E VEISAUTAKA NA BULA NA IVOLATABU
“Au liaca ni dodonu meu veisautaka noqu ivakarau ni bula”
Talanoataka o Allan Hancock
SUCU: 1941
VANUA: OSITERELIA
KA E KILAI KINA: VAKATAVAKO, GUNU SIVIA
NOQU BULA E LIU: Au susu e Warialda, dua na taoni lailai e New South Wales, e vanua ni teitei, susu sipi kei na bulumakau. E taoni savasava qai dau yaco vakavudua na basulawa.
Niu qase duadua vei keitou na tini na veitacini, au tekivu cakacaka niu yabaki 13 meu veivuke e vale. Au sega ni vuli vinaka, au dau cakacaka ga ena vanua ni susu manumanu. Niu yabaki 15, e noqu cakacaka meu dau vakamanoataki ira na ose kila.
Au marautaka na noqu cakacaka kei na vanua au cakacaka kina. Ena bogi niu tatalai toka, au dau dagava na lomalagi qai raica na serau ni vula, sausauriva ni kalokalo, au vakila tale ga na mudre ni cagi qai salavata mai na boi kamica ni senikau. Au dau vakasamataka ni tiko dina e dua e bulia na veika totoka qori. Ena yasana adua, au maliwai ira tale ga e ca na nodra ivakarau, era dau vosavosa ca ra qai dau vakatavako. Toso na gauna sa noqu ivakarau tale ga ni bula qori.
Niu yabaki 18 au toki i Serene. Au saga meu lewe ni mataivalu, ia a sega ni vakadonui niu sega ni vuli vinaka. Au mani kunea e dua na cakacaka, qai tiko ekea me dua na yabaki. Qori na gauna au sotavi ira kina na iVakadinadina i Jiova. Au tiko ena dua na nodra soqoni, qai vakadinata ni dina na ka era vakavuvulitaka.
Sega ni dede au toki i Goondiwindi, e dua na taoni e Kuinisiladi, e vanua tale ga ni susu manumanu kei na teitei. Au cakacaka ekea, vakawati, au sa tekivu gunu tale ga.
Ni sucu e rua na luvequ tagane, au liaca ni dodonu meu veisautaka noqu ivakarau ni bula. Au nanuma lesu na ka au vulica ena nodra soqoni na iVakadinadina i Jiova e Serene, qai saga meu muria.
Au kunea e dua na ilavelave makawa ni Vale ni Vakatawa, e volai kina na katonimeli ni valenivolavola ni tabana ni iVakadinadina i Jiova e Ositerelia. Au mani volavola kina niu via vuli iVolatabu. A sikovi au mai e dua na iVakadinadina qai vakavulici au ena iVolatabu.
VEISAUTAKI AU NA IVOLATABU: Niu vulica na iVolatabu, au raica ni gadrevi meu veisautaka e levu na ka ena noqu bula. E uqeti au sara ga na 2 Korinica 7:1. E vakamacalataki kina ni dodonu meda “vakasavasavataki keda mai na dukadukali kece vakayago.”
Au vakatulewataka meu muduka na vakatavako kei na gunusivia. E sega ni rawarawa na veisau qori niu sa bobula tu kina. Ia au vakadeitaka meu vakamarautaka na Kalou. E vukei au vakalevu na noqu muria na ivakavuvuli ena Roma 12:2: “Ni kua ni muria na ivakarau ni veika vakavuravura qo, me vakavoui ga na nomuni vakasama.” Au kila ni dodonu meu vakatotomuria na rai i Jiova meu veisautaka na noqu ivakarau ni bula. E vukei au qori meu muduka na vakatavako kei na gunusivia.
Ia sa bau ka ni sasaga dina meu muduka na vosavosa ca. Au kila vinaka na ivakasala ena Efeso 4:29: “Me kua ni lako mai gusumuni e dua na vosa vakasisila.” Ia e taura toka na gauna meu muduka na ivakarau qori. E vukei au tale ga na noqu dau vakananuma na Aisea 40:26. E tukuna na tikinivolatabu qori me baleta na kalokalo: “Dou ta cake, ka rai yani; ko cei ka bulia na ka oqori? ka sa kauta vakamataivalu mai na kedrai vavakoso? sa kacivi ira kecega e na yacadra, ka ni sa levu na nona kaukauwa, ka sa daugumatua sara; sa sega e dua sa yali.” Ke tu vua na Kalou na kaukaua me bulia na veika totoka e lomalagi kei vuravura, e rawa tale ga ni vukei au meu veisautaka noqu ivakarau ni bula meu vakamarautaki koya. Na noqu dau sasagataka na ka au masulaka, au muduka kina na vosavosa ca.
KENA YAGA: Niu cakacaka ena vanua ni susu manumanu, au sega ni dau veivosaki kei ira eso tale ni keitou le vica ga. Ia au vulica ena nodra soqoni na iVakadinadina i Jiova na sala meu dau veivosaki kina kei ira tale eso. E vukei au tale ga qori meu wasea na itukutuku vinaka ni Matanitu ni Kalou.—Maciu 6:9, 10; 24:14.
Sa vica vata qo na yabaki noqu marautaka tiko na itavi dokai meu dua na qase ni ivavakoso ni iVakadinadina i Jiova. E talei dina na noqu dau vukei ira na taciqu vakayalo. Ia e marautaki duadua ni keitou qaravi Jiova vakavuvale.
Dina niu sega ni vuli vinaka, ia au vakavinavinaka ni vakavulici au o Jiova. (Aisea 54:13) Au duavata kei na ka e tukuna na Vosa Vakaibalebale 10:22, e kaya: “Na veivakalougatataki maivei Jiova sa ia na veivakavutuniyautaki.” Keitou vinakata vakavuvale me keitou vulica e levu tale na ka me baleti Jiova, qai qaravi koya me tawamudu.
[iYaloyalo ena tabana e 8]
[iYaloyalo ena tabana e 8]
[Tikina bibi ena tabana e 9]
[iYaloyalo ena tabana e 9]
“Au kila ni dodonu meu vakatotomuria na rai i Jiova meu veisautaka na noqu ivakarau ni bula”
[iYaloyalo ena tabana e 9]