LESONI 56
Maroroya Tiko ga na Duavata ena iVavakoso
Nida maliwai ira na tacida, eda vakila na ka e tukuna o Tui Tevita: “Sa dua na ka vinaka qai marautaki nira tiko ena duavata na veitacini!” (Same 133:1) E sega ni tu tu ga meda sa duavata. E tiko na noda itavi yadua meda maroroya na duavata.
1. Na cava era duatani kina na tamata ni Kalou?
Ke o lai soqoni ena dua tale na vanua, de dua o na sega ni kila na ka era tukuna, ia o na vakila ni o sega ni vulagi. Na vuna? Ni tautauvata na ivola vakaivolatabu eda vulica e veiyasa i vuravura. Eda saga tale ga meda veilomani. Se mani vanua cava eda tu kina, eda “masuta kece na yaca i Jiova, [meda] qaravi koya ena duavata.”—Sefanaia 3:9.
2. Na cava mo cakava mo uqeta na duavata?
“Me vu sara ga mai lomamuni na nomuni veilomani.” (1 Pita 1:22) O na muria vakacava na ivakasala qori? Kua ni kauaitaka na nodra malumalumu eso tale, raica ga na veika era vinaka kina. Kua ni veimaliwai ga kei ira e tautauvata na ka oni taleitaka, saga mo kilai ira eso tale na mataveitacini e duidui na nodra isususu. Ke da vakila ni tiko vei keda na yalo ni veivakaduiduitaki, meda saga vagumatua meda cavuraka laivi.—Wilika 1 Pita 2:17.a
3. Na cava mo cakava ke o sega ni veiyaloni kei na dua na lotu vaKarisito?
Eda duavata na lotu vaKarisito, ia eda sega ni uasivi. So na gauna eda na vakacudruya e dua, so na gauna eda na vakacudrui. Oya na vuna e tukuna kina vei keda na Vosa ni Kalou meda “dau . . . veivosoti . . vakarawarawa,” sa qai kuria: “Moni dau veivosoti me vaka ga na nona vosoti kemuni vakarawarawa o Jiova.” (Wilika Kolosa 3:13.) Eda dau vakararawataki Jiova ena levu na gauna, ia se vosoti keda tiko ga. E namaka gona meda vosoti ira na tacida. Ke o kila ni o vakararawataka e dua, saga mo vakaliuliu mo walia na leqa.—Wilika Maciu 5:23, 24.b
VAKEKELI
Qara na sala mo uqeta kina na duavata kei na vakacegu ena ivavakoso.
Na cava mo cakava mo qara kina na veiyaloni?
4. Valuta na veivakaduiduitaki
Eda via lomani ira kece na tacida. Ia ena via dredre ena so na gauna meda veimaliwai vinaka kei na dua ni via duatani toka vei keda. Na cava ena vukei keda? Wilika Cakacaka 10:34, 35, qai veivosakitaka na taro qo:
E vakadonuya o Jiova mera nona iVakadinadina na tamata mai na duidui vanua. Me laurai vakacava qori ena nomu ivakarau ni rai vei ira e duidui na nodra isususu?
Na veivakaduiduitaki cava e takalevu ena vanua o tiko kina mo qarauna?
Wilika 2 Korinica 6:11-13, qai veivosakitaka na taro qo:
O na volekati ira vakacava na tacida e duidui nodra isususu?
5. Mo dau veivosoti vakarawarawa qai veiyaloni
E sega ni rawa nida vosoti Jiova, ia e yalorawarawa ni vosoti keda. Wilika Same 86:5, qai veivosakitaka na taro qo:
E vakacava na levu ni nona veivosoti o Jiova?
Na cava o taleitaka kina na nona veivosoti?
Na ituvaki cava ena vakadredretaka na noda veiyaloni kei ira eso tale?
Eda na vakatotomuri Jiova vakacava qai duavata tiko ga kei ira na tacida? Wilika Vosa Vakaibalebale 19:11, qai veivosakitaka na taro qo:
Ke dua e vakacudrui iko, na cava mo cakava mo drau veiyaloni kina?
So na gauna, eda dau vakacudrui ira eso tale. Ke yaco qori, na cava meda cakava? Sarava na VIDIO, qai veivosakitaka na taro tarava.
Ena vidio, na cava e cakava na tacida yalewa me veiyaloni kina?
6. Raica na ka era vinaka kina na tacida
Nida kilai ira vinaka na tacida, eda na kila na nodra itovo vinaka kei na nodra malumalumu. Eda na raica tiko ga vakacava na nodra itovo vinaka? Sarava na VIDIO, qai veivosakitaka na taro tarava.
Na cava ena vukei iko mo raica tiko ga na nodra itovo vinaka na tacida?
E dau raica ga o Jiova na noda itovo vinaka. Wilika 2 Veigauna 16:9a, qai veivosakitaka na taro qo:
Na cava nomu rai ni o mai vulica ni o Jiova e kauaitaka ga na noda itovo vinaka?
E sega ni taucoko sara na daimani e rairai vinaka, ia se yaga tiko ga. Era sega tale ga ni uasivi na tacida, ia era ka talei vei Jiova
KA ERA KAYA ESO: “Meu rawa ni vosoti koya, me vosoti au mada e liu.”
Na cava meda dau saga kina meda dauveivosoti?
KA O VULICA
O na rawa ni uqeta tiko ga na duavata ena ivavakoso ke o dau veivosoti qai lomani ira tiko ga na mataveitacini.
Railesuvi
O na valuta vakacava na veivakaduiduitaki?
Na cava mo cakava ke drau veileqaleqati kei na dua na lotu vaKarisito?
Na cava o via vakatotomuria kina na ivakaraitaki ni veivosoti i Jiova?
IKURI
Vulica ena dua na vosa vakatautauvata i Jisu na sala mo kua ni vakalewai ira kina eso tale.
E dodonu meda kere veivosoti nida sega ni cakava e dua na cala?
“Na Kere Veivosoti—Rawati Kina na Veisaututaki” (Na Vale ni Vakatawa, 1 Noveba, 2002)
Sarava na nodra vulica eso mera kua ni veivakaduiduitaki.
Dikeva na sala mo walia kina na nomu veileqaleqati kei na dua ni bera ni vakaleqa na duavata ena ivavakoso.
a iKuri ni iVakamacala 6 dikeva ni loloma e uqeti ira na lotu vaKarisito mera kua ni vakadewa na matedewa.
b iKuri ni iVakamacala 7 ena vakamacalataka na sala me wali kina na leqa vakabisinisi kei na tabana ni lawa.