vosa cava mo kua ni tauca?

E kaya na iVolatabu: “Me kua ni lako mai gusumuni e dua na vosa vakasisila.” (Wilika Efeso 4:29.) Kena ibalebale eda na sega ni vosa ca, vosa vakalialia, se veibeci me vakamosia na lomana e dua. Meda kua tale ga ni daukakase se dauvakaucaca.—Wilika Vosa Vakaibalebale 16:28.

3. Ena veiuqeti vakacava nomu vosa?

Na ka eda dau veitalanoataka vakalevu e vakaraitaka na ka e tu e lomada kei na noda vakasama. (Luke 6:45) Meda vulica gona meda dau vakasamataka na veika vinaka, na ka e dodonu, na ka e savasava, na ka e uqeta na veilomani, kei na ka me vakacaucautaki. (Filipai 4:8) Me rawati qori, e bibi meda digia vinaka na ka ni veivakamarautaki kei ira noda itokani. (Vosa Vakaibalebale 13:20) Ena vukei keda tale ga meda dau vakasama rawa ni bera nida vosa. Vakasamataka na sala ena tarai ira kina eso tale na ka o tukuna. E kaya na iVolatabu: “Na vosa vakalialia e vaka na isua ni iseleiwau, ia na yamedra na vuku e veivakabulai.”—Vosa Vakaibalebale 12:18.

VAKEKELI

Vulica na sala me vakamarautaki Jiova kina na nomu vosa me veiuqeti tale ga vei ira eso.

4. Lewa vinaka na ka o tukuna

Eso na gauna, eda dau tukuna eso na ka da qai veivutunitaka e muri. (Jemesa 3:2) Wilika Kalatia 5:22, 23, qai veivosakitaka na taro qo:

Na itovo cava o rawa ni masulaka mo lewa vinaka kina na ka o tukuna? Ena vukei iko vakacava na itovo qori?

Wilika 1 Korinica 15:33, qai veivosakitaka na taro qo:

Ena laurai vakacava ena nomu ivosavosa na ka ni veivakamarautaki o taleitaka, kei na itokani o digia?

iYaloyalo: Na ka e cakava o tagane me vosa kaukaua kina vei watina. 1. E dau rogoca na ivakatagi torosobu qai karakaravisa. 2. E sarava kei na nona itokani na veivacu. — Na cava ena rawa ni vakavuna me vinaka se ca na ka o tukuna?

iYaloyalo: Na ka e cakava o tagane me vosa vakayalovinaka vei watina. 1. E wili iVolatabu. 2. O koya kei watina eratou veitalanoa kei na nona itokani ena Vale ni Soqoni. — Na cava ena rawa ni vakavuna me vinaka se ca na ka o tukuna?

Wilika Dauvunau 3:1, 7, qai veivosakitaka na taro qo:

Na gauna cava mo tikolo kina kei na gauna mo vosa kina?

5. Tukuna na ka era vinaka kina eso tale

Eda na saga vakacava meda kua ni tukuna vakaca e dua se veibeci? Sarava na VIDIO, qai veivosakitaka na taro tarava.

VIDIO: Me ‘Vinaka Qai Veivakayaloqaqataki’ na ka o Tukuna (4:07)

Ena vidio, na cava e veisautaka kina na tacida tagane na ka e dau tukuna me baleti ira eso tale?
E veisautaka vakacava nona itovo?

Wilika Dauvunau 7:16, qai veivosakitaka na taro qo:

Na cava meda vakasamataka tiko ke da via tukuna vakaca e dua?

Wilika Dauvunau 7:21, 22, qai veivosakitaka na taro qo:

Ena vukei iko vakacava na tikinivolatabu qo mo kua ni cudru totolo ke dua e tukuni iko vakaca?

6. Mo vosa vakayalovinaka vei ratou e vale

E vinakata o Jiova meda vosa vakayalovinaka qai vakayalololoma vei ratou e vale. Sarava na VIDIO, qai veivosakitaka na taro tarava.

VIDIO: Duavata na Vuvale ena Loloma kei na Veidokai (3:08)

Na cava ena vukei iko mo vosa vakayalovinaka vei ratou nomu vuvale?

Wilika Efeso 4:31, 32, qai veivosakitaka na taro qo:

Na vosa vakacava ena uqeti ratou e vale?

E tukuna sara ga o Jiova nona rai me baleti Luvena o Jisu. Wilika Maciu 17:5, qai veivosakitaka na taro qo:

O na vakatotomuri Jiova vakacava ena ivakarau ni nomu veivosaki e vale?

E dua na tina e vakacaucautaka tiko na droini i luvena. — Vaqara na sala mo dau veivakacaucautaki kina

KA ERA KAYA ESO: “Au na tukuna ga na noqu nanuma, ke ra via rogoca se sega.”

O duavata kina? Na vuna?

KA O VULICA

Na vosa e ka kaukaua. E bibi meda dau vakasamataka na ka eda tukuna, na gauna meda tukuna kina, kei na kena itautau.

Railesuvi

Na cava eso na sala me veiuqeti kina nomu vosa mo vukea eso tale?
Na vosa vakacava mo kua ni cavuta?
O na vosa vakayalovinaka vakacava qai veiuqeti?

Vakaoti na lesoni ena:

iSausau

Ena macawa qo, saga mo vakavinavinakataka e dua e vale se ena ivavakoso.

Eso tale:

Dua tale nomu isausau

IKURI

Na cava ena vukei keda me veiuqeti na ka eda tukuna?

Me Vuku na Yamemu 8:04

Na cava ena vukei iko mo kua ni vosa ca?

“E Cala Dina na Vosavosa Ca?” (Ulutaga ena jw.org)

Dikeva na sala mo kua ni kakase kina.

Qarauna na Kakase! (2:36)

Dikeva nona vukea e dua na turaga o Jiova me biuta na vosavosa ca.

“Au Liaca ni Dodonu Meu Veisautaka Noqu iVakarau ni Bula” (Na Vale ni Vakatawa, 1 Okosita, 2013)